4. Mose 12
12
Aaron un Mirjam stonen jäajen Moses opp
1Un Mirjam un Aaron räden jäajen Moses wäajen dee kuschitische Fru, daut hee jenomen haud; dan hee haud eene kuschitische Fru jenomen. 2Un see säden: Haft de Har blooss to die auleen jerät? Haft hee nich uk met ons jerät? Un de Har hieed daut. 3Oba de Maun Moses wia sea saunftmootich, mea aus aule Menschen, dee oppem Ieedboddem wieren.
4Doa säd de Har plazlich too Moses un Aaron un to Mirjam: Got rut, jie 3, nom Zelt de Bejäajnunk! Un see jinjen rut, dee 3. 5Un de Har kaum en däm Wolkjestenda rauf un stunt aum Engank vom Zelt; un hee roopt Aaron un Mirjam, un de beid jinjen rut. 6Un hee säd: Hieet doch miene Wieed! Wan een Profeet unja junt es, däm well ekj, de Har, en eenem Jesecht mie too erkjanen jäwen, en eenem Droom well ekj met am räden. 7Nich aulsoo mien Kjnajcht Moses. Hee es tru en mienem gaunzen Hus; 8met am räd ekj von Mul too Mul, un dietlich un nich en Rotsel, un daut Bilt Gottes sitt hee. Un wuarom ha jie junt nich jefercht, jäajen mienen Kjnajcht, jäajen Moses, to räden? 9Un de Oaja Gottes flaumd jäajen an opp, un hee jinkj wajch. 10Un de Wolkj jinkj vom Zelt wajch, un kjikj, Mirjam wia utsauzich aus Schnee; un Aaron dreid sikj no Mirjam, un kjikj, see wia utsauzich. 11Doa säd Aaron too Moses: Ach, mien Har! Laj doch nich de Sind opp ons, derch dee wie onweis jehaundelt un ons vesindicht ha! 12Mucht see doch nich aus een doodjet Kjint sennen, dee äa Fleesch, wan daut ut sienem Muttalief kjemt, aul haulf vewest es! 13Un Moses schrieech to däm Harn un säd: Oo Gott, ekj bedd die, heel ar doch! 14Un Gott (Jahwe) räd too Moses: Haud äa Voda ar veleicht em Aunjesecht jespäajen, sull see sikj nich säwen Doag lank schämen? See saul säwen Doag butrem Loaga enjeschloten woaren, un nodäm mucht see wada oppjenomen woaren. 15Un Mirjam wort säwen Doag butrem Loaga enjeschloten; un daut Volkj jinkj nich wieda, bat Mirjam wada oppjenomen wia. 16Oba nodäm jinkj daut Volkj von Hazerot un see loagaden sikj enne Wieste Paran.
Currently Selected:
4. Mose 12: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
