3. Mose 27
27
Jesaz äwa daut Vespräakjen un Tieenden
1Un de Har räd too Moses un säd: 2Räd to de Kjinja Israel un saj to an: Wan wäa eene Vespräakjunk erfelt, soo saul dee Seel no diene Sazunk fa däm Harn sennen. 3Un soo saul dien schaze fa eenem Maun von 20 Joa bat 60 Joa oolt sennen, un zwoa es dien schaze 50 Schekel Selwa, nom Schekel vom Heilichtum; 4un wan daut eene Fru es, soo saust du ar opp 30 Schekel schaze. 5Un wan daut von fief Joa bat 20 Joa oolt es, soo saul dien schaze wan daut een Jung es, 20 Schekel sennen, un eene Mejal 10 Schekel; 6un wan daut von eenem Moonat bat fief Joa oolt es, soo saul dien schaze fa eenen Jung 5 Schekel Selwa, un fa eene Mejal 3 Schekel Selwa sennen; 7Un wan daut von 60 Joa un doaräwa oolt es, soo saul dien schaze, wan daut een Maun es, 15 Schekel, en eene Fru 10 Schekel sennen. 8Un wan hee too oam es sooväl too betolen, aus du am schazt, soo saul maun am ver däm Priesta stalen, un de Priesta saul am schaze; no sienem Vemäajen, dee daut Vespräakjen jedonen haft.
9Un wan daut een Vee es, wuavon maun däm Harn eene Opfagow brinjt, soo saul aules, waut maun däm Harn doavon jeft, heilich sennen. 10Maun saul daut nich utwakjsle noch vetuschen, een goodet fa een schlajchtet, ooda een schlajchtet fa een goodet; un wan maun dannoch Vee fa Vee vetuscht, soo woat daut selje heilich un daut ennjetuschte heilich sennen. 11Un wan daut een onreinet Vee es, wuavon maun däm Harn kjeene Opfagow brinjt, soo saul maun daut Vee ver däm Priesta stalen, 12un de Priesta saul daut schaze, auf daut goot ooda schlajcht es; nom Priesta siene schazung, aulsoo saul daut sennen. 13Oba wan maun daut leesen well, soo saul maun too dienem schaze 1/5 Deel doatoo jäwen.
14Un wan wäa sien Hus heilicht, daut et däm Harn heilich es, soo saul daut de Priesta schaze, auf daut goot ooda schlajcht es; soo aus de Priesta daut schazt, soo saul daut faustjestalt sennen. 15Un wan dee janja sien Hus leesen well, soo saul hee daut 5-te Deel vom Jelt doaräwa doatolajen, un daut saul am jehieren.
16Un wan wäa vom sienem Ieejendoomsfeld däm Harn heilicht, soo saul dien schaze nom vehoolen vom sienem utseien sennen; een Homer Joascht, toom seien, saul 50 Schekel Selwa sennen. 17Wan hee vom Jubeljoa aun sien Flekj heilicht, soo saul daut no dienem schaze faustjestalt sennen; 18un wan hee nom Jubeljoa sien Flekj heilicht, soo saul de Priesta am daut Jelt nom vehoolen de Joaren beräakjnen, dee bat toom Jubeljoa äwa jebläwen sent, un daut saul von diene schazung aufjetrocken woaren. 19Oba wan dee, dee daut Flekj leesen well, soo saul hee daut 5-te Deel vom Jelt no dienem schaze doatodoonen, un daut saul am jehieren. 20Un wan hee daut Flekj nich leest, ooda wan hee daut Flekj eenem aundren Maun vekjaft, soo kaun daut nich wada jeleest woaren; 21un daut Flekj saul, wan daut aum Jubeljoa frie utjeit, däm Harn heilich sennen, aus een vebaundet Flekj; daut saul däm Priesta aus Ieejentum jehieren.
22Un wan hee eent von am jekoftet Flekj, daut nich toom Ieejendoomsfeld jehieet, däm Harn heilje, 23soo saul de Priesta am däm Pries von dienem schaze bat däm Jubeljoa beräakjnen; un hee saul dien schaze aum seljen Dach, aus eent däm Harn Heiljet weien (doabrinje). 24Aum Jubeljoa saul daut Flekj wada aun däm komen, von däm hee daut jekoft haud, aun däm, däm daut Ieejendoomslaunt jehieed.
25Un aul dien schaze saul nom Schekel vom Heilichtum passieren; 20 Gera saul de Schekel sennen.
26Blooss daut Ieeschtjebuarne vom Vee, daut aus Ieeschtjeburt däm Harn jehieet, daut saul kjeen Mensch heilje; auf daut een Rind- ooda Kjlienvee, daut jehieet däm Harn. 27Oba wan daut vom orreinen Vee es, soo saul maun daut leesen no dienem schaze un daut 5 Deel doatolajen; un wan daut nich jeleest woat, soo saul daut vekoft woaren no dienem schaze.
28Doch aulet Vebaunte, daut wäa däm Harn vebaunt, von aulem, waut sient es, daut sent Menschen ooda Vee ooda Flekj von sienem Ieejentum, saul nich vekoft un nich jeleest woaren; aules Vebaunte es däm Harn huachheilich. 29Aules, waut aun Menschen vebaunt woat, saul nich jeleest woaren; daut saul omjebrocht woaren.
30Un aulet 10-de vom Launt, vom Laundessome, vonne Frucht de Beem, aules jehieet däm Harn; daut es däm Harn heilich. 31Oba wan wäa von sienem 10-de leesen well, soo saul hee daut 5-te Deel doatodoonen. 32Un aule 10-de vom Rind- un Kjlienvee, von aulem, waut unjrem Hoadsstock derchjeit, daut 10-de saul däm Harn heilich sennen; 33maun saul nich unjasäkjen, auf daut goot ooda schlajcht es, un saul daut nich vetuschen; un wan maun daut dannoch vetuscht, soo woat daut selje heilich un daut ennjetuschte heilich sennen; daut saul nich jeleest woaren. 34Daut sent de Jebooten, dee de Har däm Moses befool oppem Boajch Sinai aun de Kjinja Israel.
Currently Selected:
3. Mose 27: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
