Esta 9
9
De Juden äa Racheewen aun äare Fiend – Daut Puriemfast
1Un em 12-ten Moonat, daut es de Moonat Adar, aum 1dredden Dach, aus daut Kjennichswuat un sien Befäl sull utjefieet woaren, aun däm Dach, doa de Juden äare Fiend jehopt hauden, an too äwawaultjen, oba daut dreid sikj soo, daut de Juden, äare Haussa äwawaultjen sullen, 2doa vesaumelden sikj de Juden en äare Städa, en aule Launtschoften vom Kjennich Ahasveros, om de Haunt aun dee too lajen, dee äa Onjlekj sochten. Un kjeena kunn ver an bestonen, dan de Angst fa an wia opp aule Velkja jefollen. 3Un aule Ferschten de Lenda un de Bowaschte un de Launtfläaja un de Aumtsmanna vom Kjennich unjastäten de Juden; dan de Angst ver Mordechai wia opp an jefollen. 4Dan Mordechai wia groot em Kjennichshus, un sien Roop jinkj derch aule Lenda; dan de Maun Mordechai wort emma jrata.
5Un de Juden schluagen unja aul äare Fiend met daut Schwieet un warjde un brochten an om, un see deeden aun äare Haussa no äarem jefaulen. 6Un enne Burjch Susan brochten de Juden 500 Maun om. 7Un see brochten om Parschandata un Dalfon un Aspata, 8un Porata un Adalja un Aridata, 9un Parmaschta un Arisai un Aridai un Wajesata, 10de 10 Säns von Haman, vom Hammedata sienem Sän, däm Fiend de Juden; oba aun däm Raup läden see äare Haunt nich aun.
11Aun däm seljen Dach kaum de Zol de Omjebrochten enne Burjch Susan ver däm Kjennich. 12Un de Kjennich säd to de Kjennijin Esta: Enne Burjch Susan ha de Juden 500 Maun un de 10 Säns von Haman omjebrocht. Waut ha see enne äwaje Lenda vom Kjennich jedonen? Waut es nu diene Bedd? Daut saul die jejäft woaren. Un waut wenschst du noch? Un daut saul erfelt woaren. 13Un Esta säd: Wan daut däm Kjennich rajcht es, soo woat uk morjen de Juden, dee en Susan sent, erlaubt, nom Befäl von vondoag to doonen; un de 10 Säns von Haman henjt maun aum Holt. 14Doa befool de Kjennich, daut et aulsoo passieren sull; un de Befäl wort en Susan jejäft, un maun henjd Haman siene 10 Säns opp. 15Un de Juden, dee en Susan wieren, vesaumelden sikj uk aum 14-den Dach em Moonat Adar un brochten en Susan 300 Maun om; oba aun däm Raup läden see äare Haunt nich aun.
16Un de äwaje Juden, dee en de Lenda vom Kjennich wieren, vesaumelden sikj un stunden fa äa Läwen un veschaufte sikj Ru ver äare Fiend; un see brochten unja äare Haussa 75 000 om; oba aun däm Raup läden see äare Henj nich aun. 17Daut wia aum 1dredden Dach em Moonat Adar; un aum 14-den em Moonat reiwden see, un see muaken am to eenem Gaustmoldach un Freid. 18Oba de Juden, dee en Susan wieren, hauden sikj aum 1dredden un aum 14-den em Moonat vesaumelt; un see reiwden aum 15-den Dach un muaken am toom Gaustmoldach un Freid. 19Doarom fiade de Juden, de Launtbewona, dee enne opne Städa wonen, däm 14 Dach em Moonat Adar aus däm Dach de Freid un daut Gaustmol, un aus eenen Fastdach, woa maun eenaunda Jeschenkja schekjt. 20Un Mordechai schreef dise Bejäwenheit opp. Un hee schekjt Breew aun aule Juden, en aule Lenda vom Kjennich Ahasveros, de dicht- un wiet wieren, 21om faust too saten, daut see däm 14-den un däm 15-den Dach em Moonat Adar jieda Joa fieren sullen, 22aus dee Doag, aun dee de Juden Ru ver äare Fiend jekjräajen hauden, un aus däm Moonat, woa an Kumma en Freid, un Trua en eenem Fastdach vewaundelt wia – daut see dee fieren sullen aus Doag de Gaustmol un Freid, woa maun eenaunda Jeschenkja schekjt un de Oame beschenkjen saul.
23Un de Juden muaken sikj daut, waut see to doonen aunjefongen hauden un waut an Mordechai väajeschräwen haud, too Jewanheit. 24Dan Haman, Hammedata sien Sän, de Agagita, de Fiend von aule Juden, haud jäajen de Juden däm Aunschlach jeplont, an omtobrinjen, un haud daut Pur, daut Loss, jeschmäten, om an too vetiljen un an omtobrinjen. 25Un aus daut ver däm Kjennich kaum, befool hee derch eenen Breef, daut sien Beesa Aunschlach, däm hee jäajen de Juden jeplont haud, opp sienem Kopp trigjkaum; un maun henjd am un siene Säns aum Holt. 26Doarom nand maun dise Doag Puriem, nom Nomen von Pur (Loss). Doawäajen, wäajen aule Wieed en disem Breef, soo aus daut, waut see selfst doavon jeseenen hauden un erfoaren hauden, 27saden de Juden faust un neemen opp sikj un opp äare Nokomen un opp aule, dee sikj an aunschlooten, aus eene eewje Sazunk, dise beid Doag too fieren, nodäm, waut doaräwa jeschräwen worden wia, un no äare bestemde Tiet, Joa fa Joa; 28un daut dise Doag em Aundenkjen bliewen un jefiat woaren sellen en jiedren eenselnen Jeschlajcht, en jiedre eenselne Famielje, en jiedren eenselnen Launt un en jiedre eenselne Staut; un daut dise Purim Doag unja de Juden nich unjagonen, un äa Aundenkjen nich opphieren sull bie äare Nokomen (Jeschlajchta).
29Un de Kjennijin Esta, Abichail siene Dochta, un Mordechai, de Jud, schreewen met aulem Nodruck, om disem tweeden Breef äwa de Puriem faust too saten. 30Un hee schekjt Breew aun aule Juden, en de 127 Lenda, von Ahasveros sienem Kjennichrikj, Wieed von Fräd un Woarheit, 31om dise Puriem Doag aun äare bestemden Tieden faust too saten, soo aus Mordechai, de Jud, un de Kjennijin Esta daut an faust jesat hauden, un aus see daut fa sikj selfst un fa äare Nokomen faust jesat hauden, nämlich de Aunlidjen toom Fausten un äare Weekloagen. 32Un de Befäl von Esta sad dise Purim-Aunlidjen faust, un daut wort en een Buak jeschräwen.
Currently Selected:
Esta 9: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
