Kɔgya 139
139
1Unwoti, éduo-mi kayi ku lɛlɔ kemmo ánu ƒui
na agyi kalɛ na nse.
2Na agyi-mi ablala ku kɔvinkɔ ƒui.
Na mina lili kemmo kakali ƒui kátabɛ-ɔ
na kesii kani na eli mmɔ.
3Ákɔku mina busie taavi ku mina bɔtɛ ánu.
Na agyi mina ablala kemmo ƒui kede kede.
4O Unwoti, asa litemi lɛdi
lɛdubɔlɛ-mi kenye kemmo ni,
agyi lɛla lɛni na ndubo bɔsu kukuuku.
5Áaka ámana-mi kesi kesii
na ƒula kɔnu mɔɔgyumana-mi.
6Kalɛ na éti agyi-mi kemmo kágyu geen
ɔni utulo ami ɔlati kalɔ bunu.
7Lɛɛɛdubo bɔkana bukeli ƒula anumi busie kesii kadi.
Na naaakana lɛlɔ bɔbala ƒula anumi lɛnɔ bɔkya kesii kadi.
8Si lɛ́kɔ lísie katɔ ni, akya mmɔ.
Si ubu kemmo na líduo ńtátɛ lɛnɔ akya mmɔ.
9Si lɛ́kwɛ avwi na líveyi lísie ɔgyu kakaaka
na ɛpu ɔvi ngye muedi ni,
10mmɔ geen ƒula kɔnu kɔdubo-mi bɔkpanku.
Na ƒula kɔdianu kɔdubɔtɔnku-mi na ebunku-mi.
11Na si masu nnii lɛdisa lɛdubɔbala-mi
na ɔƒiiwi unwini usien ute-mi muedi ni,
12ɔɔɔdubo bɔtɛ, ɔsika lɛdisa lɛdi bukeye na ƒula anumi.
Na lɛdisa ku bukeye bɔdi unwi na ƒula kudɔ.
13Ɔsika awɔ návɔ-mi lɛlɔ ekpo ƒui
na ásala-nya ákya mina uni kaƒɔ kemmo.
14Ndubumwi-ɔ, ɔsika kalɛ na éti ávɔ-mi ni,
ubo liƒu.
Na ƒula ablala ébomo
na mina kayi kagyi ɔmɛni nwaa.
15Uwi ɔni na ákya aavɔ́ mina ekubi na aasála-nya
na mina uni kaƒɔ kemmo
na mɔɔlɛ lili na bɔbɛ kemmo ni,
awɔ ágyi ka nkya mmɔ.
16Mina bɔvɔ kesii kadi kátabɛ-ɔ asa na báwɔ-mi.
Na énweni mina ngba bulie emeyi bumomo ése
na ƒula ɔku kemmo
asa na mina lɛlɔ kakɛ kadi kadubuse kalɔ na kaƒɔ kemmo.
17Unwoti Katɔti, ƒula kakali káƒɔ kuye geen
na kana kemmo lɛnɔ kágyu geen na kemomo.
18Na si banii baka ƒula kasusu ni, ketulo ɛpu kɔnwinimi.
Na si lɛ́gyinya na nkɛ ni, ƒula kudɔ kani na nli.
19Sɔsɔ ni, O Katɔti Kedee, ɔdubɔda-mi kubiti
si banii ádu balalane.
Ya na bekyuli bani mbo likyulikpi banyonu-mi!
20Bekyuli bammɔ baatɛmi ala ekpidi taasiku-ɔ lɛlɔ,
na bada ƒula lɛnyi lɛnɔ na ulu ɔni nátamanaku lɛlɔ.
21O Unwoti, bekyuli bani muukisi-ɔ ni,
ami lɛnɔ muukisi-ma.
Na bani ƒui mɔɔta tenye-ɔ lɛlɔ ni,
uukpóku-mi na muukisi-ma geen.
22Naaanu-ma bɔdia munu munu,
ɔsika mɔɔnu-ma aani-mina bekisine.
23O Katɔti, awɔ ɔlati kɔku-mi
na ati kalɛ na nse.
24Sia-mi anu na si nkɛ ulu ukpidi ɔdi lɛlɔ
na eti-mi asiaku ngba ƒui ulu lɛlɔ.
Currently Selected:
Kɔgya 139: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
