Jesaja 1

Gott siene Aunkloag jäajen sien Volkj un de Kloag von sien Profeet

1Daut Jesecht (eene Vision) waut Jesaja, däm Sän Amoz, daut hee äwa Juda un Jerusalem jeseenen haud en de Doag Usija, Jotam, Ahas, Hiskia, dee Kjennichs von Juda.

2Hieet, jie Himmel, un hia opp, du Ieed! Dan de Har haft jerät: Ekj ha Kjinja groot jemoakt, un oppjetrocken, un see sent von mie aufjefollen. 3Een Oss kjant sienen Ieejendeema, un een Äsel de Kjrebb von sienem Harn; Israel haft kjeene Erkjantnis, mien Volkj haft kjeen Vestentnis. 4Wee de sindjen Nazion, däm Volkj, belaust met Ojjerajchtichkjeit, däm Somen de Iebel doonende, dän vedoawlich haundelnde Kjinja! See ha däm Harn veloten, ha däm Heiljen Israel vespott, sent trigj jegonen.

5Wuarom sell jie wada jeschloagen woaren, doa jie blooss däm Auffaul vemieren wudden? Daut gaunze Haupt es krank, un daut gaunze Hoat es meed. 6Von de Footsole bat däm Haupt es nuscht Jesundet aun am: Wunden un Strime un fresche Schläaj; see sent nich utjedrekjt un nich vebungen, un nich met Eelj oppjewäkjt worden. 7Jun Launt es eene Wieste, june Städa sent met Fia vebrent; june Aka, - Framde vetäaren dee ver june Uagen; un eene Wieste es daut, aus too Grunt jebrocht derch Framde. 8Un de Dochta Zion es äwajebläwen aus eene Bood em Wienboajch, aus eene Nachtbood em Gurkjefeld, aus eene beloagade Staut. 9Wan Gott de Häaschoa ons nich eenen gaunz kjlienen Äwabliefsel jeloten haud, aus Sodom wäa wie, aus Gomorra jeworden.

Veuadeelunk fa ojjerajchten Gottesdeenst un Opproop toom woaren

10Hieet daut Wuat Gottes, Väastona von Sodom; horcht opp onsem Gott sien Jesaz, Volkj von Gomorra! 11Waut saul mie de Menj june Schlachtopfa? Sajcht de Har; ekj sie saut von de Brauntopfa von Schopsbakj un daut Fat de jemaste Kjalwa, un aum Bloot von Bolles un Lama un junge Bakj ha ekj kjeen Jefaulen. 12Wan jie komen, om ver mienem Aunjesecht too erschienen, wäa haft dit von june Haunt jefoddat, miene Väahäw too veklunjen? 13Brinjt kjeene faulsche Opfagow mea! Rieekjastoff (Weiruak, seeta Ruak) es mie een Aufschu. Niemon un Sabat, daut Tooproopen von Vesaumlungen: Fräfel un Fastvesaumlung kaun ekj nich vedroagen. 14June Niemonen un june Fasttieden haust miene Seel; see sent mie too Laust jeworden, ekj sie meed dee too droagen. 15Un wan jie june Henj utbreeden, vestäakj ekj miene Uagen ver junt; selfst wan jie mea Bäden, hia ekj nich: June Henj sent voll Bloot. 16Wauscht, reinicht junt; schauft de Schlajchtichkjeit von june Haundlungen ut miene Uagen, lot auf vom Iebel doonen! 17Lieet Goodet too doonen, tracht no Rajcht, leid däm Bedrekjten; schauft Rajcht de Weis, fieet de Sach de Wätfrues!

Gott sien Rajchtshaundel met Juda, Kloag äwa Zion – Tookjinftje Omkjia derch daut Jerecht

18Dan komt un lot ons metenaunda rechten, sajcht de Har. Wan june Sinden aus Scharlach sent, see sellen schneewitt woaren; wan see root aus Purpur sent, aus Woll sellen see woaren. 19Wan jie wellich sent un hieren, soo sell jie daut Goode vom Launt äten. 20Oba wan jie junt wäaren un wadaspanstich sent, soo sell jie vom Schwieet jefräten woaren. Dan daut Mul Gottes haft jerät.

21Woo es de true Staut to eene Hua jeworden! See wia voll Rajcht, Jerajchtichkjeit wond doabennen, un nu Merda! 22Dien Selwa es too Ausch jeworden, dien iedla Wien met Wota vemischt. 23Diene Ferschten sent Wadaspanstje un Deewfrind (Stäla-Frind), een jiedra von an leeft Jeschenkja un jajcht no Belooninj; de Weis schaufen see nich Rajcht, un de Wätfrues äare Sach kjemt nich ver an.

24Doarom sajcht de Har, Gott de Häaschoa, de Majchtja Israels: Wee! Ekj woa mie aun miene Jäajna treesten un Rach eewen aun miene Fiend. 25Un ekj woa miene Haunt jäajen die dreien, un woa dien Ausch utschmelte aus met Luagsolt un aul dien Blie wajchschaufen. 26Un ekj woa diene Rechta wada häastalen aus too oola Tieden, un diene Rotjäwa aus aum Aunfank. Doano woat maun die nanen: Staut de Jerajchtichkjeit, true Staut. 27Zion woat derch Jerecht erleest woaren, un siene Tridjjekomne derch Jerajchtichkjeit. 28Oba de Äwaträda un Sinda aula toop Veschmatre; un dee däm Harn veloten, woaren unjagonen. 29Dan see woaren beschämt woaren wäajen de Terebinten, aun dee jie Lost ha, un jie woaren met Schaund bedakjt woaren wäajen de Goades, aun de jie jefaulen hauden. 30Dan jie woaren aus eene Terebinten sennen, dee äare Bläda vewalkjt sent, un aus een Goaden, dee kjeen Wota haft. 31Un de Stoakja woat to Brenninj woaren un sien Doonen too Fiafunk; un see woaren beid metenaunda vebrennen, un kjeena woat laschen.

Currently Selected:

Jesaja 1: PBJHF

Highlight

Copy

Compare