Spricha 21
21
1 Aus Wotastreem es eenem Kjennich sien Hoat, enne Haunt Gottes; wuahan emma hee well, neijt hee daut.
2Jiedra Wajch von eenem Maun es jlikj en siene Uagen, oba de Har prooft de Hoaten.
3Jerajchtichkjeit un Rajcht eewen es däm Harn aunjenäma aus Opfa.
4Stolte Uagen un Huachmoot em Hoat, es de Laump de Gottloose, sent Sinden.
5De Jedanken de Pienje fieren blooss toom Äwafluss; un jiedra, dee haustich es - daut es blooss toom Mangel.
6Jewennen von Schaza derch Läajes Tung es vestowna Donst; soone sieekjen däm Doot.
7De Jewaultdot de Gottloose ritt an wajch, dan Rajcht too eewen wieren see sikj.
8Wäa schultbeloden es, mott kromme Wäaj gonen; oba däm Reinen, sien Doonen es jlikj.
9Bäta es daut, opp eene Dakakj too wonen, aus eene zenkjische Fru un een jemeensaumet Hus.
10De Seel de Gottloose wenscht daut Beese: Sien Näajsta finjt kjeene Jnod en siene Uagen.
11Wan maun däm Spata bestroft, soo woat de Eenfeltja weis; un wan maun däm Weisen belieet, soo nemt hee Erkjantnis aun. 12Een Jerajchta haft acht opp daut Hus de Gottloose, hee schmitt de Gottloose em Onjlekj.
13Wäa sien Ua vestopt verem Schrieen de Oame, uk hee woat roopen un nich erhieet woaren.
14Eene Gow em Vestoaknem dreit däm Oaja auf, un een Jeschenkj em Bossem däm haftjen Groll.
15Däm Jerajchten es daut eene Freid, Rajcht too eewen; oba dän, dee Fräfel doonen, een Schrakj.
16Een Mensch, dee von däm Wajch de Ensecht auferrt, woat ruen enne Vesaumlunk de Schautes (Doodje).
17Wäa Freid leeft, woat een Maun von Mangel woaren; wäa Wien un Eelj leeft, woat nich rikj.
18De Gottloosa es een Leesjelt fa däm Jerajchten, un de Truloosa kjemt aun de Städ de Opprechtje.
19Bäta es daut, en eenem Wiestelaunt too wonen, aus eene zenkjische Fru un Oaja.
20Een kostboara Schauz un Eelj es enne Wonunk de Weise, oba een tiericha Mensch veschlinjt daut.
21Wäa de Jerajchtichkjeit un daut Goode nojajcht, woat Läwen finjen, Jerajchtichkjeit un Iea.
22De Weisa jewent de Heldenstaut un schmitt rauf äa faustet Vetruen.
23Wäa sien Mul un siene Tung bewoat, bewoat siene Seel fa Bedrenkjnisen.
24De Äwamootja, Stolta - Spata es sien Nomen, haundelt met vemätnem Äwamoot.
25De Bejia vom Fulen brinjt am däm Doot, dan siene Henj wellen nich oabeiden.
26Däm gaunzen Dach wenscht un velangt hee, oba de Jerajchta jeft un helt nich trigj.
27Daut Opfa de Gottloose es een Groll; wooväl mea, wan hee daut en beese Aufsecht brinjt.
28Eene Läajestung woat omkomen; oba een Maun, dee doa hieet, doaf emma wada räden.
29Een gottloosa Maun wiest een trotzjet Jesecht; oba de Opprechtja, hee moakjt opp sienen Wajch.
30Doa es kjeene Weisheit un kjeene Ensecht un kjeen Rot, däm Harn jäajenäwa.
31Daut Pieet woat reedjemoakt fa däm Dach de Schlacht, oba de Radinj es de Har.
Currently Selected:
Spricha 21: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
