Jesaja 36
36
Beloagrunk von Jerusalem derch Assur (Assierien) to Tiet vom Kjennich
1Un daut passieed aum 14-den Joa vom Kjennich Hiskia, doa trock Sanherib, de Kjennich von Assierien, nopp jäajen de fauste Städa Juda un neem dee en. 2Un de Kjennich von Assur schekjt von Lachisch däm Rabsak nom Kjennich Hiskia, met eenem groote Häa, no Jerusalem; un hee hilt stell aun de Wotaleidinj vom bowaschten Stroom, aun de Gauss de Walkerfeld. 3Doa jinkj Eljakim no am rut, de Sän Hilkia, dee äwa daut Hus wia, un Sebna, de Schriewa, un Joach, de Sän Asaf, de Jeschichte Schriewa.
4Un de Rabsak säd to an: Sajcht doch too Hiskia: Soo sajcht de groota Kjennich, de Kjennich von Assur: Waut es daut fa een Vetruen, met waut du vetrust? 5Ekj saj: Blooss een Wuat de Leppen es Rot un Macht toom Kjrich. Nu, opp wäm vetrust du, daut du die jäajen mie jestalt hast? 6Kjikj, du vetrust opp janem ennjekjnekjten Ruastock, opp Ägipten, dee, wan sikj wia opp am stett, am enne Haunt fält un am derchstakjt. Soo es de Farao, de Kjennich von Ägipten, aule, dee opp am vetruen. 7Un wan du to mie sajchst: Oppem Harn, onsem Gott, vetru wie; – es hee daut nich, däm siene Hechten un däm siene Aultoaren Hiskia wajchjedonen, doa hee too Juda un to Jerusalem jesajcht haft: Ver disem Aultoa sell jie aunbäden? 8Un nu, lot die doch met mienem Har en, däm Kjennich von Assur; un ekj well die 2000 Pieed jäwen, wan du die Rittasch doanopp saten kaust. 9Un woo wust du eenen eensjen Stauthoola von däm jerinjsten Kjnajcht von mienem Harn trigjjoagen? Oba du vetrust opp Ägipten wäajen Woages un wäajen Rittasch. 10Un nu, sie ekj onen däm Harn jäajen dit Launt noppjetrocken, om daut to vewusten? De Har haft to mie jesajcht: Trakj nopp en dit Launt un vewust daut.
11Un Eljakim un Sebna un Joach säden to däm Rabsak: Räd doch too diene Kjnajchts opp arameisch, dan wie vestonen daut; un räd nich too ons opp judisch ver däm Volkj siene Uaren, daut opp de Mia es. 12Un de Rabsak säd: Haft mien Har mie no dienem Har un no die jeschekjt, om dise Wieed to räden? Nich to de Mana, dee opp de Mia setten, om met junt – äa Drakj to äten un äa Äajenwota to drinkjen?
13Un de Rabsak jinkj han un roopt met ne lude Stemm opp judisch un säd: Hieet daut Wuat vom groote Kjennich, däm Kjennich von Assur! 14Soo sajcht de Kjennich: Daut Hiskia junt nich teischt; dan hee woat junt nich raden kjennen. 15Un daut Hiskia junt nich opp däm Harn vetreest, endäm hee sajcht: De Har woat ons jewess raden; dise Staut woat nich en de Haunt vom Kjennich von Assur jejäft woaren. 16Hieet nich opp Hiskia; dan aulsoo sajcht de Kjennich von Assur: Moakt met mie Fräd un komt rut no mie, soo sell jie een jiedra von sienem Wienstock un een jiedra von sienem Fiejenboom äten, un een jiedra daut Wota ut sienem Borm drinkjen, 17bat ekj kom un junt en een Launt hool aus jun Launt, een Launt von Jeträajd un jungen Wien, een Launt von Broot un Wienboaj. 18Daut Hiskia junt nich vefieet, endäm hee sajcht: De Har woat ons raden! Ha de Jetta de Nazionen een jieda sien Launt von de Kjennichshaunt von Assur jerat? 19Woa sent de Jetta von Hamat un Arpad? Woa sent de Jetta von Sefarwaim? Un ha dee Samara von miene Haunt jerat? 20Woone sent daut, – unja aule Jetta von dise Lenda; dee äa Launt von miene Haunt jerat ha, daut de Har Jerusalem von miene Haunt raden sull? 21Un see wieren stell un auntwuaden am kjeen Wuat; dan daut wia daut Jeboot vom Kjennich, dee jesajcht haud: Jie sellen am nich auntwuaden.
22Un Eljakim, de Sän Hilkia, dee äwa daut Hus wia, un Sebna, de Schriewa, un Joach, de Sän Asaf, de Jeschichte Schriewa, kaumen no Hiskia met verätne Kjleeda un berechten am Rabsaks Wieed.
Currently Selected:
Jesaja 36: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
