2. Mose 15
15
Moses un Israel sinjen daut Leet de Radinj
1Donn sungen Moses un de Kjinja Israel dit Leet däm Harn un säden aulsoo: Ekj well däm Harn sinjen, huach haft hee sikj jewäsen; daut Pieet un siene Rittasch haft hee em Mäa jeschmäten.
2Miene Krauft un mien Jesank es Jah, dan hee es mie to Radinj jeworden; disa es mien Gott, un ekj well am veharlichen, mien Voda sien Gott, un ekj well am erhäwen.
3De Har es een Kjrichsmaun, Gott es sien Nomen.
4De Woages vom Farao un siene Häamacht haft hee em Mäa jeschmäten, un siene uterwälde Woagenkjampfa sent em Schelpmäa vesunken.
5De Streem bedakjten an, see sent aus een Steen oppem Grunt raufjefoaren.
6Diene Rajchte, Har, es harlich aun Macht; diene Rajchte, Har, haft däm Fiend veschmatat.
7Un en diene groote Huagheit hast du doljeräten, dee sikj jäajen die erhäwen; du leetst dienen Oaja loos; de haft an aus Stoppel vebrent.
8Un derch däm schnuwe ut diene Näs stalt sikj daut Wota opp, daut stunden de Streem aus een Daum, daut jeronne de Streem em Hoaten de Mäare.
9De Fiend säd: Ekj well an nojoagen, ennholen, Raup deelen; mien Jia saul aun an saut woaren; ekj well mien Schwieet uttrakjen, miene Haunt saul an vetiljen.
10Du blosd met dienem Odem - daut Mäa bedakjt an; see jinjen unja aus Blie enne jewaultje Wota.
11Wäa es aus du unjre Jetta, Har! Wäa es aus du, harlich en Heilichkjeit, furchtboa aun Riem, vollbrinjt Wunda!
12Du strakjst diene Rajchte ut - de Ieed veschlukt an.
13Du hast derch diene Jnod daut Volkj jeleit, daut du erleest hast, un derch diene stoakje Haunt no diene heilje Wonunk jefieet.
14De Velkja hieeden daut, see bäbde; Angst pakt de Filista äare Bewona.
15De Ferschten von Edom worden enjstlich; Moab siene Stoakje, an pakt Bäben; daut vezoagde aule Bewona von Kanaan.
16Schrakj un Angst äwafoll an; wäajen dienen groote Oarm worden see aus Steena stomm, bat dien Volkj derch jinkj, daut du erwält hast.
17Du woascht an brinjen un plaunten oppem Boajch - dienem Oawgoot, de Städ, dee du, Har, too diene Wonunk jemoakt, daut Heilichtum, Har, daut diene Henj reedjemoakt ha.
18De Har woat Kjennich sennen emma un eewich!
19Dan de Pieed vom Farao met siene Woages un met siene Rittasch sent em Mäa omjekomen, un de Har haft daut Mäareswota äwa an trigj jefieet; un de Kjinja Israel jinjen oppem Drieejen medden derch daut Mäa.
20Un Mirjam, de Profeetin, Aaron siene Sesta, neem de Tamburin en äare Haunt; un de Frues jinjen ut, hinja ar häa, met Tamburin un en Reijen.
21Un Mirjam auntwuad an: Sinjt däm Harn, dan huach erhowen es hee; daut Pieed un sienen Ritta haft hee em Mäa jeschmäten!
Israel en Mara un Elim
22Un Moses leet Israel vom Schelpmäa wiedagonen, un see jinjen no de Wieste Sur; un see waundaden dree Doag enne Wieste un fungen kjeen Wota. 23Un see kaumen no Mara; oba see kunnen daut Wota von Mara nich drinkjen, dan daut wia betta: Doarom jeef maun am däm Nomen Mara. 24Un daut Volkj murrd jäajen Moses un säd: Waut sell wie drinkjen? 25Un hee schrieech toom Harn, un de Har wees am een Holt; un hee schmeet daut em Wota, un daut Wota wort seet. Doa stald hee am Sazungen un Rajcht, un doa vesocht hee an; 26un hee säd: Wan du wellich oppe Stemm det Harn, dienem Gott, hieren woascht, un doonen, waut rajcht en siene Uagen es, un jehorchen woascht opp siene Jebooten un hoolen aule siene Sazungen, soo woa ekj kjeene Krankheiten opp die lajen, dee ekj oppe Ägipta jelajcht ha; dan ekj sie de Har, dee die heelt.
27Un see kaumen no Elim, un doa wieren 12 Wotakjwalen un 70 Paulmbeem; un see loagaden sikj doa aum Wota.
Currently Selected:
2. Mose 15: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
