1. Mose 46

Jakob jeit rauf no Ägipten

1Un Israel jeef sikj, met aulem waut hee haud, oppem Wajch, un kaum no Beerscheba; un hee opfad Schlachtopfa däm Gott von sienem Voda Isaak. 2Un Gott räd too Israel de Nacht en eenem Jesecht un säd: Jakob! Jakob! Un hee säd: Hia sie ekj. 3Un hee säd: Ekj sie Gott, de Gott von dienem Voda; fercht die nich, no Ägipten rauf too gonen; dan to eene Groote Nazion well ekj die doa selfst moaken. 4Ekj well met die no Ägipten rauf gonen, un ekj well die uk jewess nopp fieren; un Josef saul siene Haunt opp diene Uagen lajen. 5Doa jinkj Jakob von Beerscheba wajch, un de Säns Israel fieeden Jakob, äarem Voda, un äare Kjinja un äare Frues oppe Woages, dee de Farao jeschekjt haud, om am to holen. 6Un see neemen äa Vee un äa Hab un Goot, daut see em Launt Kanaan jewonnen hauden, un kaumen no Ägipten, Jakob un aul sien Somen met am: 7Siene Säns un de Säns von siene Säns met am, siene Dajchta un de Dajchta von siene Säns, un aul sien Somen brocht hee met sikj no Ägipten.

Jakob siene Nokomen

8Un dit sent de Nomes de Säns Israel, dee no Ägipten kaumen: Jakob un siene Säns; Jakob sien Ieeschtjebuarna: Ruben. 9Un de Säns von Ruben: Hanok un Pallu un Hezron un Karmi. 10Un de Säns von Simeon: Jemuel un Jamin un Ohad un Jakin un Zochar un Saul, de Sän de Kanaanitarin. 11Un de Säns von Levi: Gerson, Kehat un Merari. 12Un de Säns von Juda: Gher un Onan un Schela un Perez un Serach; oba Gher un Onan storwen em Launt Kanaan. Un de Säns von Perez wieren Hezron un Hamul. 13Un de Säns von Isachar: Tola un Puwa un Job un Schimron. 14Un de Säns von Sebulon: Sered un Elon un Jachleel. 15Daut sent Lea äare Säns, dee see däm Jakob en Paddan-Aram jebua, un Dina, siene Dochta. Aule Seelen von siene Säns un siene Dajchta wieren 33.

16Un de Säns von Gad: Zifjon un Haggi un Schuni un Ezbon un Eri un Arodi un Areli. 17Un de Säns von Aser: Jimna un Jischwa un Jischwi un Beria un Serach, äare Sesta. Un de Säns von Beria: Heber un Malkiel. 18Daut sent de Säns von Silpa, dee Laban siene Dochta Lea jeef; un see jebua dise däm Jakob, 16 Seelen.

19De Säns von Rahel, Jakob siene Fru: Josef un Benjamin. 20Un däm Josef worden em Ägiptenlaunt Manasse un Efraim jebuaren, dee Asnat am jebua, de Dochta Potifer, vom Priesta von On. 21Un de Säns von Benjamin: Bela un Beker un Aschbel un Gera un Naaman un Echi un Rosch un Muppim un Huppim un Ard. 22Daut sent de Säns von Rahel, dee däm Jakob jebuaren worden; aule Seelen wieren 14.

23Un de Säns von Dan: Huschim. 24Un de Säns von Naftali: Jachzeel un Guni un Jezer un Schillem. 25Daut sent de Säns von Bilha, dee Laban siene Dochta Rahel jeef; un see jebua dise däm Jakob; aule Seelen wieren 7.

26Aule Seelen, dee däm Jakob aunjehieeden, dee no Ägipten kaumen, dee ut siene Lenden väajekomen wieren, utjenomen de Frues von Jakob siene Säns, aule Seelen wieren 66. 27Un de Säns von Josef, dee am en Ägipten jebuaren worden, wieren 2 Seelen. Aule Seelen von Jakob sienem Hus, dee no Ägipten kaumen, wieren 70.

Jakob sien Wadaseenen met Josef

28Un hee schekjt Juda ver sikj häa no Josef, om ver am häa – no Gosen too gonen; un see kaumen en daut Launt Gosen. 29Doa spaund Josef sienen Woagen aun un fua nopp, sienem Voda Israel entjäajen no Gosen; un aus hee am sach, foll hee am om däm Hauls un hield lang aun sienem Hauls. 30Un Israel säd to Josef: Nu mucht ekj stoawen, nodäm ekj dien Aunjesecht jeseenen ha, daut du noch läfst!

31Un Josef säd to siene Breeda un to sienem Voda Hus: Ekj well nopp gonen un däm Farao berechte un to am sajen: Miene Breeda un mien Voda Hus, dee em Launt Kanaan wieren, sent no mie jekomen. 32Un de Mana sent Schopshoads, dan see ha Veezucht jedräwen; un see ha äa Kjlienvee un äare Rinda un aules, waut see ha, metjebrocht. 33Un daut passieet, daut de Farao junt roopt un sajcht: Waut es june Beschaftjunk? 34Soo sajcht: Diene Kjnajchts ha Veezucht jedräwen, von äare Jugent aun bat nu, soo wie aus uk onse Vodasch – om daut jie wonen derwen em Launt Gosen; dan aule Schopshoads sent de Ägipta een Aufschu.

Currently Selected:

1. Mose 46: PBJHF

Highlight

Copy

Compare