Psalm 148
148
1Loft däm Harn! Loft däm Harn von däm Himmel häa; loft am huachbowen!
2Loft am, aul siene Enjel; loft am, aule siene Häaschoa!
3Loft am, Sonn un Mon; loft am, aul jie schienennde Stierns!
4Loft am, jie Himmel de Himmel, un jie Wotasch, dee jie äwa de Himmel sent!
5Lowen sellen see däm Nomen Gottes! Dan hee jeboot, un see wieren jeschaufen; 6un hee stald an han fa emma un eewich; hee gauf an eene Sazunk, un see woaren dee nich äwaschräden.
7Loft däm Harn vonne Ieed häa, jie Ojjeheia em Mäa un aule Deepe!
8Fia un Hoagel, Schnee un Näwel, du Stormwint, de du sien Wuat utrechst; 9jie Boaj un aule Aunboaj, Fruchtbeem un aule Zeeda; 10wille Tieren un aulet Vee, krupende Tieren un flieejende Väajel! 11Jie Kjennichs de Ieed un aule Velkja, jie Ferschten un aule Rechta de Ieed; 12jie Jinjlinje un uk jie Junkfrues, jie Oole met de Junge!
13Lowen sell jie däm Nomen Gottes! Dan sien Nomen es huach jeieet, hee aulen; siene Majestät es äwa de Ieed un Himmel.
14Un hee haft jehowen daut Huarn von sienem Volkj, däm Riem aul siene Fromme, de Kjinja Israel, vom Volkj, daut am ieejen es. Loft däm Harn!
Currently Selected:
Psalm 148: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
