Psalm 118
118
1Dankt däm Harn! Dan hee es goot, dan siene Jnod es eewich.
2Doch daut sajcht Israel: Dan siene Jnod es eewich.
3Doch daut sajcht daut Hus Aaron: Dan siene Jnod es eewich.
4Doch daut sajen, dee däm Harn ferchten: Dan siene Jnod es eewich.
5Ut de Bedrenkjnis roopt ekj no Jah (Gott); Jah erhieed mie un sad mie en eenen wieden Rum.
6De Har es fa mie, ekj woa mie nich enjsten; waut kaun de Mensch mie doonen?
7De Har es fa mie unja miene Helpa, un ekj woa miene Lost seenen aun miene Haussa.
8Daut es bäta, oppem Harn too vetruen, aus sikj opp de Menschen too veloten.
9Daut es bäta, oppem Harn too vetruen, aus sikj opp Ferschten too veloten.
10Aule Nazionen hauden mie omrinjt; jewess, em Nomen Gottes vetiljd ekj an.
11See ha mie omrinjt, jo, mie omrinjt; jewess, em Nomen Gottes vetilj ekj an.
12See ha mie omrinjt aus Biee; see sent utjelascht aus Stachelfia; jewess, em Nomen Gottes vetiljd ekj an.
13Du hast mie hoat jestat, om mie toom Faul to brinjen; oba de Har haft mie jeholpen.
14Miene Krauft un mien Jesank es Jah, un hee es mie too Radunk jeworden.
15De Jubel Stemm un de Radunk es enne Zelten de Jerajchte; de Rajchte Gottes deit Jewaultjet.
16De Rajchte Gottes es erhowen, de Rajchte Gottes deit Majchtjet.
17Ekj woa nich stoawen, sonda läwen un de Doten (Woakjen) Jahs vetalen.
18Jah haft mie hoat jestroft, oba däm Doot haft hee mie nich äwajäft.
19Moakt mie de Dooasch de Jerajchtichkjeit op: Ekj well derch dee nengonen, Jah well ekj danken.
20Dit es daut Dooa Gottes: De Jerajchte woaren doaderch nengonen.
21Ekj well die danken, dan du hast mie erhieet un best mie too Radunk jeworden.
22Dee Steen, däm de Bulied veschmäten ha, es toom Akjsteen jeworden.
23Von däm Harn es dit passieet; wundaboa es daut en onse Uagen.
24Dit es de Dach däm de Har jemoakt haft; lot ons jublen un lot ons en am froo sennen.
25Ach, Har, rad doch! Ach, Har, jeff doch Jelinje!
26Jesäajent es, dee doa kjemt em Nomen Gottes! Von däm Hus Gottes ut ha wie junt jesäajent.
27Har es Gott (El), un hee haft ons Licht jejäft; binjt daut Fastopfa met Strenj bat aun (ooda brinjt daut bat) de Hieena vom Aultoa.
28Du best mien Gott (El), un ekj well die danken; mien Gott, ekj well die erhäwen.
29Dankt däm Harn! Dan hee es goot, dan siene Jnod es eewich.
Currently Selected:
Psalm 118: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
