Psalm 86
86
1Een Jebäd. Von David.
Neaj, Har, dien Ua! Erhia mie, dan ekj sie älent un oam!
2Bewoa miene Seel, dan ekj sie fromm; rad du, mien Gott, dienen Kjnajcht, dee opp die vetrut!
3Sie mie jnädich, Har, dan no die roop ekj däm gaunzen Dach!
4Moak de Seel von dienem Kjnajcht froo! Dan no die, Har, erhäw ekj miene Seel!
5Dan du, Har, best goot un toom Vejäwen reed, un groot aun Jnod jäajen aule, dee die aunroopen.
6Nemm too Uaren, Har mien Jebäd, un horch oppe Stemm en miene Bedd!
7Aum Dach miene Noot woa ekj die aunroopen, dan du woascht mie erhieren.
8Kjeena es aus du, Har, unja de Jetta, un nuscht es diene Woakjen to vejlikjen.
9Aule Velkja, dee du jemoakt hast, woaren komen un ver die aunbäden, Har, un dienen Nomen veharlichen (ieren).
10Dan du best groot un deist Wunda, du best Gott, du auleen.
11Lia mie, Har, dienen Wajch: Ekj woa en diene Woarheit waundlen; neij mien Hoat dienen Nomen too ferchten.
12Ekj well die danken, Har, mien Gott, met mienem gaunzem Hoaten, un dienen Nomen eewich veharlichen.
13Dan diene Jnod es groot jäajen mie, un du hast miene Seel utem unjaschtem Scheol jerat.
14Gott, Frajche sent jäajen mie oppjestonen, un de Jewault doonende Schoa tracht no mienem Läwen! Un see ha die nich ver sikj jestalt.
15Oba du, Har, best een Gott (El), boarmhoatich un jnädich, langsom toom Oaja un groot aun Jnod un Woarheit.
16Drei die no mie un sie mie jnädich! Jeff dienem Kjnajcht diene Krauft un rad däm Sän von diene Deenstmejal!
17Erwies mie een Tieekjen toom Goodem, daut miene Haussa daut seenen un beschämt woaren, wiels du, Har, mie jeholpen un mie jetreestet hast.
Currently Selected:
Psalm 86: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
