Esta 8
8
Mordechai erhowen – Befäl toom Schutz de Juden
1Aun däm seljen Dach jeef de Kjennich Ahasveros de Kjennijin Esta däm Haman sien Hus, vom Fiend de Juden. Un Mordechai kaum ver däm Kjennich, dan Esta haud am daut jesajcht, waut hee fa ar wia. 2Un de Kjennich neem sienen Säajelrinkj auf, däm hee Haman wajchjenomen haud, un jeef am däm Mordechai. Un Esta sad Mordechai äwa Haman sien Hus.
3Un Esta räd wada met däm Kjennich un foll am to Feet; un see hield un bedd am, de Boosheit von Haman, däm Agagita, un sienen Aunschlach, däm hee jäajen de Juden jeplont haud, auftodreien. 4Un de Kjennich rieekjt Esta daut goldne Zepta entjäajen. Doa stunt Esta opp un kaum ver däm Kjennich; 5un see säd: Wan daut däm Kjennich rajcht es, un ekj Jnod ver die (am) jefungen ha, un de Sach ver däm Kjennich rajcht es un ekj am jefaul, soo woat jeschräwen, de Breew trigjtonämen, nämlich däm Aunschlach von Haman, vom Hammedata sienem Sän, däm Agagita, dee hee jeschräwen haud, om de Juden omtobrinjen, dee en aule Lenda vom Kjennich sent. 6Dan woo kunn ekj daut Onjlekj aunseenen, daut mienem Volkj trafen wudd? Un woo kunn ekj däm Unjagank von mienem Jeschlajcht aunseenen? 7Un de Kjennich Ahasveros säd to de Kjennijin Esta un to Mordechai, däm Jud: Kjikj, daut Hus von Haman ha ekj Esta jejäft, un am haft maun aum Holt jehongen, doarom daut hee siene Haunt aune Juden jelajcht haft. 8Soo schriewt jie nu em Nomen vom Kjennich betrafs de Juden, aus junt daut rajcht es, un vesäajelt daut met däm Säajelrinkj vom Kjennich. Dan eene Schreft, dee em Kjennichsnome jeschräwen un met däm Säajelrinkj vom Kjennich vesäajelt es, kaun nich oppjehowen woaren.
9Doa worden de Kjennichsschriewa jeroopt, aun dee selje Tiet em dredden Moonat, daut es de Moonat Siwan, aum 23-sten däm seljen Dach; un daut wort no aulem, waut Mordechai befool, aun de Juden jeschräwen, un aun de Ferschten un de Launtfläaja un de Ferschten de Lenda, dee von Indien bat Ätiopien wieren, 127 Lenda, no äare Schreft de eenselne Lenda un no de Sproak von jiedren eenselnen Volkj; un uk aun de Juden no äare Schreft un äare Sproak. 10Un hee schreef em Nomen vom Kjennich Ahasveros un vesäajeld met däm Säajelrinkj vom Kjennich; un hee schekjt Breew derch Rittabote, dee oppem Kjennich siene Ranpieed rieden, 11daut de Kjennich äwa de Juden, dee en aule Städa sent, erlaubt haft, sikj too vesaumlen un fa äa Läwen too stonen, too vetiljen, auftowarje un omtobrinjen aule Häamacht de Velkja un Lenda, met äare Kjinja un Frues, dee an bedrenjden un äa Hab un Goot plindre wullen; 12aun eenem Dach en aule Lenda vom Kjennich Ahasveros, aum 1dredden Dach em 12-ten Moonat, daut es de Moonat Adar. 13Un doamet daut de Befäl en jiedrem eenselnen Launt bekaunt wort, wia eene Aufschreft vonne Schreft aule Velkja bekaunt jemoakt, un zwoa doamet de Juden opp disem Dach reed wieren, sikj aun äare Fiend too rajche. 14De Rittabote, dee oppe Kjennichs Ranpieed rieden, jinjen schwind opp daut Kjennichswuat ut. Un de Befäl wort enne Burjch Susan vemald.
15Un Mordechai jinkj en Kjennichskjleeda rut vom Kjennich, en purpurblaue un witte Boomwoll, un met eene groote Goldne Kroon, un en eenem Mauntel von witte Boomwoll un roodem Purpur; un de Staut Susan jubelt un wia froo. 16De Juden wia Licht un Freid un Jubel un Iea toom Deel jeworden. 17Un en jiedrem eenselnen Launt un en jiedre eenselne Staut, wuahan daut Kjennichswuat un sien Befäl kaum, wia Freid un Jubel bie de Juden, Gaustmol un Fastdach. Un väle ut de Velkja de Lenda worden Juden, dan de Angst ver de Juden wia opp an jefollen.
Currently Selected:
Esta 8: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
