1 Korenta 3

Surgaaciŋ Kooh

1Ɓaah ciŋ ngo, wa ŋ nik na ɗu, ŋ mineeɗi woo na ɗu findi ɓo' na woyohe na ɓoyi rahas Fuuɗsi Hoolohngaani. Ŋ minee woo na ɗu findi ɓo' na woyohe na ɓi na pese ŋ ini neɓ ɓa, findi gooy ŋ waasiŋ Kiristaani. 2Ŋ eɗ ɗu miis, ŋ eɗɗi ɗu kañam ndengiɗ, mbaa ɗu heeɗi ca antale ; te po woti sah ɗu antalɗi ca, 3laam ɗu ris pes ŋ ini neɓ ɗu. Ɗu ɓii siistiɗoh, ɗu ɓii lahtoh ŋ harmban ɗu ! Ineem teeɓohɗi ne ɗu na pese ŋ ini neɓ ɗu e ? Ɗu ɗaloh ye na ɓi Adina ?

4Ɓii woyee ne ɓa ɓaah ŋ Pool, ɓum woyee ne ɓa ɓaah ŋ Apolos ɗah, ɗu ɗaloh ye na ɓi Adina ? 5Te sah, e ya ɓa Apolos ? E ya ɓa Pool ? Ɓoo surga dong, surgaaci ɗu taamboh, ɗu kossa. Yaa nu nga ɓoo ɗah, na tume pangki Heɗi eɗ ɗe. 6Ñam yip, Apolos soorra, waaye a Kooh yakiɗ. 7Kon, wa nikɗi haa ne a ɓoyi yip wala yi na soore a yi nik in, waaye a Kooh, yi na yakɗe. 8Yi yip na yi na soore ɓeɗ hend, te yaa nu nga hey rahse aafi hend na ini a panguk. 9E ɓoo ɓaah pangki, pangkiŋ Kooh, ɗu nikka yohon ce, taɓahiŋ ɗe.

10Ŋ ini Kooh baahoh ho, ŋ yipiɗ fondama findi taɓahoh herñiɗ, te ɓo' wiiriis ɓii taɓah ŋ ɗafki. Waaye yaa nu nga ɗaakkohaat nof ŋ findi a na taɓahohe nga. 11Fondamaani tufkiɗuuɗ po ƴutiɗ, wa nikka Yeesu Kiristaa. Ali ɓo' minɗi yip fondama wiiriis. 12Ɓo' nu taɓah ŋ ɗafuk fondamaani ɗah, ali a taɓah na urus wala haalis wala peme, wala a taɓah na hang, wala siini wala paangi sah, 13a inhaat ne noh hey pule panguk ceem jen teeɓohuk. Mbeheem hey haye na yongkaah, panguk nu nik taambɗu nga ne wa hotu findi wa mand. 14Ɓoyi taɓahiŋ ɗe risan tufuk, a hey aafse. 15Yaa nu pangkiŋ ɗe doh ɗah, a hey ñake aafiŋ ɗe ; a yi a hey mucɗasse, waaye findi ɓoyi fusoh ŋ yongkaah.

16Kinaat alkoh ne e ɗu kahniŋ Kooh te Fuuɗsiŋ Kooh gen nga ɗu. 17Yaa nu yahroh kahniŋ Kooh ɗah, Kooh hey ɗe yahrohe ; laam kahniŋ Kooh hooliɗ, te inhaat ne kahneem e ɗu.

18Ali ɓo' kinaat ñaañoh haf ce : yaa nu deg haf ce ɓo' ñaañiɗ ŋ adinaanii ɗah, a nikaat dof nga ne a raak liiɓohaaɗ moɗiɗ keeh-keeh. 19Laam liiɓohaaɗi moɗiɗi nik ŋ Adina, wa dof ŋ has ciŋ Kooh. Ŋ ineem Fiis ci Hooliɗ ci woo ne : « Kooh tumiɗ po inhiɗ ci keeniɗ ŋ fiir ci ɓa jaɗoote.#Ayooɓa 5:13 » 20Ca woyissa ne : « Heɗi inhiɗ liiɓ ciŋ inhiɗ ci. A inhiɗ ne ca ɓarang ɓarang.#Sabuur 94:11 »

21Ŋ rohƴiɗ, ali ɓo' kinaat yaksiɗuk ne a ɓaah ŋ diw, laam e ɗu raak ɓa jen, in ci jen wuu ɗu, 22wa Pool haa wa Apolos haa wa Piyeer haa, e ɗu raak ɓa jen te wa Adina haa wa kipes haa wa kakaan haa, wa woti haa wa kim haa, e ɗu raak jen ; 23waaye ɗu, e Kiristaani raak ɗu, te Kiristaani, a Kooh raak ɗe.

Currently Selected:

1 Korenta 3: YM

Highlight

Copy

Compare