Jesaja 47
47
Freid un Spott äwa den Unjagank von Babel
1Komm rauf un sat die en däm Stoff, Junkfru, Dochta Babel! Sat die han - oppe Ieed, onen Troon, Dochta de Chaldäa! Dan du saust nich mea Zoate un Vewande jenant woaren. 2Nemm däm Molsteen un mol Mäl; nemm dienen Schleia auf, trakj de Schlap nohecht, moak de Schinkjes kol, go derch de Streem; 3du saust noaktich opjedakjt, jo, diene Schaund saul jeseenen woaren! Ekj woa Rach nämen un de Menschen nich veschoonen.
4Ons Erleesa, Gott de Häaschoa es sien Nomen, de Heilja Israels!
5Sett stomm un go enne Diestanis, Dochta de Chaldäa! Dan du saust nich mea de Harin de Kjennichrikjs jenant woaren. 6Ekj wia oajalich äwa mien Volkj, sad mien Oawgoot rauf, un ekj gauf an en diene Haunt. Du hast an kjeen Erboarmen jewast, opp däm Jreis lädst du schwoa dien Joch; 7un du sajchst: En Eewichkjeit woa ekj Harin sennen! Soo daut du die dit nich too Hoaten nemst, daut Enj doavon nich bedochst.
8Un nu hia dit, du Woolhabende, dee en Sechaheit wont, dee en äarem Hoaten sajcht: Ekj sie daut un sest goa kjeena! Ekj woa nich aus Wätfru setten, noch Kjinjaloos sennen. 9Dit beides woat äwa die komen en eenem Uagenblekj, aun eenem Dach: Kjinjaloos un Wätfru; em vollem Mot woaren see äwa die komen, trotz de Menj von diene Zaubarie, trotz de jewaultje Zol von diene Baunnspriche. 10Un du vetrust opp diene Boosheit, du sädst: Kjeena sitt mie. Diene Weisheit un dien Weete, daut haft die erren jefieet; un du sädst en dienem Hoaten: Ekj sie daut, un sest goa kjeena! 11Oba daut kjemt een Onjlekj äwa die, daut du nich wajchzaubre kaust; un een Vedoawen woat äwa die häafaule, daut du nich wajchwesche kaust; un plazlich woat eene Vewustunk äwa die komen, dee du nich onst. 12Sto doch opp met diene Baunnspriche un met de Menj diene Zaubarie, wuaraun du die aufjemieecht hast von diene Jugent aun! Veleicht kaust du die Nutzen veschaufen, veleicht woascht du Schrakj vebreeden. 13Du best meed derch de Menj von diene Beroda. See muchten doch oppstonen un die raden, dee de Himmel aufdeelen, dee de Stierns bekjikjen, dee jiedren Niemon toweeten loten, waut äwa die komen woat! 14Kjikj, see sent aus Stoppel jeworden, Fia haft an vebrent! Ver de Jewault de Flaumen kunnen see äa Läwen nich raden: Daut wieren kjeene Kole, om sikj too woame, kjeen Fia, om doafäa too setten. 15Aulsoo sent die jeworden, fa dee du die aufjemieecht hast; diene Haundelslied von diene Jugent aun, see erren omhäa, een jiedra opp sienem ieejnen Wajch; un kjeena halpt die.
Currently Selected:
Jesaja 47: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
