လံာ်တၢ်ကူၣ်သ့အတၢ်ကတိၤ 1
1
တၢ်ကူၣ်သ့အတၢ်ကတိၤတဖၣ်အလုၢ်အပှ့ၤ
1အံၣ်စရ့လးအစီၤပၤစီၤဒၤဝံးအဖိခွါစီၤၡလိၤမိၤအတၢ်ကူၣ်သ့ အတၢ်ကတိၤတဖၣ်.
2အအံၤမ့ၢ်တၢ်ကူၣ်သ့အတၢ်ကတိၤတဖၣ်လၢကမၤစၢၤသုလၢသုကသ့ၣ်ညါ တၢ်ကူၣ်သ့ဒီးတၢ်ဟ့ၣ်ကူၣ်လၢအဂ့ၤ, ဒီးနၢ်ပၢၢ်တၢ်ကတိၤလုၢ်ဒိၣ်ပှ့ၤဒိၣ်တဖၣ်လၢအိၣ်ဒီးအခီပညီ အဒိၣ်အယိာ်န့ၣ်လီၤ. 3တၢ်န့ၣ်တဖၣ်သိၣ်လိသုဒ်သိးသုအိၣ်မူလၢတၢ်သူၣ်ဆးသးဆး အပူၤဒ်လဲၣ်ဒ်လဲၣ်ကသ့ဒီးတၢ်ကဘၣ်အိၣ်မူတီတီလိၤလိၤ, စံၣ်ညီၣ်တီတၢ်ဒီးတၢ်တကွၢ်မဲာ်ဘၣ်တၢ်ဒ်လဲၣ်ဒ်လဲၣ်အဂီၢ်န့ၣ် လီၤ. 4တၢ်န့ၣ်တဖၣ်ဒုးကဲထီၣ်ပှၤလၢအတၢ်လဲၤခီဖျိစှၤတဂၤလၢပှၤကူၣ်သ့ဒီးသိၣ်လိပှၤသးစၢ်တဖၣ် ဒ်သိးကဘၣ်အိၣ်လၢအိၣ်ပှဲၤဒီး တၤလၣ်တဖၣ်ဒ်လဲၣ်ဒ်လဲၣ်သ့ဝဲန့ၣ်လီၤ. 5တၢ်ကူၣ်သ့အတၢ်ကတိၤတဖၣ်အံၤမၤအါထီၣ်ပှၤကူၣ်သ့တဖၣ် အတၢ်သ့ၣ်ညါဒီးဟ့ၣ်တၢ်နဲၣ်ကျဲဆူပှၤမၤလိမၤဒိးဘၣ်တၢ်တဖၣ် သ့ဝဲ, 6ဒ်သိးအဝဲသ့ၣ်ကနၢ်ပၢၢ်တၢ်ကူၣ်သ့အတၢ်ကတိၤအခီပညီအဒိၣ် အယိာ်တဖၣ်ဒီးတၢ်ပှိၤပှီၢ်တဖၣ်လၢပှၤကူၣ်သ့တဖၣ်ကတိၤထီၣ်ဝဲ အဂီၢ်န့ၣ်လီၤ.
တၢ်ဟ့ၣ်ကူၣ်ဆူပှၤပိာ်ခွါသးစၢ်တဖၣ်
7ဒ်သိးသုကအိၣ်ဒီးတၢ်ကူၣ်သ့ဒီးအဆိကတၢၢ်သုကဘၣ်ယူးယီၣ် ယွၤန့ၣ်လီၤ. ပှၤဟးဂီၤဖိတဖၣ်တပာ်ကဲတၢ်ကူၣ်သ့ဒီးဂ့ၢ်လိာ် ကမၤလိတၢ်န့ၣ်လီၤ.
8ယဖိခွါဧၢ, ကနၣ်နပၢ်အတၢ်သိၣ်တၢ်သီနၤဒီးလဲၤသဒၣ်နမိၢ် အတၢ်သိၣ်လိနဲၣ်လိတဂ့ၤ. 9အဝဲသ့ၣ်အတၢ်သိၣ်လိကမၤဂ့ၤထီၣ်နသကဲာ်ပဝးဒ်ခိၣ်ကျီၤ အဃံအလၤ, မ့တမ့ၢ်ဒ်ဖဲတပျံၤလၢကမၤဂ့ၤထီၣ်နတၢ်အိၣ်ဖျါ အဂီၢ်အသိးန့ၣ်လီၤ.
10ယဖိခွါဧၢ, ဖဲပှၤတၢ်ဒဲးဘးဖိလ့ပစီနၤဒီးဟ့ၣ်လီၤနသးတဂ့ၤ. 11အဒိအဝဲသ့ၣ်ကစံး, “ဟဲ, ပကလဲၤဆူပှၤတဂၤဂၤလၢပကမၤသံအီၤ အအိၣ်တက့ၢ်. မ်ပကမၤဒၢၣ်ပှၤလၢအတၢ်ကမၣ် တအိၣ်တဖၣ်လၢတၢ်မၤမုာ်ပသးဒၣ်ဝဲအဂီၢ်တက့ၢ်. 12အဝဲသ့ၣ်ကမူဒီးအိၣ်ဆူၣ်အိၣ်ချ့ဝဲဖဲပထံၣ်အီၤအခါ, ဘၣ်ဆၣ်ကသံဝဲဖဲပမၤဒၢၣ်ကွံာ်အဝဲသ့ၣ်ဝံၤဝဲန့ၣ်လီၤ. 13ပကဃုထံၣ်ကယဲၢ်တၢ်ထူးတၢ်တီၤအကလုာ်ကလုာ်ဒီးမၤပှဲၤပဟံၣ် လၢတၢ်ဂုာ်န့ၢ်ဆူၣ်တဖၣ်န့ၣ်လီၤ. 14ဟဲမၤသကိးတၢ်ဒီးပှၤဒီးပကနီၤလိာ်ပသးလၢတၢ်လၢပဟုၣ်န့ၢ် တဖၣ်န့ၤလီၤ.”
15လဲၤဃုာ်တၢ်ဒီးပှၤဒ်န့ၣ်အသိးတဖၣ်တဂ့ၤ. ယဖိခွါဧၢ, အိၣ်ယံၤဒီးအဝဲသ့ၣ်တက့ၢ်. 16အဂ့ၢ်ဒ်အံၤ, အဝဲသ့ၣ်တဖၣ်အခီၣ်ဃ့ၢ်ဝဲချ့ချ့ကလဲာ်ဆူတၢ် အၢတၢ်သီအပူၤလီၤ. ဒီးအိၣ်ကတဲာ်ကတီၤအသးထီဘိလၢကမၤသံတၢ်အဂီၢ်လီၤ. 17ဖဲထိၣ်လၢနသးအိၣ်ဖီၣ်အီၤကွၢ်နၤအဖၢမုၢ်န့ၣ်, နပာ်လီၤပှာ်ဧိၤစၤဧိၤကလီကလီလီၤ. 18ဘၣ်ဆၣ်ဒီးပှၤဒ်အံၤတဖၣ်ပာ်လီၤထုလၢအဂီၢ်ဒၣ်ဝဲ, ထုလၢအဝဲသ့ၣ်ကသံလၢအပူၤန့ၣ်လီၤ. 19တၢ်တမျိၤတမျာ်တၢ်ထီဘိန့ၣ်, ဃ့တမျာ်အသးသမူဒီးအဝဲအံၤမ့ၢ် တၢ်လၢအမၤအသးဒီးပှၤတဂၤဂ့ၤတဂၤဂ့ၤလၢအအိၣ်မူလၢ တၢ်မၤအၢမၤသီအပူၤန့ၣ်လီၤ.
တၢ်ကူၣ်သ့ကိးထီၣ်
20ဒိကနၣ်တက့ၢ်. တၢ်ကူၣ်သ့ကိးထီၣ်ဝဲလၢကျဲမုၢ်ခိၣ်ဒီးလၢတၢ် ဆါတၢ်ပှ့ၤအလီၢ်တဖၣ်အပူၤ, 21ကိးထီၣ်ဝဲဖးဒိၣ်လၢဝ့ၢ်အတြဲၤတဖၣ်ဒီးတပူၤလၢ်လၢ်ဖဲပှၤဂီၢ် မုၢ်ပာ်ဖှိၣ်သးအလီၢ်န့ၣ်လီၤ.
22“ပှၤဟးဂီၤဖိသ့ၣ်ဧၢ, မ့ၢ်သုအဲၣ်ဒိးဟးဂီၤဒံးဆံးယံာ်လဲၣ်. သုကမုာ်လၤသးခုလၢတၢ်မၤတရီတပါတၢ်သ့ၣ်ညါဆံးယံာ်လဲၣ်. မ့ၢ်သုတမၤလိလၢၤတၢ်နီတစုဘၣ်ဧါ. 23ဖဲယသိၣ်ဃီၣ်သုဒီးဒိကနၣ်တက့ၢ်. ယကဟ့ၣ်သုတၢ်ဟ့ၣ်ကူၣ် အဂ့ၤဒီးနီၤဟ့ၣ်သုလၢယတၢ်သ့ၣ်ညါလီၤ. 24ယကိးတ့ၢ်သုဒီးကွဲသုလၢသုကဟဲ, ဘၣ်ဆၣ်သုတဒိကနၣ်ဘၣ်. သုတကနၣ်ဃုာ်ယၤဘၣ်. 25သုညိကွံာ်တ့ၢ်ယတၢ်ဟ့ၣ်ကူၣ်ခဲလၢာ်, ဒီးယကဘှီဂ့ၤဘှီဘၣ်သု န့ၣ်သုတသူၣ်အိၣ်သးအိၣ်ပျဲယၤဘၣ်. 26သတးဒီးဖဲသုဘၣ်တၢ်ကီတၢ်ခဲဒီးယကနံၤဘၣ်ဖၣ်လဲသုလီၤ. ယကမၤကလိာ်ကလာ်သု, ဖဲတၢ်မၤပျံၤမၤဖုးဟဲဘၣ်သု, 27ဖဲအဟဲလီၤဘၣ်သုဒ်ကလံၤမုၢ်ဖးဒိၣ်လၢအဟဲစိာ်ဝဲတၢ်ကီတၢ်ခဲ အကလံၤဆူၣ်ဒီးဖဲသုအိၣ်လၢတၢ်ဘၣ်ဒိဘၣ်ထံးဒီးတၢ်နးတၢ်ဖှီၣ် အပူၤန့ၣ်လီၤ. 28တုၤနုၤတစုသုကကိးထီၣ်တၢ်ကူၣ်သ့, ဘၣ်ဆၣ်ဒီးယတစံးဆၢတၢ်ဘၣ်. သုကဃုယၤလၢတၢ်လီၢ်ကိးပူၤဒဲး, ဘၣ်ဆၣ်ဒီးသုတထံၣ်ဘၣ်ယၤဘၣ်. 29သုတလိၣ်ဘၣ်တ့ၢ်တၢ်သ့ၣ်ညါလၢသုကသူအီၤဘၣ်, ဒီးတၢ်စူၢ်ယွၤန့ၣ်သုဂ့ၢ်လိာ်တ့ၢ်တဘိယူၢ်ဃီလီၤ. 30သုတသးလီတ့ၢ်ယတၢ်ဟ့ၣ်ကူၣ်နီတစုဒီးတပာ်ကဲတ့ၢ်ယတၢ်ဘှီဂ့ၤ ဘှီဘၣ်သုနီတမံၤဘၣ်န့ၣ်လီၤ. 31သတးဒီး, သုကဒိးန့ၢ်တၢ်လၢအကြၢးဒီးသု, ဒီးသုတၢ်မၤဒၣ်ဝဲတဖၣ်ကမၤဆူးမၤဆါသုလီၤ. 32ပှၤလၢအတၢ်လဲၤခီဖျိစှၤတဖၣ်သံဝဲလီၤ. အဂ့ၢ်ဒ်အံၤ, အဝဲသ့ၣ်ဂ့ၢ်လိာ်တၢ်ကူၣ်သ့အဃိန့ၣ်လီၤ. ပှၤအသးတဆးတဖၣ်ဘၣ်တၢ်မၤဟးဂီၤအီၤလၢအတၢ်သးအိၣ် သးစဲတအိၣ်ဒၣ်ဝဲအဃိလီၤ. 33ဘၣ်ဆၣ်ဒီးပှၤလၢအဒိကနၣ်ယကလုၢ်န့ၣ်, ကအိၣ်ဒီးတၢ်ဘီၣ်ထီၣ်ညီ ထီၣ်လီၤ. အဝဲကအိၣ်ဒီးသးအတၢ်ဃူတၢ်ဖိးဒီးကဘၣ်ပျံၤတၢ်အဂ့ၢ်အကျိၤ တအိၣ်ဘၣ်ဒီးအီၤနီတမံၤဘၣ်.”
Currently Selected:
လံာ်တၢ်ကူၣ်သ့အတၢ်ကတိၤ 1: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
