1 Korenta 9

Pool faɗiɗ ini waas on ɗe ŋ pangkiŋ ki'apootarkiŋ ɗe

1Ɗu inhiɗ ne ñam raak haf fo. Ɗu inhiɗ ne ŋ Apootar, ŋ hotiɗ Yeesu, Heɗ ɓoo. Te ɗu inhiɗ ne pangki ŋ panguk ŋ Heɗi, weɗ rim ɗu. 2Kon ali ɓinooɓi ambɗi so sah findi Apootar, ŋ Apootar nga ɗu ; e ɗu teeɓoh ne ŋ Apootar ŋ niki ɗu nik ŋ Heɗi.

3Mi nak, inii weɗ maa lofe ɓi na woyee in moɗaaɗi nga so. Mi na woyee ne : 4-6Mi na Barnabaas, ɓoo mineen meeksoh kañam. Ɓoo mineen tok ɓitiɓ kosiɗ, ɓi hunan na ɓoo ŋ ɓaaɓ ci ɓoo na ɓaaɓe, findi Apootar ci ɓinooɓi na tumohee wa, findi Piyeer na taambɗoh ciŋ Heɗi. Wala ɗu liiɓ ne e ɓoo dong mineeɗi nik pangkaaɗi na yaah ciŋ ɓoo ?

7A yinde soldaar na pesɗe haf ce na ini a raakoot ? Ya ɓa na guure reseñ te a ñamuu ŋ rim ciŋ wa ? Ya ɓa na niiɗe gat te a anuu ŋ miis mi ? 8In ci ŋ woo, kinaat liiɓ ne ŋ kooɗoh ca ŋ woyohaaɗ ciŋ ɓo' ci dong. Waasiŋ Musaa na name woyoh ɗaa. 9Woo kii fiisuuɗ nga, an : « Kina hondoh ñam inoh fi na dake ŋ mbong ci#9:9 inoh fi na dake ŋ mbong ci ne a yon ca : ŋ jamanoonaam, ɓa meeɗeen ɓay ɓi inoh, ɓa wilɗee ca ŋ ɗafuk mbong ci, ca dakee ca po ca yon ca. ne a yon ca !#Rohƴiɗi 25:4 » Andi Kooh liiɓ ŋ inoh ci dong ŋ ndii ? 10Woo ki namɗi nik wuu ɓoo e ? Ee, e ɓoo tah ineem fiisu, ne guurohi heeluk raak ŋ ini a na guure, te baacohi heeluk raak ŋ ini a na baace.

11Ɓoo sok nga ɗu ini puloh ŋ Fuuɗsi Hoolohngaani ; kon wa in uupiɗ ne ɓoo nguɗ ŋ in ci ɗu raak ŋ Adina e ? 12Nik ne e ɓi ɓo' wiiriis raak waas nga ɗu ɗah, ɓoo joyɗi ɓa uupiɗ waas nga ɗu e ? Waaye ɓoo meeksohɗi ini waas on ɓoo nga ɗu, ɓoo kay, ɓoo muñ muñ in ci jen, ne ɓoo hondohuu Yegɗohiŋ Muci kaɗ, yegɗohiŋ Kiristaani.

13Ɗu inhiɗ ne ɓooɓa na pangke na in ca hoolɗuuɗ ca, ca nik ŋ Kahan Kooh, e Kahan Kooh na pesɗee ɓa, te ɓa na seeƴke ŋ seeƴkohaana na raake ɓak ŋ in ca na eɗohse nga. 14Wa nam mand ɗaa, Heɗi nakoh ne ɓi na yegɗohe Yegɗohiŋ Muci, pesohaat pangkeem.

15Ini kaɗ nga so, ŋ kooɗɗi ali in ŋ in ci waas eɗ to, te ŋ fiisɗi inii ne ŋ eɗuu ca. A kaan sah ngisohiɗ to... Muk ! Ali ɓo' yahɗanɗi so ini maa tipkohe. 16Ŋ minɗi tipuk ŋ yegɗohi mi na yegɗohe muci, wa ini ŋ sasu ; ŋ masɗiɗ haf fo ne ŋ yegɗohɗi Yegɗohiŋ Muci ɗah ! 17Nikee ne a ñam tanoot ne ŋ tuma ɗah, ŋ heen heelke wirind nga ; waaye ŋ minɗaa nik tumaaɗi, wa ini ŋ sasu. 18Waaye, ŋ hey wirndasse ! Wirndiŋ ngo weɗ ne ŋ woyee Yegɗohiŋ Muci te ŋ meeksohuu in nga. Ŋ ineem, ŋ rahsuu ini waas on ɓoyi na yegɗohe Yegɗohiŋ Muci.

Pool tumiɗ haf ce ñaamiŋ ɓooɓi jen

19Ñam raak haf fo, ali ɓo' raakɗi so waaye ŋ tumiɗ haf fo ñaamiŋ ɓooɓi jen, ne ŋ uup min nook ɓo' laayiɗ, ŋ ɓay ɓa ŋ Kiristaani. 20Ŋ nikka na Yawuut ci ɗah, mi na mande na Yawuut ne ŋ min ɓa nook ŋ Kiristaani ; mi, ŋ haf fo, waasiŋ Musaa yilifɗi so, waaye ŋ nikka na ɓi wa yilif ɗah, mi na taambɗee wa taambiɗ, ne ŋ min ɓa nook ŋ Kiristaani. 21Ŋ nikka na ɓi wa yilifɗi ɗah, mi na mande na ɓoyi wa yilifɗi, ne ŋ min ɓa nook ŋ Kiristaani. Moona waasiŋ Kooh nikɗi so yilifaaɗi, laam a waasiŋ Kiristaani yilif fo.

22Ŋ nikka na ɓooɓi kos ciŋ ɓa ndengɗi ɗah, mi na tume findiiɓa ne ŋ min ɓa nook ŋ Kiristaani. Ŋ nikiɗ in nu in wuu ɓooɓi jen. Mi yii tum ini ŋ min jen ne ŋ muciɗ ɓi ɓo' nga ɓa. 23Te in nu mi na tume ɗah, mi na tumee wa sagu Yegɗohiŋ Muci, ne ŋ min raak ɓak ŋ in ci wa na onohe.

24Kinaat alkoh ne ɓooɓi na nupe nup kocukoh ŋ estaad, ɓeɗ jen na nupe waaye a yi na koce dong na ɓaye ini degu. Kon nupaat ne ɗu ɓay ini degu ! 25Leberoh kooɗkiɗeesa leber ɗah, a na faɗe faɗ in laayiɗ. A na tume ineem ne a aafu raayaani genanɗi ; waaye ɓoo nak, ɓoo na faɗe in laayiɗ ne ɓoo aafu raayaani genan gen. 26Weɗ tah mi, ŋ nupeesa ɗah, mi na nupeeɗi mbalay ; te ŋ lebereesa ɗah, maa laɓeeɗi ŋ puuɗsi. 27Waaye maa dege faaniŋ ngo in miskiɗ po ŋ yilifa, ne ŋ yegɗuu ɓooɓi Yegɗohiŋ Muci po ƴut, ŋ han aañu.

Currently Selected:

1 Korenta 9: YM

Highlight

Copy

Compare