Psalm 44
44
1Däm Väasenja. Von de Säns Korah, Een Maskil (Belierunk).
2Gott, met onse Uaren ha wie jehieet, onse Vodasch ha ons vetalt daut groote Dooden, dee du jewirkjt hast en äare Doag, enne Doag ver de oole Tiet.
3Du, met diene Haunt hast du Velkja vedräwe, un an (onse Vodasch) hast du jeplaunt, Velkja hast du venicht, un an (onse Vodasch) hast du vebreed.
4Dan nich derch äa Schwieet ha see daut Launt jeoarwen, un nich äa Oarm haft an jerat; sonda diene Rajchte un dien Oarm un daut Licht von dienem Aunjesecht, wiels du Wooljefaulen aun an haudst.
5Du selfst best mien Kjennich {Ps.102,28}, oo Gott; jebeed (jeff) fa Jakob de Help.
6Derch die woa wie onse Bedrenja vesteeten; derch dienen Nomen woa wie veklunjen, dee jäajen ons oppstonen.
7Dan nich opp mien Boagen vetruen ekj, un mien Schwieet woat mie nich raden.
8Dan du radst ons von onse Bedrenja, un onse Haussa hast du beschämt.
9En Gott riem wie onst däm gaunzen Dach, un dienen Nomen woa wie eewich lowen. (Sela)
10Doch du hast ons vestat un to Schaund jemoakt, un jinjst nich ut met onsem Häa.
11Du leetst ons trigjtrakjen fa onse Bedrenja, un onse Haussa ha fa sikj jeplindat.
12Du jeefst ons han aus Schlachtschop, un unja de Velkja hast du ons vestreit.
13Du vekoffst dien Volkj om een Jerinjet un hast äarem Pries nich huach jestalt.
14Du muakst ons too Schaund fa onse Nobasch, toom Spott un Schellen fa dän, dee ons omjäwen.
15Du muakst ons toom Sprechwuat unja de Velkja, toom Kopp schedren unja de Heiden.
16Däm gaunzen Dach es miene Schmach ver mie, un de Schaund bedakjt mien Aunjesecht,
17wäajen de Stemm de Spata un Lestara, wäajen de Fiend un de Rachjierichen.
18Dit aules es äwa ons jekomen, un wie ha die nich vejäten, noch faulsch jehaundelt jäajen dienen Bunt.
19Ons Hoat es nich trigj jegonen, un onse Schräd sent nich aufjeboagen von dienem Wajch;
20daut du ons jeschloagen hast aum Uat de Schakale, un ons bedakjt hast met däm Doodesschauten.
21Wan wie däm Nomen von onsem Gott vejäten hauden un onse Henj no eenem framden Gott (El) utjestrakjt hauden, 22wudd Gott daut nich erforschen? Hee kjant de Jeheemnisen em Hoat.
23Dan om dient haulwen woa wie däm gaunzen Dach omjebrocht, aus Schlachtschop sent wie jeacht.
24Wuak opp! Wuarom schlapst du, Har? Wuak opp! Velot ons nich opp emma!
25Wuarom vestakjst du dien Aunjesecht, vejatst ons Älent un onse Bedrekjung?
26Dan onse Seel es en däm Stoff jebekjt, ons Lief backt aune Ieed.
27Sto opp, ons too halpen, un erlees ons opp Grunt diene Jnod!
Currently Selected:
Psalm 44: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
