1. Mose 38
38
Juda un siene Schwiadochta Tamar
1Un daut passieed om dee selje Tiet, daut Juda von siene Breeda wajchjinkj un jinkj no eenem Maun von Adullam, met Nomen Hira. 2Un Juda sach doa de Dochta von eenem kanaanitischen Maun, met Nomen Schua; un hee neem ar un jinkj no ar en. 3Un see wort schwanga un jebua eenen Sän, un hee jeef am däm Nomen Gher. 4Un see wort wada schwanga un jebua eenen Sän, un see jeef am däm Nomen Onan. 5Un see jebua wada eenen Sän, un see jeef am däm Nomen Schela; oba Juda wia en Kesib, aus see am jebua. 6Un Juda neem eene Fru fa Gher, sienen Ieeschtjebuarnen, un äa Nomen wia Tamar. 7Un Gher, de Ieeschtjebuarna von Juda, wia bees en de Uagen Gottes, un Gott de Har brocht am om. 8Doa säd Juda too Onan: Go en no dienem Brooda siene Fru, un jeff ar de Schwangaflicht un erwakj dienem Brooda Nokomen. 9Oba doa Onan wist, daut de Somen nich sien ieejna sennen sull, soo passieed daut, wan hee nom Brooda siene Fru ennjinkj, leet hee daut oppe Ieed un vedorw daut, om sienem Brooda kjeenem Somen to jäwen. 10Un daut wia iebel enne Uagen Gottes, waut hee deed; un hee brocht uk am om. 11Doa säd Juda too Tamar, siene Schwiadochta: Bliew Wätfru en dienem Voda sienem Hus, bat mien Sän Schela groot sennen woat. Dan hee säd: Daut nich uk hee stoaft aus siene Breeda! Un Tamar jinkj han un bleef em Vodahus.
12Aus väl Doag vegonen wieren, doa storf de Dochta Schua, de Fru Juda. Un aus Juda utjetruat haud, jinkj hee om siene Schop too schäaren nopp, hee un Hira, sien Frint, de Adulamita, no Timna. 13Un daut wort de Tamar berecht un jesajcht: Kjikj, dien Schwiavoda jeit nopp no Timna, om siene Schop too schäaren. 14Doa läd see de Wätfrukjleeda von sikj un bedakjt sikj met eenem Schleia un vedakjt sikj; un see sad sikj aun däm Engank von Enajim, daut aum Wajch no Timna licht; dan see sach, daut Schela groot jeworden wia un see am nich to Fru jejäft wort. 15Un Juda sach ar un hilt ar fa eene Hua, dan see haud äa Aunjesecht bedakjt. 16Un hee buag no ar vom Wajch auf un säd: Komm doch, lot mie no die engonen! Dan hee wist nich, daut see siene Schwiadochta wia. Un see säd: Waut west du mie jäwen, daut du no mie nenjeist? 17Doa säd hee: Ekj well die eenen jungen Kosenbock vonne Häad schekjen. Un see säd: Wan du een Paunt (waut toom birjen) jefst, bat du daut schekjst. 18Un hee säd: Waut fa een Paunt (waut toom birjen) saul ekj die jäwen? Un see säd: Dienen Säajelrinkj un diene Schnua un dien Stock, dee en diene Haunt es. Doa jeef hee ar daut un jinkj no ar en, un see wort schwanga von am. 19Un see stunt opp un jinkj han, un see läd äaren Schleia auf un trock äare Wätfrukjleeda aun. 20Un Juda schekjt däm jungen Kosenbock derch sienem Frint siene Haunt, däm Adulamita, om daut Paunt (waut toom birjen) ut de Haunt von de Fru to nämen; oba hee funk ar nich. 21Un hee fruach de Lied aun äarem Uat un säd: Wua es jane Hua, dee bie Enajim aum Wajch wia? Un see säden: Hia es kjeene Hua jewast. 22Un hee jinkj trigj no Juda un säd: Ekj ha ar nich jefungen, un de Lied von disem Uat säden: Hia es kjeene Hua jewast. 23Doa säd Juda: See behoolen daut fa sikj, daut wie nich toom Spott woaren; kjikj, ekj ha dit Bockje jeschekjt, un du hast ar nich jefungen.
24Un daut passieed no 3 Moonat, doa wort däm Juda berecht un jesajcht: Tamar, diene Schwiadochta, haft jehuat, un kjikj, see es uk schwanga von Huararie. Doa säd Juda: Fieet ar rut, daut see vebrent woat! 25Aus see rutjefieet wort, doa schekjt see no äarem Schwiavoda un leet am sajen: Von däm Maun, däm dit jehieet, sie ekj schwanga; un see säd: Erkjan doch, wäm dis Säajelrinkj un dise Schnua un dis Stock jehieet! 26Un Juda erkjand daut un säd: See es jerajchta aus ekj, doarom daut ekj ar nich mienem Sän Schela jejäft ha; un hee erkjand ar nich mea. 27Un daut passieed too Tiet, aus see jebäaren sull, kjikj, doa wia een Poakje en äarem Lief. 28Un daut passieed, aus see jebua, doa strakjt eena de Haunt rut, un de Häwaum neem ar un bung eenen rooden Baund om siene Haunt un säd: Disa es aus ieeschta rutjekomen. 29Un daut passieed, aus hee siene Haunt trigjtrock, kjikj, doa kaum sien Brooda rut; un see säd: Woo best du derch jebroaken! Opp die es daut Derchbräakjen! Un maun jeef am däm Nomen Perez. 30Un nodäm kaum sien Brooda rut, om däm siene Haunt de rooda Baund wia, un maun jeef am däm Nomen Serach.
Currently Selected:
1. Mose 38: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
