Hiob 4
4
De Ieeschte Räd von Elifas: Kjeen Lieden onen Schult – Kjeen Schultloosa ver Gott
1Un Elifas, de Temanita, auntwuad un säd: 2Wan maun vesieekjt een Wuat aun die too rechten, woat daut die vedrisslich moaken? Doch de Wieed trigjtohoolen, wäa kaun daut? 3Kjikj, du hast väle trajchtjewäsen, un enjeschlopne Henj hast du jestoakjt; 4däm Twiewelnden rechten diene Wieed opp, un sinkjende Kjnee hast du faust jemoakt. 5Doch nu kjemt daut aun die, un daut moakt die vedrisslich; daut errieekjt die, un du best bedrekjt. 6Es nich diene Gottesfercht dien Toovetruen, de Vollkomenheit diene Wäaj diene Hopninj? 7Jedenkj doch: Wäa es aus Onschuldja omjekomen, un wua sent Rajchtschaufne vetilcht worden? 8Soo aus ekj daut jeseenen ha: Dee Onheil plieejen un Onjlekj seien, arnten daut. 9Derch däm Odem Gottes komen see om, un derch däm Frodem ut siene Näs vegonen see. 10Daut Brelle de Leiws un de brellende Stemm sent stell jeworden, un de Tänen de junge Leiws sent utjebroaken; 11de Leiw kjemt ut Mangel aun Raup, un de Junge de Muttaleiw woaren vestreit.
12Un no mie kjeem een heimlichet Wuat, un mien Ua venaum een Fuschle doavon. 13En Jedanken, dee de Nachtjesechta väakomen loten, wan deepa Schlop de Menschen befält, 14kjeem Schrakj äwa mie un Bäben, un aule miene Knoakes scheddaden derch; 15un een Jeist trock ver mienem Aunjesecht vebie, daut Hoa opp mienem Lief stald sikj opp. 16Daut stunt doa, un ekj erkjand sien Aunjesecht nich; een Bilt wia ver miene Uagen, een Jeruzh un eene Stemm hieed ekj:
17Sull een Mensch jerajchta sennen aus Gott, ooda een Maun reina aus dee am jemoakt haft? 18Kjikj, opp siene Kjnajchts vetrut hee nich, un siene Enjel lajcht hee Errtum too Laust: 19Wooväl mea dän, dee en Leemhiesa wonen, dän äa Grunt em Stoff es! Aus Motten woaren see veklunjt. 20Von Zemorjes bat Oppenowent woaren see veschmatat; onen daut maun an beacht, see komen opp eewich om. 21Es daut nich soo? Woat äa Zeltstrang aun an wajchjeräten, soo stoawen see, un nich en Weisheit.
Currently Selected:
Hiob 4: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
