Camba 47

Yaŋhooɓa na ɓi kahan ce ŋ Gosen

1Wa Yuusufa ƴut woo na ɓi kahan ɓa, a kaɗta ŋ Firawnaana a woosa ɗe ne : « Baab ɓoo na taambɗoh ciŋ ngo pulohiɗ Kanaan, ɓa ɗaa ŋ Gosen na ɗoopaat caŋ ɓa na raak-raakaŋ ɓa jen. »

2Yuusufa huneen na yatuus ŋ taambɗoh ciŋ ɗe, ne ɓa teekɗukoh na Firawnaana. 3Firawnaana meekissa ɓa ne : « Pangkiŋ ɗu wa ye ? » Ɓa loffa ɗe ne : « Ɓoo niiɗoh, kilifaani, findi caacuuciŋ ɓoo. 4Ɓoo hay ne ɓoo nikohaah ŋ kur ki, laam aɗi miskiɗ lool ŋ kur kaŋ Kanaan, po ɓoo raakisɗi ɗiski ɓoo niiɗan ɗoopaat ciŋ ɓoo. Ɓoo na kiimee ɗa ne fu on ɓoo, ɓoo nik ŋ Gosen. » 5Firawnaana woosa Yuusufa ne : « Baab ɗu na taambɗoh ciŋ ɗa hayiɗ nga ɗa. 6Kur ki weɗi ŋ yaah ciŋ ɗa, ɓayaa ɓa ŋ ɗiski uup baah nga, ɓa nik ŋ Gosen ; te fu hot miniɗ niiɗ nga ɓa ɗah, fu eɗ ɓa ɗoopaat ciŋ ngo. » 7Yuusufa nammba ɓay baab ɓa ne a teekɗukoh na Firawnaana.

Yaŋhooɓa barke'iɗta ɗe, 8yeem hannda ɗe meekis ne : « Fu raak kiis hend na ? » 9Yaŋhooɓa woosa ɗe ne : « Kiis teemet na kiis ndaŋkiyaah-kaahay (130) ceɗi cii, mi yii wil ŋ kur ci, ca kiis gaawiɗ te ca miskiɗ. Ŋ raakɗi kiis ci caacuuciŋ ngo raakee ndoom te ɓa namee nik tiindoh findiiso. » 10Ƴutta, a barke'iɗta Firawnaana, a cootta.

11Ƴutta, Yuusufa ɓayya baab ɓa na taambɗoh ciŋ ɗe, a daliɗta ɓa ŋ Ramses, ŋ ɗiska uup baah ŋ Misra, findi Firawnaana nakoh ɗe wa. 12A nammba ɓa eɗ ñamaah, baab ɓa na taambɗoh ciŋ ɗe na ɓi kahan baab ɓa, yaa nu nga ɗah findi kuɓuuciŋ ɗe hend.

Findi ɓi Misra moocoh na aɗa

13Aɗa miskeen lool po ali kañam raakisɗi ŋ Misra na Kanaan, ɓooɓa looffa keeh-keeh sagu aɗuk ; 14Yuusufa nangɗohha haalsaŋ Kanaan na waŋ Misra jen, wa ɓa romohe bele, a ɓayyaa kahan Firawnaana.

15Wa kaɗta po ali haalis raakisɗi ŋ Misra na Kanaan, ɓi Misra jen hayya ŋ Yuusufa ɓa woosa ɗe ne : « Hanaa fu heyɗi ɓoo markiɗe po ɓoo kaan ŋ aɗi. Eɗa ɓoo pesoha laam ɓoo raakisɗi ali haalis romoha. » 16Yuusufa woosa ɓa ne : « Nik ne ɗu raakisɗi haalis ɗah, ɓayaat ɗoopaat ciŋ ɗu, ŋ lofiɗ ɗu ca pesoha. » 17Weɗi ɓa ɓayoh panis caŋ ɓa, mbaal ca, pe' ca, inoh ca na mbaam ca jen, ɓa eɗeeɗa Yuusufa ca, a lofɗeeɗa ɓa ca bele. Ɓa raakka pesoha ŋ kiis kaam.

18Wa kiis ka reeh, ɓa hayissa ŋ Yuusufa ɓa woyissa ɗe ne : « Kilifaani, fu inhiɗ ne ɓoo raakisɗi haalis te ɗoopaat ciŋ ɓoo ceɗi na ɗa, ɓoo tasɗisɗi ali in romoha, nikɗi faan ciŋ ɓoo na keheƴ ciŋ ɓoo ɗah. 19Hanaa fu heyɗi ɓoo markiɗe, po ɓoo kaan na aɗ, yohon ciŋ ɓoo kasaara. Romoha ɓoo pees, ɓoo na yohon ciŋ ɓoo, ɓoo nik ñaam ciŋ Firawnaani. Eɗa ɓoo tisoh, ɓoo min pes, keheƴ ci nikuu ɓarang ɓarang. »

20Weɗi Yuusufa romɗoh Firawnaana kehƴaŋ Misra jen. Yaa nu nik ŋ Misra ɗah, toonnda yohon ce sagu miska aɗa miske. Merhey maŋ kur ka jen nikka wuu Firawnaana kotii, 21Yuusufa tummba ɓa gen nga ñaam ɓak po ɓak ŋ kur ka#47:21 Raakiɗ fiis ŋ fiis ci ɗeɓgaan, ci woo ne : "Yuusufa nangɗohha ɓooɓa jen ŋ kur ca yakak ca.". 22Keheƴ caŋ seeƴkiɗoh#47:22 seeƴkiɗoh : ɗeɓgaan, ɓooɓa meeɗ meeɗ seeƴuk ne ɓa ñaamuk Kooh. Ngaŋ waasiŋ Musaa, e Aaruna, yakak Musaa, na ɓi rimkoh nga ɗe, ɓeɗ nikee seeƴkiɗoh ci. Ɓa meeɗ seeƴuk wuu Kooh, ŋ tiikiŋ cuuɓi jen. Ɓa meeɗ seeƴuk ne Kooh ɗaas ɓa bakaaɗ ciŋ ɓa, wala ɓa corkiɗee ɗe, wala ɓa yakɗee ɗe. Wa ɓooɓa camb ñaamuk kooh ci nikaaɗiici, ɓa namee nam seeƴuk, te ɓooɓi adgohee seeƴkeem, ɓa namee ɓeeɗkohu seeƴkiɗoh. Seeƴkiɗoh cii, ɓa seeƴkiɗoh wuu Kooh haa, ɓa seeƴkiɗoh ciŋ kooh ciŋ ɓi Misra ŋ jamanoonaam. ca dong ceɗ Yuusufa tasee rom laam, ɓa raakeen pesoha sagu ina Firawnaana meeɗ ɓa waɗ ; weɗ tah ɓa tooneeɗi yohon caŋ ɓa.

23Yuusufa woosa ɓooɓa ne : « Ɗiski wa nik ndii, ɗu romuuɗ, a Firawnaani raak ɗu na keheƴ ciŋ ɗu. Tisoh ceɗi cii, sokaat yohon ci, 24waaye yatuus nu pul nga ɗah, a Firawnaani raakan yinoori, ɗu raak nikiis ci tas, ɗu puliɗ tisoh nga, ɗu nam raak pesoha, ɗu na kuɓuuciŋ ɗu na ɓi gen na ɗu jen. » 25Ɓa woosa ne : « Kilifaani, ɓoo teyɗukiɗ nik ñaam ciŋ Firawnaani laam fu baahohiɗ ɓoo te fu mucɗiɗ ɓoo. » 26Yuusufa tufkiɗoh ineem ɗaa ŋ Misra ŋ jamanoonaam te wa ris nga po ɗiski maa woyohe na ɗu ndii. Yatuus nu nguɗohu ŋ keheƴ ciŋ Misra ɗah, a Firawnaani na raake yinoori po tas keheƴ ciŋ seeƴkiɗoh ci laam a raakɗi ca.

Dengkohaŋ Yaŋhooɓa

27Ŋ ini kaɗ ŋ Israayel ci, ɓa risee ŋ Misra, ŋ kur ka na woyse Gosen, ɓa ɓasilla nga lool te ɓa raakka keheƴ nga. 28Yaŋhooɓa tumiɗ kiis ndaŋkiyaah na kiis yasna-kanak (17) ŋ Misra. Ini a pes jen wa kiis teemet na kiis ndaŋkiyaah-nikiis na kiis yasna-kanak (147).

29Wa Israayel kaɗ po a inahha ne kakaan kiŋ ɗe usisɗi, a ɓeeɗukka kuɓkiŋ ɗe Yuusufa, a woosa ɗe ne : « Nik ne fu kerhiɗiɗ to ɗah, ooɓa yaahiŋ ɗa ŋ rambiŋ ngo, fu giñ ne ŋ kaan ɗah, fu hey yo baahohe po, fu uumbuu so ŋ Misra, 30waaye fu hey yo ɓaye po ŋ ɗiska caacuucaŋ ngo uumbu, fu uumb mbo nga. » Yuusufa loffa ɗe ne : « Ŋ hey ɗa tumɗe findi fu woyoha. » 31Israayel woosa ne : « Giñiɗ to ineem. » A ginnjaa. Ndeem Israayel yippa pukiŋ ɗe ŋ haf fiƴaangaŋ ɗe, a ñaamukka Kooh.

Currently Selected:

Camba 47: YM

Highlight

Copy

Compare