Jesaja 63
63
Jerechtsbootschoft äwa Edom un aundre Velkja
1Wäa es disa, dee von Edom kjemt, von Bozra en dunkelroode Kjleeda, disa, prachtich en siene Kjleeda, dee omhäa jeit en siene groote Krauft? Ekj sie daut, dee en Jerajchtichkjeit räd, dee kjraftich es toom halpen. - 2Wuarom es dien Kjleet soo root, un sent diene Kjleeda aus dee von eenem Wienprasa? - 3Ekj ha däm Wien auleen jeklunjt, un von de Velkja wia kjeena bie mie; un ekj veklunjd an en mienem Oaja, vestaumpt an en mienem Jrim; un äa Sauft spretst opp miene Kjleeda, un ekj besudelt mien gaunzet Kjleet. 4Dan de Dach de Rach wia en mienem Hoaten, un daut Joa miene Erleesunk wia jekomen. 5Un ekj kjikjt omhäa, un doa wia kjeen Halpa; un ekj staund, un doa wia kjeen Unjastetta. Doa holp mie mien Oarm, un mien Jrim, hee haft mie unjastät. 6Un ekj klunjd de Velkja en mienem Oaja dol un muak an bedrunken en mienem Jrim, un ekj leet äare Sauft oppe Ieed ranen.
Gott deed väl Goots enne Vegonenheit – Bedd om Erboarmen fa de Jäajenwuat
7Ekj well de Jnod Gottes jedenkjen, däm Riem Gottes, no aulem, waut de Har ons erwäsen haft, un däm välen gooden jäajen däm Hus Israel, daut hee an erwäsen haft no sienem Erboarmen un no de Menj siene Jnod. 8Un hee säd: See sent mien Volkj, Kjinja, dee nich ontru woaren; un hee woat an toom Rada woaren. 9En aul äare Bedrenkjnis wia hee bedrenjt, un de Enjel von sienem Aunjesecht haft an jerat. En siene Leew un en sienem Erboarmen haft hee an erleest; un hoof an nohecht un druach an aule Doag von de oole Tieden häa. 10Oba see sent wadaspanstich jewast un ha sienen Heiljen Jeist betriept; doa dreid hee sikj jäajen an en eenen Fiend om: Hee selfst street jäajen an.
11Doa docht sien Volkj aun de oole Doag, de Doag Moses: «Wua es dee, dee an ut daut Mäa nohecht fieed met de Hoads siene Häad? Wua es dee, dee sienen Heiljen Jeist en äare Medd jeef; 12dee sienen harlichen Oarm aun de rajchte Sied Moses mettrakjen leet; dee de Wota ver an häa spoold, om sikj eenen eewjen Nomen too moaken; 13dee an derch de deepe Streem trakjen leet, aus de Pieed oppe Stap, onen daut see enjstlich wieren? 14Aus daut Vee, daut enne Läacht raufjeit, brocht de Jeist Gottes an too Ru. Aulsoo hast du dien Volkj jeleit, om die eenen harlichen Nomen too moaken.» 15«Kjikj vom Himmel rauf un see, von de Wonstäd diene Harlichkjeit un diene Majestät! Wua es dien Iewa un diene Macht? Daut räaje von dienem Ennalichen un diene Erboarmungen hoolen sikj jäajen mie trigj. 16Dan du best ons Voda; dan Abraham weet nich von ons, un Israel kjant ons nich; du, Har, best ons Voda; ons Erleesa von oole Tieden häa es dien Nomen. 17Wuarom, Har, latst du ons von diene Wäaj auferre, moakst onse Hoaten hoat, daut wie ons nich enjsten? Komm doch trigj om diene Kjnajchts äa wellen, wäajen de Stam von dienem Oawgoot! 18Fa eene korte Tiet haft dien heiljet Volkj daut beharscht: Onse Jäajna ha dien Heilichtum veklunjt. 19Wie sent aus soone jeworden, äwa dee du von oole Tieden häa nich jeharscht hast, dee nich jenant jewast sent no dienem Nomen.»
Currently Selected:
Jesaja 63: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
