Jeremia 1
1
Jeremia siene Beroopunk aus Profeet
1De Wieed Jeremia, däm Sän Hilkia, von de Priesta, dee en Anatot wieren em Launt Benjamin, 2to däm daut Wuat Gottes wia en de Doag Josias, vom Sän Amon, däm Kjennich von Juda, em 1dredden Joa siene Rejierunk; 3Un daut passieed uk en de Doag Jojakim, däm Sän Josias, däm Kjennich von Juda, bat toom Enj vom 1ieeschten Joa Zedekia, däm Sän Josias, däm Kjennich von Juda, bat aum feften Moonat aus Jerusalem wajchjefieet wort.
4Un daut Wuat Gottes passieed to mie aulsoo: 5Iea aus ekj die em Muttalief muak, ha ekj die erkjant, un ea du ut däm Muttaschoot väakjeemst, ha ekj die jeheilicht: Toom Profeet aun de Nazionen ha ekj die ennjestalt. 6Un ekj säd: Ach Har, Har! Kjikj, ekj kaun nich räden, dan ekj sie jung. 7Doa säd de Har to mie: Saj nich: Ekj sie jung; dan no aule, wuahan ekj die schekjen woa, saust du gonen, un aules, waut ekj die jebeeden woa, saust du räden. 8Forcht die nich ver an; dan ekj sie met die, om die to raden, sajcht de Har. 9Un de Har strakjt siene Haunt ut un schieed mien Mul aun, un de Har säd to mie: Kjikj, ekj laj miene Wieed en dienem Mul. 10Kjikj, ekj bestal die aun disem Dach äwa de Nazionen un äwa de Kjennichrikjs, om uttoroten un doltorieten un to vedoawen un auftobräakjen, om to buen un om to plaunten.
11Un daut Wuat Gottes wia to mie aulsoo: Waut sitst du, Jeremia? Un ekj säd: Ekj see eenen Mandelboom. 12Un de Har säd to mie: Du hast rajcht jeseenen; dan ekj woa äwa mien Wuat wache, daut uttofieren. 13Un daut Wuat Gottes wia toom tweeden Mol aulsoo: Waut sitst du? Un ekj säd: Ekj see eenen langsom koakenden Topp, däm sien Väadeel es jäajen Sieden jerecht. 14Un de Har säd to mie: Vom Nuaden häa woat daut Onjlekj nenbräakjen äwa aule Laundesbewona. 15Dan kjikj, ekj roop aule Jeschlajchta de Kjennichrikjs jäajen Nuaden, sajcht de Har, daut see komen un een jiedra sienen Troon ver Jerusalems Dooasch stald un jäajen aule siene Miaren runtom, un jäajen aule Städa Juda. 16Un ekj woa miene Jerechten äwa an utspräakjen wäajen aule äare Boosheit, daut see mie veloten un aundre Jetta jerieekjat un ver de Woakjen äare Henj sikj doljeboagen ha.
17Oba du ombinj diene Lenden un moak die opp, un räd to an aules, waut ekj die jebeeden woa; vezoag nich ver an, doamet ekj die nich ver an vezoagt moak. 18Un ekj, kjikj, ekj moak die vondoag to eene fauste Staut un to eene Iesane Stett un to eene Koppane Mia jäajen daut gaunze Launt, soo aus jäajen de Kjennichs von Juda aus uk siene Ferschten, jäajen de Priesta un daut Volkj em Launt. 19Un see woaren jäajen die strieden, oba die nich äwawaultjen; dan ekj sie met die, sajcht de Har, om die to raden.
Currently Selected:
Jeremia 1: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
