1 Korenta 10

Wortuk kooh ci nikaaɗiici

1Ɓaah ciŋ ngo, ŋ waaɗ ne ɗu faɗoh nof ini rahsee caac ciŋ ɓoo Israayel ca : Ɓa jen, ɓa nikee ŋ ooɓ eela,#Pula 13:21 ɓa jen ɓa lahiɗ ŋ ɗooƴ cookma iiri'aaɗi.#Pula 14:15-31 2Ɓa jen, ɓa ɓoktuuɗ ŋ waasiŋ Musaa, ŋ ooɓ eela na ŋ ɗooƴ cookma. 3Ɓa jen ɓa ɓaaheen ñam kañam yino, kañam ka Kooh onee ɓa, wa pulohee Asamaan.#Pula 16:13-35 4Te ɓa jen ɓa nameen ɓaah an anaah yino, anaaha pulohee ŋ Kooh ; weɗ masmi Kooh pulɗohee ŋ atoh fa ɓendee ɓa,#Pula 17:1-7; Kind ci 20:2-13 te atoh feem nikee Kiristaani.

5Moona ini uup laay nga ɓa neɓeeɗi Kooh, ɓa kaan ŋ kehƴa hulanga, ɓa faɗuusa nga.#Kind ci 14:28-35 6In ceem misaal nga ɓoo ne ɓoo maɗuu in baahaaɗi findi caac ceem.

7Kinaat ñaamuk kooh ci nikaaɗiici, findi ɓi ɓo' nga ɓa tumohee wa ; Fiis ci Hooliɗ ci woyiɗ ne : « Ɓi cuuɓi ɓooffa, ɓa ñameeɗa, ɓa aneeɗa ; ƴutta ɓa kurukka, ɓa mbuumbaayeeɗa.#Pula 32:6 »

8Ɓoo kinaat faankoh faankoh sangohuuɗ, findi ɓi nga ɓa tumohee wa, tahha po raakka junni-ndaŋkiyaah-kanak na junni-kaahay (23.000) ɓi kaan ŋ mbeh yino.#Kind ci 25:1-9

9Ɓoo kinaat markisuk Kiristaani, findi ɓi nga ɓa tumohee wa, tahha po ɓa kaaneeɗa sagu iiñ ca.#Kind ci 21:4-9

10Kinaat lahtuk, findi ɓi ɓo' nga ɓa lahtukohe, tahha po malaakaani na yahrohe, ɗummba ɓa.#Kind ci 17:6-15

11In ceem jen rahsiɗ ɓa ne ca nik misaal te ca fiisuuɗ ne ca yun ɓoo, ɓoo ɓi teemb na reehiŋ jamanooci. 12Kon yi liiɓ ne a tufkiɗ, a wortukaat keen ! 13Raakɗi fiiri ɗu jaɗɗu wi ɓo' moosɗi jaɗɗohu. Kooh cariɗ oolku, a teyɗukanɗi ne ɗu jaɗɗassee fiiri uup hatil ciŋ ɗu. Ɗu jaɗɗuusa fiir ɗah, a Kooh na teeɓee ɗu buntaani ɗu min puloh nga ne ɗu raak hatili ɗu muñohana.

14Ineem weɗ tah, ɗu ɓi ɓaah ciŋ ngo ŋ keeñkoh, nupaat ñaamuk kooh ci nikaaɗiici. 15Mi na woye na ɓo' ñaañiɗ ; ɗu ŋ haf ɗu liiɓaat baahiɗ ŋ ini mi na hee woye, andi wa keeh, wala wa keeh haa. 16Kaasiŋ barkeeni ɓoo na corkiɗohe Kooh na ɓekɗohee ɓoo na ñif miŋ Kiristaani aamu. Mbuurndi ɓoo na poɓtohe, wa na ɓekɗohee ɓoo na faaniŋ Kiristaani. 17Wa mbuuru yino dong. Ini ɓoo na laaye jen, ɓoo nam nik faan yino, laam ɓoo jen na paysohe mbuurndi yinoori.#Macce 26:26-28; Maarko 14:22-24; Luk 22:19-20 18Namaat marak ɓi nik Israayel Israayel ngaŋ rimuk, ɓi na ñame ɓak ŋ ɗoopaat ci seeƴkohu, wa na ɓekɗohee ɓa na seeƴkohaani.

19Ŋ waaɗ woo ye ŋ ndeem ? Wa keeh ne sepet ci seeƴkohu wuu kooh nikaaɗi, ca in haa, te kooh ceem nam nik in haa. 20Waaye ini ŋ waaɗ woo, weɗ ne, seeƴuk ceem, ca wuu jiiniici na puuɗis ci na in ci mand ɗaa, waaye ca wuu Kooh haa. Te ŋ waaɗɗi ne ɗu ɓekɗukoh na in ceem. 21Ɗu minɗi anee ŋ kaasiŋ Heɗi, ɗu anee ŋ kaasiŋ jiiniici. Ɗu minɗi ñamee ŋ kankiŋ Heɗi, ɗu ñamee ŋ kankiŋ jiiniici. 22Wala ɓoo waaɗ ne Heɗi fiir ? Ɓoo uupiɗ ɗe uupiɗ hatil e ?

In naa nu fu tumee ɗah, yakɗa Kooh nga

23Raakiɗ ɓi na woye ne e ɓoo raak haf ɓoo, ɓoo miniɗ tum in nu ɓoo waaɗ tum ɗah. Ɓo' miniɗa woo, waaye e in ci jen raakiɗ ɓo' etoh haa. Te ali nik ne ɓo' miniɗ tum ini a waaɗ sah, wa nikɗi haa ne in nu nik weɗ na kaɗɗe ɓooɓi fiki. 24Ali ɓo' kinaat waak ini baah nga ɗe dong, waaye a waakaat ini baah ŋ morom ce !

25Ɗu miniɗ ñam sepet ci na toonse jen, wa etohɗi meeksoh, hel ciŋ ɗu dalaat nga. 26Laam Fiis ci woo ne : « Heɗi a yi raak kehƴi na in ci nik nga jen.#Sabuur 24:1 »

27Kosaaɗi ɓeeɗuk ɗu kañam te ɗu waaɗ kaɗ ɗah, ñamaat in nu a eɗ ɗu ɗah, wa etohɗi meeksoh, hel ciŋ ɗu dalaat nga. 28Waaye ɓo' woo ɗu ne : « Inii wa kañam seeƴkohuuɗ wuu kooh ci » ɗah, kinaat ñam, sagu ɓoyi woo ineem, jaar hel dal. 29Waaye ŋ woo hel daliɗ ɗah, ɗu tahɗi so woo, a ɓoyeem tah ho woye. Wa carɗi ne ŋ teeɓoh ne ñam raak haf fo, nik ne ɓo' na hee wa hotohe in wiiriis ɗah.

30Kon ŋ ñamee, ŋ corkiɗee Kooh nga ɗah, wa ye tah ŋ joyya woyu in moɗaaɗi ŋ kañam keem ? Kañam ki fu inah ne ŋ corkiɗiɗ Kooh nga. 31Mbaa ɗu ñame, wala ɗu ane, wala in nu ɗu min haɓiɗ ɗah, tumaata ne ɗu yakiɗ Kooh. 32Kinaat tum ali ini min hondoh ɓooɓi pes na Kooh, ɓa nik Yawuut, ɓa nikɗi Yawuut, wala ɓi ŋ Janguuniŋ Kooh. 33Tumaat findiiso, mi na ndengɗuke ne ŋ tum ini neɓ yaa nu nga ŋ in nu nik. Ŋ waakɗi ini baah nga so, waaye ini baah ŋ ɓi laayiɗ ne ɓa mucɗu.

Currently Selected:

1 Korenta 10: YM

Highlight

Copy

Compare