1 Korenta 2

Yegɗoh Kiristaani, yi daaƴu ŋ kurwaa

1Ɓaah ciŋ ngo, mi, wi ŋ hay nga ɗu, ne ŋ woo ɗu in ciŋ Kooh ɗasɗukiɗ ci, ŋ toonɗi ɗu min woo wala liiɓohaaɗ moɗiɗ. 2Ŋ woyee ne, ŋ waaɗɗi ɗu teeɓ ne ŋ inhiɗ in wiiriis ɗal ini kaɗ ŋ Yeesu Kiristaa, na daaƴi a daaƴu ŋ kurwaa. 3Mi ŋ haf fo, wa ŋ nik na ɗu, ŋ raakeeɗi hatil, ŋ saakɗohee saakɗoh sagu tiit ; 4ini ŋ woyee na wi ŋ yegɗohee, gaƴkeeɗi ŋ min woo woo ki teeɓoh liiɓohaaɗ moɗiɗ ne wa kosɗukoh ɓo' ; waaye a hatiliŋ Fuuɗsiŋ Kooh weɗ hotsee nga, 5ne kosiŋ ɗu gaƴkuu ŋ liiɓohaaɗ moɗiɗ wi puloh ŋ ɓooɓi, waaye ŋ hatiliŋ Kooh.

Liiɓohaaɗi puloh ŋ Kooh

6Moona ɓoo na jangɗohe liiɓohaaɗ moɗiɗ. Liiɓohaaɗi moɗɗeem pulohɗi ŋ adinaanii, wa pulohɗi ŋ ɓi adgoh adinaani ; ɓeem na kee mirndoha ŋ sooƴ. E ɓi nikisɗi komaaki ŋ kosi ɓa kos, ɓeɗ ɓoo na jangɗee wa. 7Wa liiɓohaaɗi moɗiɗi puloh ŋ Kooh, te wa ɗasɗuk ɗasɗuk. Kooh kooɗkiɗee wa bala Adina camban ne ɓoo ɓaah ŋ yaki a yak. 8Liiɓohaaɗi moɗɗeem ali kilifa ŋ ɓi adgoh adinaanii inahɗaa. Ɓa inheena ɗah, ɓa heen inhe yaki Heɗi yak po ɓa daaƴuu ɗe ŋ kurwaa. 9Waaye findi Fiis ci woyoha an :

« Ini has hotɗi,

nof kerahɗaa

te ali ɓo' moosɗaa liiɓoh,

ineem weɗ ini Kooh kooɗkiɗ ɓi waaɗ ɗe.#Esayi 64:3 »

10A teeɓ ɓoo ineem taamboh ŋ Fuuɗsi Hoolohngaani ; Fuuɗseem na acsuke acsuk in ci jen, po ŋ liiɓohaaɗ ci nooɗiɗ ciŋ Kooh sah. 11A ya ɓa ŋ ɓooɓi a yi min inah ini nik ŋ ɓoyi ɗal liiɓohaaniŋ ɓoyeem ? Wa nam mand ɗaa, ali ɓo' namɗi inah ini nik ŋ Kooh, ɗal Fuuɗsiŋ Kooh, maanaam Liiɓohaaniŋ ɗe. 12Ɓoo nak, ɓoo rahas Fuuɗsi puloh ŋ Kooh, weɗ tah ɓoo na liiɓeeɗi findi ɓi Adina, ɓoo inhiɗ in ci Kooh baahoh ɓoo. 13Te ɓoo woyee ŋ in ceem ɗah, ɓoo na woyeeɗi woyohaaɗiŋ jangɗohoh ciŋ Adina, ɓoo na woyohe findi Fuuɗsiŋ Kooh jangɗoh ɓoo. Ŋ ineem, ɓoo na toksohe in ci puloh ŋ Fuuɗsiŋ Kooh ŋ liiɓohaaɗi a eɗ ɓoo.

14Waaye ɓo' dong na liiɓohaaɗiŋ ɗe, a minɗi teyɗuk in ci puloh ŋ Fuuɗsiŋ Kooh, a na ambe ne ca inaa dofoha, a minɗi ca inah ; a Fuuɗsiŋ Kooh dong na one ɓo' a min inhisoh in ceem. 15Ɓoyi raak Fuuɗsiŋ Kooh miniɗ inhisoh in ci jen, waaye ɓoyeem, ali ɓo' minɗi inah findi a mand. 16Fiis ci woyiɗ ne : « A ya ɓa inah liiɓiŋ Heɗi ? A ya ɓa min ɗe deng ?#Esayi 40:13 » Ɓoo nak, ɓoo raakiɗ liiɓiŋ Kiristaani.

Currently Selected:

1 Korenta 2: YM

Highlight

Copy

Compare