Camba 37
37
Heeƴ ciŋ Yuusufa
1Ŋ ini kaɗ ŋ Yaŋhooɓa, a nikee ŋ Kanaan ŋ kur ka baab ɓa genohaahe. 2Inii weɗ naandsuku ŋ Yaŋhooɓa na kahan ce. Wa kuɓkiŋ ɗe Yuusufa raak kiis ndaŋkiyaah na kiis yasna-kanak (17), a meeɗee hun na taambɗoh ciŋ ɗe, ɓa niiɗee mbaal ca na pe' caŋ baab ɓa. A nikee komaaki, a meeɗta hun na kuɓuuciŋ Bilha na ɓiŋ Silpa, ɓitiɓ ciŋ baab ɓa. Taambɗoh ciŋ ɗe tummba in moɗaaɗi ɗah, a woo baab ɓa wa. 3Israayel raakee ɗe ŋ kiyaɓkookaŋ ɗe, tahha po a yi a uupee waaɗ ŋ kuɓuuciŋ ɗe jen. A haɓɗiɗta ɗe kulɓa moɗoh na moɗoh. 4Taambɗoh ciŋ ɗe hotta ne baab ɓa uupee ɗe waaɗ, weɗi tahee ɓa sang ɗe po, ɓa mineeɗi woo na ɗe sah, woo moɗoɗ.
5Wa kaɗeeɗa po, Yuusufa heeƴca, a naandsukka taambɗoh ciŋ ɗe wa, ɓa uuppa ɗe nga sang. 6A woo ɓa ne : « Sikɗukaat ini ŋ heeƴ. 7An ɓoo nikee ŋ yohon ca, ɓoo tokeeɗa bele, ɗekka po ɗufiŋ ngo tufukka, ciŋ ɗu willaa, ca ƴekɗeeɗaa. » 8Taambɗoh ciŋ ɗe woosa ɗe ne : « Fu waaɗ woo ne a fu na hee nike buuriŋ ɓoo e ? Fu yilif ɓoo e ? » Tahha po ɓa uuppa ɗe sang, sagu heeƴ caŋ ɗe na in ca a woyee nga.
9Wa Yuusufa heeƴis, a naandsukissaa taambɗoh ciŋ ɗe an : « Hee ! Ŋ heeƴissiɗ nohi na caɓni na hor ndaŋkiyaah na yino ƴekɗeeɗa so. » 10A nammbaa naandsuk baab ɓa, yeem ngassa ɗe an : « Fu heeƴ ye weem ? Fu liiɓiɗ ne mi na yaay ɗu na taambɗoh ciŋ ɗa, ɓoo hey ɗa ƴekɗe e ? » 11Taambɗoh ciŋ Yuusufa ayrukka ɗe, Yaŋhooɓa ɗaakohha heeƴ ceem nof.
Taambɗoh ciŋ Yuusufa tooniɗ ɗe
12Wa raakeen jamano, taambɗoh ciŋ Yuusufa kaɗta mangaana na gataŋ baab ɓa ŋ ɓak kur ka na woyse Sisem. 13-14Mbeh, Israayel woosa kuɓkiŋ ɗe Yuusufa ne : « Haya ŋ woos ɗa, fu marka taambɗoh ciŋ ɗa ŋ Sisem, ndah ɓa ɗaa ŋ jam na ɗoopaat ca. In nu raak nga ɗah, fu woo so. » Yuusufa woosa ɗe ne : « Ee. » A tuuƴca Yuusufa, yeem pulohha Oonaŋ-Hebron, a rappa ŋ ɓak Sisem. 15Ƴaar cohha na ɗe wiltiɗoheeɗa ŋ bilaf fa, a meekissa ɗe ne : « Fu na waake ye ? » 16Yuusufa woosa ɗe ne : « Mi na marke taambɗoh ciŋ ngo, fu miniɗ to woo ɗiski ɓa na niiɗohe e ? » 17Ƴaara loffa ɗe ne : « Ɓa kurkiɗ ndii, ŋ kerhiɗ ɓa woyeeɗa ne ɓaa kee Dotan. » Yuusufa kaɗta ɓa raaka ŋ Dotan.
18Wa taambɗoh ciŋ ɗe ƴok ɗe hayeeɗa, bala a reyan nga ɓa ɗah, ɓa waakohha ɗe ap. 19Ɓa woytiɗohha ŋ harmban ɓa ne : « Heɗ heeƴ ci a yoon na haye. 20Ɓoo apaat ɗe, ɓoo ɓek ɗe ŋ ngurtut. Hey ɗah, ɓoo woo ne a ɗoopaat saahiɗ ap ɗe ; ɓoo marak findi heeƴ ciŋ ɗe na hee mirndohe. »
21Wa Ruben kerah ineem, a waaɗta muciɗ Yuusufa, a woosa ɓa ne : « Ɓoo kanaat ɗe ap. » 22A degga nga ne : « Kanaat aam ñif, ɓekaat ɗe ŋ ngurtuta ŋ bilaf fa ween, yaah ciŋ ɓoo degkuu ɗe. » A woosa ɓa ineem ne a min ɗe muciɗ po a wik ɗe baab ɓa.
23Wa Yuusufa ree, ɓa ammba ɗe, ɓa wolissa kulɓaakaŋ ɗe moɗohngaana, 24ɓa njaffa ɗe ŋ ɗooƴ ngurtuta. 25Ƴutta ɓa ɓooffa ne ɓa ñam. Ɗekka po ɓa hotta Ismaayla-Ismaaylaaca huniɗ, pulohiɗ Galaad na ngeelemb caŋ ɓa sifiɗ ɓi toon findi cuuraay, daakaande na diw faan, ɓa kaɗeeɗa Misra. 26Yudaa woosa taambɗoh ciŋ ɗe ne : « Wa raakiɗ ɓoo winde etoh, ɓoo ap taambɗoh ɓoo po ƴut, ɓoo ɗasɗohee wa ? 27Ismaayla-Ismaaylaaca ɓeɗɗeen na haye, ɓoo toonaat ɓa ɗe, ɓoo apuu ɗe laam, e ɓoo ɓaah ñif, a taambɗoh ɓoo. » Ɓa hunnda nga.
28Wa toonoh ca ree, tel ɓa puloh kur ka na woyse Majaan, ɓa puliɗta Yuusufa ŋ ngurtuta, ɓa toonohha ɓa ɗe ƴel haalis ndaŋkiyaah-kanak (20) ; Ismaayla-Ismaaylaaca cootta na ɗe Misra.
29Wa Ruben wiiruk ngurtuta, a hotta ne Yuusufa nikisɗi nga, keeñaŋ ɗe reehha, a faarra kulɓaacaŋ ɗe. 30A kaɗta ŋ taambɗoh ciŋ ɗe, a woosa ɓa ne : « Cooy, Yuusufa nikisɗi ndaam ! Ŋ tuman na ? » 31Ɓa hoossa suket, ɓa tahha'iɗta kulɓaakaŋ Yuusufa na ñif ma. 32Ƴutta ɓa kommba baab ɓa wa, ɓa woosa ɗe ne : « Inii, ɓoo paraha parah, wa kulɓaakiŋ kuɓkiŋ ɗa haa e ? » 33Yaŋhooɓa inhissaa, a woosa ne : « Marka ! A ɗoopaat saahiɗ sifiñsoh ɗe, cooy, Yuusufa sifiñsohuuɗ ! »
34Wa Yaŋhooɓa inhis kulɓaaka, weɗi a faaroh kulɓaacaŋ ɗe, a ɓekukka daah, a ruyiɗta kuɓkiŋ ɗe neeh laayiɗ. 35Kuɓuuciŋ ɗe jen, ƴaar na ɓitiɓ giifɗeeɗa ɗe, waaye a sannga, a woosa ne : « Ŋ nikan ŋ ruy po mbaɗna maa hee ɗe raake ŋ Jaanim. » A taalndiɗta, a fuɗeeɗa kuɓkiŋ ɗe.
36Ŋ ini kaɗ ŋ Majaan-Majaan ca ɓayee Yuusufa Misra, ɓa toon ɗe Potifaar, ƴaara adgohee dag caŋ Firawnaana.
Currently Selected:
Camba 37: YM
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc
