Psalm 69
69
1Däm Väasenja, no Schoschanim. Von David.
2Rad mie, oo Gott, dan de Wota sent bat aun de Seel jekomen!
3Ekj sie em deepen Modd vesunken, un kjeen Grunt es doa; em deepen Wota sie ekj jekomen, un de Stroom äwaschwamt mie.
4Ekj sie meed vom Roopen, mien Hauls es entzindet; miene Uagen sent dieslich, vom luaren opp mienem Gott.
5Mea aus de Hoa opp mienem Haupt sent dee, dee onen Uasoak mie haussen; majchtich sent miene Vetilja, dee onen Grunt mie fiend sent; waut ekj nich jeraupt ha, mott ekj (betolen) trigj jäwen.
6Du, oo Gott, weetst om miene Noaheit, un mien Vegonen es die nich veborjen.
7Lot nich derch mie beschämt woaren, dee opp die hopen, Har, Gott de Häaschoa! Lot nich derch mie too Schaund woaren, dee die sieekjen, Gott Israels!
8Dan dienthaulwen droag ekj Schmach, haft Schaund mien Aunjesecht bedakjt.
9Miene Breeda sie ekj framd jeworden, un de Säns miene Mutta sie ekj een Onbekaunda jeworden.
10Dan de Iewa om dien Hus haft mie vetäat, un de Veachtunge von dän, dee die veachten, sent opp mie jefollen.
11Aus ekj hield, un miene Seel aum Fausten wia, doa wort ekj toom Spiet; 12aus ekj mie en Sackkjleet auntrock, doa wort ekj an toom Sprechwuat.
13Dee em Dooa setten, räden äwa mie, un ekj sie daut Seidenspell de Drinkja.
14Oba ekj, mien Jebäd es to die, Har, too aunjenämen Tiet. Oo Gott, no diene groote Jnod, erhia mie no de Woarheit von dienem Heil
15Rad mie ut däm Modd, daut ekj nich vesinkj! Lot mie jerat woaren von miene Haussa un ut däm deepem Wota.
16Lot de Wotastreem mie nich wajch speelen, un daut Deepe mie nich veschlinjen; un lot däm Borm nich äa Mul äwa mie veschluten.
17Auntwuad mie, Har dan goot es diene Jnod; drei die no mie no diene groote Erboarmungen.
18Un vestäakj dien Aunjesecht nich fa dienem Kjnajcht, dan ekj sie bedrenjt; auntwuad mie boolt!
19Noda die miene Seel, erlees äa; moak mie frie, om miene Fiend äat haulwen!
20Du kjanst miene Schmach un miene Schaund un mien Spott; ver die sent aule miene Bedrenja.
21Schmach haft mien Hoat jebroaken, un ekj sie vetwiewelt; un ekj ha opp Metleet jehopt, un doa wia kjeent, un opp Treesta, un ekj ha kjeene jefungen.
22Un see jeewen mie en mienem Äten Gaul, un en mienem Darscht drenjte see mie met Ädikj.
23Äa Desch woat ver an too ne Schlenj, un an, de Sorjloose, too ne Faul!
24Lot äare Uagen dunkel woaren, daut see nich seenen; un lot äare Hoften bestendich wanken!
25Schedd dien Oaja äwa an ut, un de Gluaje von dienem Oaja errieekjt an!
26Vewiest es äa Zeltloaga, en äare Zelten es kjeen Bewona!
27Dan dee du jeschloagen hast, ha see vefolcht, un von de Weedoag diene Vewundne vetalen see.
28Doo Schult too äare Schult, un lot an nich too diene Jerajchtichkjeit komen!
29Lot an ut däm Läwensbuak utjelascht woaren un nich met de Jerajchte enjeschräwen woaren!
30Oba ekj sie älent, un mie deit wee; dien Heil, oo Gott, sat mie en Sechaheit.
31Riemen well ekj däm Nomen Gottes em Leet, un am erhäwen (ieren) met Dank.
32Un daut woat däm Harn wooljefaulja sennen aus een Boll, een junga Boll met Hieena un jespoolde Heefta.
33De Saunftmootje woaren daut seenen, see woaren sikj freien; jie, dee jie Gott sieekjen, jun Hoat woat läwen!
34Dan de Har hieet opp de Oame, un siene Jefangne veacht hee nich.
35Am sellen lowen Himmel un Ieed, un Mäa un aules, waut sikj en an bewäacht!
36Dan Gott woat Zion raden un Städa von Juda buen; un see woaren doa selfst wonen un dee besetten.
37Un de Somen von siene Deena woaren daut oawen; un dee sienen Nomen leewen, woaren doabennen wonen.
Currently Selected:
Psalm 69: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
