စံးထီၣ်ပတြၢၤ 143
143
တၢ်ထုကဖၣ်လၢတၢ်မၤစၢၤအဂီၢ်
1ယွၤဧၢ, နၢ်ဟူယတၢ်ထုကဖၣ်တက့ၢ်.
လၢနတၢ်တီတၢ်လိၤအပူၤန့ၣ်
ဒိကနၣ်လၢ်ယတၢ်ဃ့ကညး
ဒီးစံးဆၢလၢ်ယၤလၢနတၢ်သးတီအပူၤန့ၣ်တက့ၢ်.
2ပျဲယၤ, နခ့နပှၤ
ဘၣ်တၢ်လိာ်ကွီၢ်တဂ့ၤ.
လၢနမဲာ်ညါပှၤလၢအတၢ်ကမၣ်တအိၣ်ဘၣ်န့ၣ်
တအိၣ်နီတဂၤဘၣ်.
3ယဒုၣ်ယဒါတဖၣ်လူၤမၤလီၤဃံၤတ့ၢ်ယၤ
ဒီးမၤနၢၤကွံာ်တ့ၢ်လံယၤလၢာ်လၢာ်ဆ့ဆ့န့ၣ်လီၤ.
ပာ်ယၤလၢတၢ်ခံးတၢ်နၤအတၢ်စၢဃာ်အပူၤ
ဒီးယမၤယသးလီၤဂာ်ဒ်
ပှၤလၢအသံတ့ၢ်ဃဲးဃဲးအသိးန့ၣ်လီၤ.
4ယအိၣ်လၢတၢ်သးဟးဂီၤဖးဒိၣ်အပူၤအဃိ,
ယအိၣ်ကတဲာ်ကတီၤလံယသးလၢ
ယကဟ့ၣ်လီၤကွံာ်ယသးန့ၣ်လီၤ.
5ယသ့ၣ်နီၣ်ထီၣ်က့ၤမုၢ်နံၤမုၢ်သီလၢ
အပူၤကွံာ်သ့ၣ်တဖၣ်,
ယဆိကမိၣ်ထီၣ်က့ၤတၢ်ဂ့ၢ်လၢနမၤတ့ၢ်ခဲလၢာ်,
ယသးဆိကမိၣ်ထီၣ်က့ၤ
နတၢ်မၤခဲလၢာ်သ့ၣ်တဖၣ်န့ၣ်လီၤ.
6ယယူာ်ထီၣ်ယစုဆူနအိၣ်လၢတၢ်ထုကဖၣ်အပူၤ,
ယသးအံၤသူအသးလၢနၤဒ်
ဟီၣ်ခိၣ်အဃ့အသိးန့ၣ်လီၤ. စ့လၤ
7ယွၤဧၢ, မၤချ့ချ့လၢနကမၤစၢၤယၤန့ၣ်တက့ၢ်.
ယတၢ်မုၢ်လၢ်လၢာ်ကွံာ်လံ.
ဒ်သိးယသုတကဲထီၣ်ဒ်ပှၤလၢအလဲၤလီၤဆူ
တၢ်သံအကီၢ်ပူၤတဂ့ၤဒီး,
ပာ်တဒၢနမဲာ်ဒီးယၤတဂ့ၤ.
8ဒုးသ့ၣ်နီၣ်ယၤလၢနတၢ်အဲၣ်ဂၢၢ်ကျၢၤကိးဂီၤဒဲးတက့ၢ်.
အဂ့ၢ်ဒ်အံၤ, ယသန့ၤယသးလၢနၤလီၤ.
သိၣ်လိယၤလၢကျဲလၢယဂ့ၤပိာ်တဘိန့ၣ်တက့ၢ်.
အဂ့ၢ်ဒ်အံၤ, ယစိာ်ထီၣ်ယသးဆူနအိၣ်လီၤ.
9ယွၤဧၢ, မၤပူၤဖျဲးယၤလၢယဒုၣ်ယဒါတက့ၢ်.
ယဃ့ၢ်ဆူနအိၣ်လၢတၢ်ပူၤဖျဲးအဂီၢ်လီၤ.
10သိၣ်လိယၤဒ်သိးယကမၤတၢ်ဘၣ်နသးတက့ၢ်.
အဂ့ၢ်ဒ်အံၤ, နမ့ၢ်ယကစၢ်ယွၤလီၤ.
မ်နသးလၢအဂ့ၤန့ၣ်ဆှၢယၤလၢကျဲလၢ
အမုာ်အပၢၤန့ၣ်တက့ၢ်.
11ယွၤဧၢ, ပာ်မူယသးလၢနမံၤအဃိန့ၣ်တက့ၢ်.
လၢနတၢ်တီတၢ်လိၤအပူၤန့ၣ်,
ထုးထီၣ်ကွံာ်ယၤလၢတၢ်ကီတၢ်ခဲ
တဖၣ်အပူၤန့ၣ်တက့ၢ်.
12ဒီးလၢနတၢ်အဲၣ်ဂၢၢ်ကျၢၤအဃိန့ၣ်,
ဒီၣ်တဲာ်ကွံာ်ယဒုၣ်ယဒါတဖၣ်,
ဒီးမၤဟးဂီၤကွံာ်ကယဲၢ်ပှၤလၢအမၤအၢယၤ
ခဲလၢာ်န့ၣ်တက့ၢ်.
အဂ့ၢ်ဒ်အံၤ, ယမ့ၢ်နခ့နပှၤလီၤ.
Currently Selected:
စံးထီၣ်ပတြၢၤ 143: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
