2. Mose 6
6
Moses kjricht von Gott eenen nieen Oppdrach
1Un de Har räd too Moses: Nu saust du seenen, waut ekj däm Farao doonen woa; dan derch eene stoakje Haunt saul hee jedwungen woaren an gonen to loten, un derch eene stoakje Haunt saul hee jedwungen woaren an ut sienem Launt ruttojoagen.
2Un Gott räd too Moses un säd to am: Ekj sie Gott. 3Un ekj sie Abraham, Isaak un Jakob aus Gott erschienen, de Aulmajchtja; oba met mienem Nomen Har ha ekj mie an nich jeopenboat. 4Un uk mienen Bunt ha ekj met an oppjerecht, an daut Launt Kanaan to jäwen, daut Launt äare Framdlinkjschoft, en däm see aus Framde jewast sent. 5Un ekj ha uk daut Weekloagen de Kjinja Israel jehieet, dee de Ägipta toom Deenst aunholen, un ha aun mienem Bunt jedocht. 6Doarom saj to de Kjinja Israel: Ekj sie de HAR, un ekj woa junt unja de Laustoabeide de Ägipta rutfieren, un woa junt raden ut äarem Deenst un junt erleesen met eenem utjestrakjtem Oarm un derch groote Jerechten. 7Un ekj well mie junt aunnämen toom Volkj un well jun Gott sennen; un jie sellen erkjanen, daut ekj de Har, jun Gott, sie, dee junt rutfieet vonne Laustoabeit de Ägipta wajch. 8Un ekj woa junt en daut Launt brinjen, daut däm Abraham, Isaak un Jakob to jäwen, ekj miene Haunt oppjehowen ha, un woa daut junt toom Ieejentum jäwen, ekj, Gott.
9Un Moses räd aulsoo to de Kjinja Israel; oba see hieeden nich opp Moses fa Onjedult un fa hoadem Deenst. 10Un de Har räd too Moses un säd: 11Go nenn, räd toom Farao, däm Kjennich von Ägipten, daut hee de Kjinja Israel ut sienem Launt gonen lat. 12Un Moses räd ver däm Harn un säd: Kjikj, de Kjinja Israel ha nich opp mie jehieet, un woo sull de Farao opp mie hieren, doatoo ekj onbeschnäden aun Leppen sie? 13Un de Har räd too Moses un to Aaron un jeef an Befäl aun de Kjinja Israel un aun däm Farao, däm Kjennich von Ägipten, om de Kjinja Israel ut däm Ägiptenlaunt ruttofieren.
Staumboom von Moses un Aaron
14Dit sent de Heipta von äare Vodahiesa: De Säns Ruben, däm Ieeschtjebuarnen Israels: Hanok un Pallu, Hezron un Karmi; daut sent de Jeschlajchta Ruben. 15Un de Säns Simeon: Jemuel un Jamin un Ohad un Jakin un Zochar un Saul, de Sän de Kanaanitarin; daut sent de Jeschlajchta Simeon. 16Un dit sent de Nomes de Säns Levi no äare Jeschlajchta: Gerson un Kehat un Merari; un de Läwensjoaren Levi wieren 137 Joa. 17De Säns Gerson: Libni un Schimi, no äare Jeschlajchta. 18Un de Säns Kehat: Amram un Jizhar un Hebron un Ussiel; un de Läwensjoaren Kehat wieren 133 Joa. 19Un de Säns Merari: Machli un Musi; daut sent de Famieljes Levi no äare Jeschlajchta. 20Un Amram neem Jokebed, siene Taunte, sikj to Fru, un see jebua am Aaron un Moses; un de Läwensjoaren Amram wieren 137 Joa. 21Un de Säns Jizhar: Korah un Nefeg un Sikri. 22Un de Säns Ussiel: Mischael un Elzafan un Sithri. 23Un Aaron neem Elischeba, de Dochta Amminadab, de Sesta Nachschon, sikj to Fru; un see jebua am Nadab un Abihu, Eleasar un Ithamar. 24Un de Säns Korah: Assir un Elkana un Abiasaf; daut sent de Famieljes de Korhita. 25Un Eleasar, de Sän von Aaron, neem eene von de Dajchta Putiel sikj to Fru, un see jebua am Pineha; daut sent de Heipta de Vodasch de Leviten no äare Jeschlajchta. 26Dis Aaron un dis Moses sent daut, to dän Gott jerät haft: Fieet de Kjinja Israel ut däm Ägiptenlaunt rut, no äare Häasch. 27Dise sent daut, dee toom Farao, däm Kjennich von Ägipten, räden, om de Kjinja Israel ut Ägipten ruttofieren: Dis Moses un dis Aaron.
Moses wiest Tieekjens un Wunda däm Farao
28Un daut passieed aun däm Dach, doa de Har too Moses räd em Ägiptenlaunt, 29doa räd de Har too Moses un säd: Ekj sie Gott; räd toom Farao, däm Kjennich von Ägipten aules, waut ekj to die räd. 6, 30Un Moses räd ver däm Harn: Kjikj, ekj sie onbeschnäden aune Leppen, un woo sull de Farao opp mie hieren?
Currently Selected:
2. Mose 6: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
