2. Mose 30

Heilichtum: de Ruakopfa-Aultoa

1Un du saust eenen Rieekja Aultoa moaken toom rieekjren, von Akozjeholt saust du am moaken; 2eene Elle siene Lenj, un eene Elle siene Breed, veakauntich saul hee sennen un twee Ellen huach; ut eenem Stekj met am sellen siene Hieena sennen. 3Un äwatrakj am met reinem Golt, sien Dakjsel un siene Wenj runtom un siene Hieena; un moak am eene Leest runtom von Golt. 4Un moak twee goldne Rinj unja siene Leest: Aun siene beid Sieden saust du dee moaken, aun siene beid Wenj; un dee sellen fa de Stangen sennen, om am doamet too droagen. 5Un moak de Stangen von Akozjeholt un äwatrakj dee met Golt. 6Un du saust am ver dän Väahank stalen, dee ver de Zeichnislod es, däm Dakjsel jäajenäwa, daut äwa däm Zeichnis es, woa ekj met die toopkomen woa. 7Un Aaron saul gootrikjendet Rieekjastoff (Weiruak, seeta Ruak) opp am rieekjren; jieda Morjen, wan hee de Laumpen reedmoakt, saul hee daut rieekjren; 8un wan Aaron de Laumpen aunstekjt tweschen de Owendstunde, saul hee daut rieekjren: Een bestendjet Rieekjastoff (Weiruak, seeta Ruak) ver Gott bie june Jeschlajchta. 9Jie sellen kjeen framdet Rieekjastoff (Weiruak, seeta Ruak) opp am opfren, noch Brauntopfa, noch Speisopfa; un kjeen Drinkjopfa sell jie opp am jeeten. 10Un Aaron saul eenmol em Joa fa dee Hieena Veseenunk doonen met däm Bloot vom Sindopfa de Veseenunk; eenmol em Joa saul hee Veseenunk fa am doonen bie june Jeschlajchta: Huachheilich es hee däm Harn.

Heilichtum: daut Veseenungsjelt

11Un de Har räd too Moses un säd: 12Wan du de Zol de Kjinja Israel oppnämen woascht no äarem Tooproopen, soo saust du an bie äarem Tooproopen een jiedra een Leesjelt fa siene Seel däm Harn jäwen, daut kjeene Ploag unja an bie däm Tooproop entsteit. 13Dit sellen see jäwen, dee derch däm Tooproop jeit, de halft von eenem Schekel, nodäm Schekel von Heilichtum - (20 Gera de Schekel), de halft von eenem Schekel aus Häwopfa däm Harn. 14Jiedra dee derch däm Tooproop jeit em Ella von 20 Joa un doaräwa, saul daut Häwopfa däm Harn jäwen. 15De Rikja saul nich mea jäwen, un de Oama nich weinja aus de halft von eenem Schekel, wan jie daut Häwopfa däm Harn jäwen, om Veseenunk to doonen fa june Seelen. 16Un du saust daut Veseenungsjelt vonne Kjinja Israel nämen un daut fa däm Deenst em Zelt de Bejäajnunk jäwen; un daut saul de Kjinja Israel toom Jedajchnis ver Gott sennen, om Veseenunk to doonen fa june Seelen.

Heilichtum: de Wauschkommen

17Un de Har räd too Moses un säd: 18Moakt junt eene Komm von Koppa un sien Jestal von Koppa toom Wauschen; un stal daut opp tweschen däm Zelt de Bejäajnunk un däm Aultoa un doo Wota doa nenn. 19Un Aaron un siene Säns sellen äare Henj un äare Feet doabennen wauschen. 20Wan see en daut Zelt de Bejäajnunk nengonen, sellen see sikj met Wota wauschen, daut see nich stoawen, ooda wan see nom Aultoa noda komen toom Deenst, om däm Harn een Fiaopfa too rieekjren. 21Un see sellen äare Henj un äare Feet wauschen, daut see nich stoawen; un daut saul an eene eewje Sazunk sennen, am un sienem Somen bie äare Jeschlajchta.

Heilichtum: daut Eelj toom saulwen un Weiruak brennen

22Un de Har räd too Moses un säd: 23Un du, nemm die de baste Jewerzen: 500 Schekel selfst utjerande Murren, un haulf soo väl Kerneel, 250, un 250 Balsamrua, 24un Kassia 500, nom Schekel vom Heilichtum, un een Hin Eeljboom Eelj; 25un moak doarut een Eelj de heilje Saulwunk, eene Mischunk von jewerts Saulw, een Woakj vom Saulwmischa; daut saul een Eelj de heilje Saulwunk sennen. 26Un doamet saust du daut Zelt de Bejäajnunk un de Zeichnislod saulwen, 27un däm Desch un aul sien Jereetschoft, un de Laump met Jestal un sien Jereetschoft un däm Ruakaultoa, 28un däm Brauntopfa-Aultoa un aul sien Jereetschoft un de Komm toom wauschen un sien Jestal, 29un du saust dee heilje; un dee sellen huach heilich sennen: Aules, waut see aunrieren, woat heilich sennen. 30Un Aaron un siene Säns saust du saulwen un saust an heilje, om an mie too Priesta weien. 31Un to de Kjinja Israel saust du soo räden: Een Eelj dee heilje Saulwunk saul mie dit sennen bie june Jeschlajchta. 32Opp kjeen Menschenlief saul maun daut jeeten, du saust uk en dise mischunk kjeent fa junt moaken; dan daut es heilich, heilich saul junt daut sennen. 33Wäa daut nomoakt ooda eenem Framden doavon jeft, dee saul ut sienem Volkj utjerot woaren.

34Un de Har räd too Moses: Nemm die gootrikjende Jewerzen, Stakte un Ruakmuschel un Galban, gootrikjende Jewerzen un reinen Weiruak; von aulem jlikje väl saul daut sennen. 35Un moak Rieekjastoff (Weiruak, seeta Ruak) doarut, no de Konst vom Saulwmischa, jesolten, rein, heilich. 36Un veriew doavon too Pulwa, un laj doavon ver däm Zeichnis en daut Zelt de Bejäajnunk, woa selfst ekj met die toopkomen woa; huach heilich saul junt daut sennen. 37Un daut Rieekjastoff (Weiruak, seeta Ruak), daut du moaken saust, no sienem Bestaundverältnis sell jie junt daut nich moaken; heilj däm Harn saul daut sennen. 38Wäa daut nomoakt, om doaraun too rikjen, dee saul ut sienem Volkj utjerot woaren.

Currently Selected:

2. Mose 30: PBJHF

Highlight

Copy

Compare