4. Mose 10
10
Selwane Trompeeten
1Un de Har räd too Moses un säd: 2Moak die 2 Trompeeten von Selwa; en Hauntoabeit saust du dee moaken; un dee sellen die toom tooproopen de Jemeent un toom Loaga aufbräakjen deenen. 3Un blost maun en beid, soo saul sikj de gaunze Jemeent no die vesaumlen aun däm Engank vom Zelt de Bejäajnunk. 4Un blost maun en eene, soo sellen sikj de Ferschten no die vesaumlen, de Heipta de 1 000 Israels. 5Un blos jie Loarm, soo sellen de Loagasch aufbräakjen, dee jäajen Oosten loagren; 6un blos jie Loarm toom tweeden Mol, soo sellen de Loagasch aufbräakjen, de jäajen Sieden loagren; too äarem wiedagonen sellen see Loarm blosen. 7Oba om de Vesaumlunk too vesaumlen, sell jie blosen oba nich Loarm blosen. 8Un Aaron siene Säns, de Priesta, sellen en de Trompeeten blosen. Un see sellen junt to eene eewje Sazunk sennen bie june Jeschlajchta. 9Un wan jie en junem Launt en eenem Striet gonen jäajen däm Bedrenja, dee junt bedrenjt, soo sell jie met de Trompeeten Loarm blosen; un daut woat aun junt jedocht woaren ver däm Harn, junem Gott, un jie woaren von junem Fiend jerat woaren. 10Un aun june frooe Doag un aun june Faste un aun june Niemonen, bie june Brauntopfa un bie june Dankopfa - doa sell jie en de Trompeeten blosen; en dee sellen junt toom Jedajchnis ver junem Gott sennen. Ekj sie de HAR, jun Gott.
Israel jinkj von Sinai wajch
11Un daut passieed aum tweeden Joa, em tweeden Moonat, aum 20-sten vom Moonat, doa hoof sikj de Wolkj von de Zeichniswonunk. 12Un de Kjinja Israel jinjen no äare Rieej ut de Wieste Sinai; un de Wolkj leet sikj rauf enne Wieste Paran. 13Un see jinjen toom ieeschten Mol nom Befäl Gottes derch Moses.
14Un de Loagaflag de Kjinja Juda jinkj aus Ieeschte met äarem Häa loos; un äwa sien Häa wia Nachschon, Amminadab sien Sän. 15Un äwa daut Häa vom Staum de Kjinja Isachar wäa Nethaneel, Zuar sien Sän; 16un äwa daut Häa vom Staum de Kjinja Sebulon wäa Eliab, Helon sien Sän. 17Un de Wonunk wort uteneen jenomen, un de Säns Gerson jinjen loos un de Säns Merari, dee de Wonunk druagen.
18Un de Loagaflag Ruben jinkj met sienem Häa loos; un äwa sien Häa wia Elizur, Schedeur sien Sän. 19Un äwa daut Häa vom Staum de Kjinja Simeon wia Schelumiel, Zurischaddai sien Sän; 20un äwa daut Häa vom Staum de Kjinja Gad wia Eljasaf, Deguel sien Sän. 21Un de Kehatita jinjen loos, dee daut Heilichtum druagen; un jane rechten de Wonunk opp, bat dise kaumen.
22Un de Loagaflag de Kjinja Efraim jinkj met äarem Häa loos; un äwa sien Häa wia Elischama, Ammihud sien Sän. 23Un äwa daut Häa de Kjinja Manasse wia Gamliel, Pedazur sien Sän; 24un äwa daut Häa de Kjinja Benjamin wia Abidan, Gideoni sien Sän.
25Un de Loagaflag de Kjinja Dan, dee de Latste von aule Loaga jinjen; un äwa sien Häa wia Achiesa, Ammischaddai sien Sän. 26Un äwa daut Häa vom Staum de Kjinja Aser wia Pagiel, Okran sien Sän; 27un äwa daut Häa vom Staum de Kjinja Naftali wia Achira, Enan sien Sän. 28Dit wia de Räjordninj de Kjinja Israel no äare Häasch; un soo jinjen see loos.
29Un Moses säd to sienem Schwoaga Hobab, Reghuel sienem Sän, däm Medianita: Wie gonen nodäm Uat, von däm de Har jesajcht haft: Ekj well junt däm jäwen. Go met ons, soo woa wie die goodet doonen; dan de Har haft Goodet äwa Israel jerät. 30Un hee säd to am: Ekj well nich met gonen, sonda en mien Launt un no mienem Frintschoft well ekj gonen. 31Un hee säd: Velot ons doch nich! Dan du weetst, woa wie enne Wieste loagren sellen; un du woascht ons Uag sennen. 32Un daut saul passieren, wan du met onst jeist, un ons daut Goode passieet, daut de Har aun ons doonen well, soo woa wie die uk Goodet doonen.
33Un see jinjen vom Boajch Gottes, dree Doagesreisen wiet, un de Bundeslod Gottes jinkj dree Doagesreisen ver an häa, om an een Ruuat to wiesen; 34un de Wolkj Gottes wia äwa an Äwadach, wan see ut däm Loaga jinjen. 35Un daut passieed, wan de Lod loosjinkj, soo säd Moses: Sto opp, Har, daut diene Fiend sikj vestreien, un dee die haussen ver die ranen! 36Un wan see rud, soo säd hee: Komm wada, Har, no de Menj de 1 000 Israels!
Currently Selected:
4. Mose 10: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
