4. Mose 28
28
Doages-Opfa, Opfa aum Sabat-Niemon, Passa un aum Fast de Ieeschte Frucht
1Un Gott (Jahwe) räd too Moses un säd: 2Befäl de Kjinja Israel un saj to an: Miene Opfagow, mien Broot von mienem Fiaopfa, mie toom leeftoljen Jeroch, sell jie hoolen to siene Tiet, daut jie mie daut opfren. 3Un saj to an: Dit es daut Fiaopfa, daut jie däm Harn brinjen sellen; twee eenjoasche Lama onen Fäla, jieda Dach, aus bestendjet Brauntopfa. 4Daut eene Laum saust du Zemorjes opfren, un daut tweede Laum saust tweschen de beid Owents opfren; 5un toom Speisopfa een 10-del Efa fienet Mäl, jemischt met eenem vieedel Hin jestaumtet Eelj, 6(een bestendjet Brauntopfa, daut aum Boajch Sinai enjesat wort, toom leeftoljen Jeroch, een Fiaopfa däm Harn;) 7un sien Drinkjopfa, een vieedel Hin to däm eenem Laum; em Heilichtum saust du daut Drinkjopfa von stoakjet Jedrenkj däm Harn opfren. 8Un daut tweede Laum saust du tweschen de beid Owents opfren; aus daut Speisopfa Zemorjes un sien Drinkjopfa, soo saust du to disem opfren, een Fiaopfa leeftoljen Jeroch däm Harn. 9Un aum Sabatdoag twee eenjoasche Lama onen Fäla, un aus Speisopfa twee tieendel fienet Mäl, jemischt met Eelj, un sien Drinkjopfa. 10Daut es daut Brauntopfa fa jiedren Sabat, buta däm bestendjen Brauntopfa un sienem Drinkjopfa. 11Un aum Aunfank june Moonaten sell jie däm Harn een Brauntopfa brinjen; twee junge Bolles un eenen Bock, säwen eenjoasche Lama onen Fäla; 12un to jiedrem Boll dree tieendel fienet Mäl, jemischt met Eelj, aus Speisopfa; un to däm eenen Bock twee tieendel fienet Mäl, jemischt met Eelj, aus Speisopfa; 13un to jiedrem Laum een tieendel fienet Mäl, jemischt met Eelj, aus Speisopfa. Daut es een Brauntopfa, een leeftolja Jeroch, een Fiaopfa däm Harn. 14Un äare Drinkjopfa; een haulwet Hin Wien saul too eenen jungen Boll sennen, un een dreddel Hin to eenem Bock, un een vieedel Hin to eenem Laum. Daut es daut Moonatliche Brauntopfa en jiedrem Moonat, no de Moonaten vom Joa. 15Un een Kosenbock toom Sindopfa däm Harn saul biem bestendjen Brauntopfa un sienem Drinkjopfa jeopfat woaren.
16Un em ieeschten Moonat, aum 14-den Dach em Moonat, es Passa däm Harn. 17Un aum 15-den Dach en disem Moonat es daut Fast; säwen Doag saul onjesuadet jejäten woaren. 18Aum ieeschten Dach saul eene heilje Vesaumlunk sennen; kjeene Deenstoabeit sell jie doonen. 19Un jie sellen däm Harn een Fiaopfa, een Brauntopfa brinjen, twee junge Bolles un eenen Bock un säwen eenjoasche Lama; onen Fäla sellen see sennen; 20un äa Speisopfa, fienet Mäl, jemischt met Eelj; dree tieendel sell jie opfren to eenem Boll, un twee tieendel toom Bock; 21een tieendel saust du opfren too jiedrem Laum, to de säwen Lama; 22un 1-en Kosebock aus Sindopfa, om Veseenunk fa junt to doonen. 23Buta däm Morjen-Brauntopfa, daut toom bestendjen Brauntopfa es, daut sell jie opfren. 24Daut sell jie jieda Dach opfren, säwen Doag lank, aus Broot to eenem Fiaopfa leeftoljen Jeroch däm Harn; biem bestendjen Brauntopfa un sienem Drinkjopfa saul daut jeopfat woaren. 25Un aum säwenden Dach sell jie eene Heilje Vesaumlunk hoolen; kjeene Deenstoabeit sell jie doonen.
26Un aum Dach de Ieeschte Frucht, wan jie däm Harn een nieet Speisopfa brinjen, aun junem Wäakjenfast sell jie eene heilje Vesaumlunk hoolen; kjeene Deenstoabeit sell jie doonen. 27Un jie sellen een Brauntopfa brinjen toom leeftoljen Jeroch däm Harn; twee junge Bolles, eenen Bock, säwen eenjoasche Lama; 28un äa Speisopfa, fienet Mäl, jemischt met Eelj; dree tieendel too jiedrem Boll, twee tieendel to däm eenen Bock, 29een tieendel too jiedrem Laum, to de säwen Lama; 30un eenen Kosenbock, om Veseenunk fa junt to doonen. 31Butrem bestendjen Brauntopfa un sienem Speisopfa sell jie an opfren - onen Fäla sellen see sennen, doatoo june Drinkjopfa.
Currently Selected:
4. Mose 28: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
