မၤတၢ် 28

လၢကီးမ့းလံတ့ၤအလိၤ

1ဖဲပတုၤပဝဲဂ့ၤဂ့ၤဘၣ်ဘၣ်ဖဲခိဝံၤအလီၢ်ခံန့ၣ်, ပသ့ၣ်ညါဘၣ်က့ၤပဝဲလၢကီးတဖျၢၣ်န့ၣ်အမံၤမ့ၢ်ဝဲမ့းလံတ့ၤ လီၤ. 2ပှၤအိၣ်ဆိးဖဲကီးတဖျၢၣ်န့ၣ်အလိၤတဖၣ်ဂ့ၤလၢပဖီခိၣ်ဒိၣ်မး လီၤ. တၢ်ဟဲစူၤဒီးတၢ်ဂိၢ်အဃိ, အဝဲသ့ၣ်မၤကဲၤထီၣ်မ့ၣ်အူဒီးတူၢ်လိာ်ခီၣ်ဆၢပဝဲကိးဂၤဒဲးလီၤ. 3ဖဲစီၤပီလူးထၢဖှိၣ်သ့ၣ်ဒ့တကဒိၣ်ဒီးဒၢနုာ်ဝဲလၢမ့ၣ်အူ အပူၤအဆၢကတီၢ်န့ၣ်, မ့ၣ်အူကိၢ်အဃိဂုၢ်ဘီၣ်အီးတဘိဟဲထီၣ်ဒီးဖျးအီၤဒီးအိၣ်စဲဘူး အသးလၢအစုလိၤလီၤ. 4ပှၤကီးဖိဖဲန့ၣ်တဖၣ်ထံၣ်ဂုၢ်သ့ၣ်အိၣ်ဘျးလီၤအသးလၢ စီၤပီလူးအစုလိၤဒီးစံးလိာ်အသးတဂၤဒီးတဂၤ, “ပှၤတဂၤအံၤကမ့ၢ်ပှၤမၤသံပှၤကညီလီၤ. အဝဲပူၤဖျဲးကွံာ်လၢပီၣ်လဲၣ်အပူၤသနာ်က့, ဘူၣ်တီၢ် ကစၢ်တပျဲမူအီၤလၢၤဘၣ်.” 5ဘၣ်ဆၣ်ဒီးစီၤပီလူးတဆ့လီၤကွံာ်ဂုၢ်သ့ၣ်ဆူမ့ၣ်အူအပူၤ, ဒီးအနီၢ်ကစၢ်ဒၣ်ဝဲတဘၣ်တၢ်နီတမံၤဘၣ်. 6အဝဲသ့ၣ်အိၣ်ခိးကွၢ်ဝဲလၢစီၤပီလူးကညိးထီၣ်မ့တမ့ၢ်ကလီၤ ဃံၤသံသတူၢ်ကလာ်လီၤ. ဘၣ်ဆၣ်ဒီးဖဲအခိးဝဲယံာ်ထီၣ်ဒီး တထံၣ်ဝဲတၢ်လီၤတိၢ်လီၤဆီမၤအသးဒီးအီၤနီတမံၤဘၣ်န့ၣ်, အဝဲသ့ၣ်အတၢ်ဆိကမိၣ်လဲလိာ်အသးဒီးစံးဝဲ, “အဝဲမ့ၢ်ယွၤတဂၤန့ၣ်လီၤ.”

7ဘူးဒီးတၢ်လီၢ်ဖဲန့ၣ်, ဟီၣ်ခိၣ်ဖးလဲၢ်အိၣ်ဝဲတကဝီၤလၢအမ့ၢ်ကီး အပဒိၣ်စီၤပီးပျံၤအတၢ်န့ၣ်လီၤ. အဝဲဒၣ်တူၢ်လိာ်ခီၣ်ဆၢပှၤဂ့ၤမး, ဒီးလၢသၢသီအတီၢ်ပူၤပကဲအဝဲအပှၤသမှံၤတဖၣ်လီၤ. 8တၢ်မၤအသးလၢစီၤပီးပျံၤအပၢ်မံလၢအလီၢ်မံခိၣ်မ့ၢ်လၢ အလိၤကိၢ်ဒီးအဟၢဖၢဝံာ်အဃိလီၤ. စီၤပီလူးလဲၤနုာ်ဆူအဒၢးပူၤ, ဃ့ဘါထုကဖၣ်တၢ်, ပာ်ထီၣ်အစုလၢအလိၤဒီးမၤဘျါက့ၤအီၤလီၤ. 9ဖဲတၢ်အံၤမၤအသးန့ၣ်, ပှၤဆူးပှၤဆါအဂုၤအဂၤတဖၣ်လၢကီးန့ၣ် အပူၤဟဲဝဲဒီးဘၣ်တၢ်မၤဘျါက့ၤအီၤလီၤ. 10အဝဲသ့ၣ်ဟ့ၣ်ပှၤတၢ်ဟ့ၣ်အါအါဂီၢ်ဂီၢ်, ဒီးလၢခံဖဲပဒိးထီၣ်ကဘီန့ၣ်, အဝဲသ့ၣ်တီၣ်ထီၣ်တၢ်လၢပကလိၣ်ဘၣ်အီၤလၢပတၢ်လဲၤတဘျီန့ၣ် အဂီၢ်လီၤ.

လၢကီးမ့းလံတ့ၤဆူဝ့ၢ်ရိမ့ၤ

11သၢလါဝံၤအလီၢ်ခံ, ပဒိးထီၣ်ဝ့ၢ်အလ့းစၣ်ဒြ့းအကဘီတဘ့ၣ်လၢ တၢ်ကိးအီၤလၢ, “ကစၢ်သဃံာ်” လၢအအိၣ်တ့ၢ်လံဖဲကီးန့ၣ်အပူၤ ဖဲတၢ်ဂိၢ်ခါဒီဆၢကတီၢ်န့ၣ်လီၤ. 12ပလဲၤတုၤဖဲဝ့ၢ်စူၤရၤကူဒီး ပအိၣ်ဖဲန့ၣ်သၢသီလီၤ. 13ပဟးထီၣ်ကဒီးဖဲန့ၣ်ဒီးလဲၤတၢ်တုၤလၢဝ့ၢ်ရ့ကံၤလီၤ. တသီဝံၤအလီၢ်ခံန့ၣ်, ကလံၤဟဲအူထီၣ်တၢ်လၢကလံၤထံးတခီဒီး လၢခံသီတသီန့ၣ်ပလဲၤတုၤဖဲဝ့ၢ်ပီးတံၤလူးလီၤ. 14ဖဲန့ၣ်ပထံၣ်လိာ်ပသးဒီးပှၤစူၢ်က့ၤနာ်က့ၤတၢ်တဖၣ်, ဒီးအဝဲသ့ၣ်မၢပအိၣ်ဒီးအီၤတနွံလီၤ. ဒီးပလဲၤတုၤပဝဲလၢဝ့ၢ်ရိမ့ၤန့ၣ်လီၤ. 15ဒီပုၢ်ဝဲၢ်ပှၤစူၢ်က့ၤနာ်က့ၤတၢ်ဖဲဝ့ၢ်ရိမ့ၤတဖၣ်နၢ်ဟူဘၣ်ပဂ့ၢ်ပကျိၤ ဒီးဟဲအိၣ်ခိးပခိၣ်တုၤလၢဝ့ၢ်လၢအမံၤမ့ၢ်အးပံပရူးအဖၠါပူၤဒီးပှၤ သမှံၤအဘျီၣ်သၢဖျၢၣ်န့ၣ်လီၤ. ဖဲစီၤပီလူးထံၣ်အဝဲသ့ၣ်န့ၣ်, အဝဲဒၣ်စံးဘျုးစံးဖှိၣ်ကစၢ်ယွၤဒီးအသးအဂံၢ်အဘါဆူၣ် ထီၣ်ဝဲဒိၣ်မးန့ၣ်လီၤ.

လၢဝ့ၢ်ရိမ့ၤအပူၤ

16ဖဲပတုၤလၢဝ့ၢ်ရိမ့ၤန့ၣ်, စီၤပီလူးဘၣ်တၢ်ဟ့ၣ်အီၤတၢ်ပျဲလၢအကအိၣ်ဒၣ်အတၢ် လၢအတၢ်အိၣ်တၢ်ဆိးအလီၢ်ဒၣ်ဝဲ, ဒီးသုးဖိတဂၤအိၣ်ခိးကွၢ်ထွဲအီၤလီၤ.

17သၢသီလဲၤပူၤကွံာ်ဝံၤအလီၢ်ခံန့ၣ်, စီၤပီလူးကိးဖှိၣ်ပှၤယူဒၤဖိအခိၣ်အနၢ်ဖဲဝ့ၢ်ရိမ့ၤ တဖၣ်န့ၣ်လီၤ. ဖဲအဝဲသ့ၣ်ဟဲတုၤဖှိၣ်န့ၣ်, အဝဲဒၣ်စံးဘၣ် အဝဲသ့ၣ်, “ယဒီပုၢ်ဝဲၢ်ပှၤအံၣ်စရ့လးဖိသ့ၣ်ဧၢ, ယတမၤတ့ၢ်ယဲတၢ်လၢအထီဒါပပှၤကလုာ်မ့ၢ်ဂ့ၤ, ပလုၢ်ပလၢ်လၢပဒိးန့ၢ်ဘၣ်လၢပမိၢ်ပၢ်ဖံဖုလၢပျၢၤတဖၣ် အအိၣ်မ့ၢ်ဂ့ၤနီတမံၤဘၣ်. သနာ်က့ဒီး, တၢ်ဖီၣ်ဒၢနုာ်ယၤလၢဝ့ၢ်ယရူၤၡလ့ၣ်အဃိာ်ပူၤဒီးတၢ်ဟ့ၣ်လီၤယၤ ဆူပှၤရိမ့ၤဖိတဖၣ်အစုပူၤလီၤ. 18အဝဲသ့ၣ်သမံသမိးယၤဝံၤအလီၢ်ခံ, မ့ၢ်လၢအတထံၣ်န့ၢ်ယတၢ် ကမၣ်လၢအကြၢးဒီးတၢ်စံၣ်ညီၣ်သံနီတမံၤဘၣ်အဃိ, အဲၣ်ဒိးပျၢ်ဖျဲးကွံာ်ယၤလီၤ. 19ဘၣ်ဆၣ်ဒီးဖဲပှၤယူဒၤဖိတဖၣ်ထီဒါတၢ်အံၤန့ၣ်, ယတၢ်ဂ့ၢ်လၢယကပာ်ဖျါထီဒါယပှၤကလုာ်ဒၣ်ယဲန့ၣ်တအိၣ်နီ တမံၤသနာ်က့, ယဘၣ်ပတံထီၣ်တၢ်ဆူစီၤပၤဖးဒိၣ်အအိၣ်န့ၣ်လီၤ. 20လၢတၢ်န့ၣ်အဃိ, ယဃ့ထံၣ်ဒီးဃ့ကတိၤဘၣ်တၢ်ဒီးသု, အဂ့ၢ်ဒ်အံၤယဘၣ်တၢ်စၢဃာ်ယၤလၢပျံၤထးအံၤ, မ့ၢ်ဒၣ်လၢပှၤလၢပှၤအံၣ်စရ့လးဖိပာ်ထီၣ်အတၢ်မုၢ်လၢ် လၢအလိၤတဂၤန့ၣ်အဃိလီၤ.”

21အဝဲသ့ၣ်စံးဘၣ်အီၤ, “ပတဒိးန့ၢ်တ့ၢ်တၢ်ပရၢလၢကီၢ်ယူဒၤဘၣ်ဃးနဂ့ၢ်နီတဘ့ၣ်ဘၣ်. ပဒီပုၢ်ဝဲၢ်ပှၤယူဒၤဖိသကိးပှၤယူဒၤဖိဒ်ပှၤတဟဲစိာ်စ့ၢ်ကီးတၢ် ကစီၣ်ဖဲန့ၣ်လၢအကတိၤအၢနဂ့ၢ်နီတမံၤဘၣ်. 22ဘၣ်ဆၣ်ဒီး ပအဲၣ်ဒိးနၢ်ဟူဘၣ်နတၢ်ဆိကမိၣ်တဖၣ်လီၤ. အဂ့ၢ်ဒ်အံၤ, ပသ့ၣ်ညါပဝဲလၢတၢ်လီၢ်ကိးပူၤဒဲးန့ၣ်, ပှၤကတိၤထီဒါပှၤတကရၢလၢနဘၣ်ထွဲဒီးအီၤတဖုအံၤန့ၣ်လီၤ.”

23လၢတၢ်န့ၣ်အဃိအဝဲသ့ၣ်သ့ၣ်နံၤဖးသီဒီးစီၤပီလူး, ဒီးဖဲနံၤအဝဲန့ၣ်ပှၤယူဒၤဖိဟဲအါအါဂီၢ်ဂီၢ်ဖဲတၢ်လီၢ် လၢစီၤပီလူးအိၣ်ဝဲန့ၣ်လီၤ. စးထီၣ်လၢဂီၤတုၤလၢမုၢ်နၤခီန့ၣ်, အဝဲဒၣ်တဲဖျါထီၣ်ဒီးဟ့ၣ်အဝဲသ့ၣ်လၢအတၢ်ကစီၣ်ဘၣ်ဃး ကစၢ်ယွၤအဘီအမုၢ်န့ၣ်လီၤ. အဝဲဒၣ်ဂုာ်ကျဲးစၢးဒုးနာ်အဝဲသ့ၣ်ဘၣ်ဃးယ့ၣ်ၡူးအဂ့ၢ်ခီဖျိ အယၢၤထီၣ်စီၤမိၤၡ့အတၢ်သိၣ်တၢ်သီဒီးဝံအတၢ်ကွဲးတဖၣ် န့ၣ်လီၤ. 24အဝဲသ့ၣ်တနီၤနာ်အဝဲအတၢ်စံးတၢ်ကတိၤ, မ့မ့ၢ်အဂၤတဖၣ် တနာ်ဝဲဘၣ်. 25ဖဲအဝဲသ့ၣ်အသးတလီၤပလိာ်ဒီးဟးထီၣ်ကွံာ်ဝဲန့ၣ်, စီၤပီလူးကတိၤတၢ်ဒီးအီၤအကတၢၢ်တဘီဒ်အံၤလီၤ. “သးစီဆှံကတိၤတၢ်ဒီးသုမိၢ်ပၢ်ဖံဖုလၢပျၢၤတဖၣ် ခီဖျိဝံယၡါယၤန့ၣ်ဘၣ်မးလီၤ. 26အဂ့ၢ်ဒ်အံၤ အဝဲဒၣ်စံးဝဲ,

‘လဲၤဆူပှၤတကလုာ်အအိၣ်ဒီးစံး,

သုကဒိကနၣ်ဝံၤဒိကနၣ်က့ၤ,

ဘၣ်ဆၣ်သုတနၢ်ပၢၢ်သုဝဲဘၣ်.

သုကကွၢ်ဝံၤကွၢ်က့ၤဘၣ်ဆၣ်သုတထံၣ်တၢ်ဘၣ်.

27အဂ့ၢ်ဒ်အံၤ, ပှၤတကလုာ်အံၤအသးခံးဝဲလီၤ.

အဝဲသ့ၣ်ကးတံာ်အနၢ်ပူၤ,

ဒီးကးတံာ်အမဲာ်ချံလီၤ.

မ့တမ့ၢ်ဘၣ်ဒီး, အဝဲသ့ၣ်ကထံၣ်တၢ်လၢအမဲာ်ချံ,

နၢ်ဟူတၢ်လၢအနၢ်,

နၢ်ပၢၢ်တၢ်လၢအသး,

ဒီးကဃၣ်က့ၤအသးဆူယအိၣ်, ကစၢ်ယွၤစံးဝဲ,

ဒီးယကမၤဘျါက့ၤအဝဲသ့ၣ်န့ၣ်လီၤ.’

28လၢတၢ်န့ၣ်အဃိသုကဘၣ်သ့ၣ်ညါဒ်အံၤ, ကစၢ်ယွၤအတၢ်ကစီၣ်ဘၣ်ဃးတၢ်အုၣ်က့ၤခီၣ်က့ၤန့ၣ်, ဘၣ်တၢ်ဆှၢလံအီၤဆူပှၤကလုာ်ဂၤတဖၣ်အအိၣ်လံ. အဝဲသ့ၣ်ကဒိကနၣ်တၢ်လီၤ.” 29(စီၤပီလူးစံးတၢ်ဒ်အံၤဝံၤအလီၢ်ခံန့ၣ်, ပှၤယူဒၤဖိသ့ၣ်တဖၣ်ဟးထီၣ်, အိၣ်ဒီးတၢ်ဂ့ၢ်လိာ်ဘှီလိာ်ဆူၣ်ဆူၣ်ကလဲာ်လၢအဝဲသ့ၣ်ကဒဲကဒဲ အကျါန့ၣ်လီၤ.)

30လၢခံနံၣ်အတီၢ်ပူၤန့ၣ်, စီၤပီလူးအိၣ်ဝဲဖဲတၢ်လီၢ်လၢအနီၢ်ကစၢ်ဒိး လဲဝဲဒီးတူၢ်လိာ်ခီၣ်ဆၢကယဲၢ်ပှၤလၢအဟဲအိၣ်သကိးအီၤတဖၣ် လီၤ. 31အဝဲဒၣ်စံၣ်တဲၤတဲလီၤတၢ်ဘၣ်ဃးကစၢ်ယွၤအဘီအမုၢ်, ဒီးသိၣ်လီၤသီလီၤတၢ်ဘၣ်ဃးကစၢ်ယ့ၣ်ၡူးခရံာ်အဂ့ၢ်ဒီး ကတိၤတၢ်လၢတၢ်သူၣ်ဒူသးဒူအလၢအပှဲၤဒီးလၢတၢ်သဘျ့ နီၢ်နီၢ်အပူၤလီၤ. ပှၤလၢအကတြီအီၤတအိၣ်နီတဂၤဘၣ်.

Currently Selected:

မၤတၢ် 28: KSWC

Highlight

Copy