Agba 8
8
Lɛnunda Lɛɛkpali Ka Bekyuli Benu-nwu Ala Bɔtina
1Ɔɔɔdi bɔkpali na lɛnunda lɛda bekyuli?
Na ɔɔɔdi ala kalɔ bunu muubó kudu momoomo mmɔ?
2Unye lilu lɛlɔ na kesii kani nákuku ƒui.
Na uudí teenye elukpo ƒui lɛlɔ.
3Unye lɛban lɛni ƒui na baasia
teeduo ɔma unengudi ɔmmɔ kemmo kenye
na ɔɔkɔ́ lɛsa na kɔyakun kɔmmɔ ƒui ɔnini,
4“O amii bekyuli na mɔɔkpali.
Amii kadi ƒui bekyuli na mɔɔtalaku lɛdi katɔ
kalɛ na binu.
5Bina kasusu kásɔ bibo na lite-mii lɛnunda.
Bɛ́dɔlɔ bibo na lite-mii ala kalɔ bunu.
6Bise atu na binu! Ɔsika ndanku ala abuni geen
na ndubo-mii bɔsu.
Ala ani ndi ulu na muubimi mina kenye taatɛmi.
7Na lɛla lɛni ndi litemi geen lɛmmɔ na mina kenye kaasu.
Na mina enyekuli ekisi ulikplu ala.
8Mina kenye etemila adi etemila geen.
Na lɛla biala líteƒu lítakya iye lɛbla gontii
na etemila ammɔ kemmo.
9Mina etemila ese nwaa ete ukyuli
ɔni muunú ala kalɔ.
Na bani na bagyi lɛla badubɔnu
ka bɔƒiɔ bɔdi buuubo-nya kemmo.
10Ƒuna mina ala bɔtina utulo sika ɔƒualadi.
Na aƒuna lɛlati etulo sika ugyiedi.
11Ɔsika lɛnunda lɛ́ƒɔ kuye litulo sika asɛɛ
ani náƒɔ kuye geen.
Na lɛla lɛdi liiibo na ukyuli ɔɔwia na kalɔ kamɛni lɛlɔ
na bakana-ni buti bɔkɔku lɛnunda.
12“Ami ndi lɛnunda, na nli na unwi bɔbla kemmo
ku litemi bɔtɛ na ulu geen ɔmmɔ lɛlɔ.
Mbo lɛlati ku ala kemmo bɔnu taati.
13Unwoti bɔyia ndi likpidi bukisi.
Nkisi lɛlɔ katɔ bɔtalaku ku bekyuli lɛlɔ bɔta teenye.
Na nkisi likyulikpi ala bɔbla ku enyekpi bɔtɛmi.
14Ami mɔɔlɛ ukyuli na mɔɔtɛ etemila siin.
Ami mbo ɔyikun na muunú ala kemmo nwaa.
15Mina lɛlɔ na baga baasia taadi bekyuli lɛlɔ.
Na lɛlɔ badine beeti ɔda bubo bɔbuni teete bekyuli.
16Ɔkɛnku-mi lɛlɔ na bagadine baadi bekyuli lɛlɔ
ku babune bani mɔɔtɔnku bekyuli ulu lɛlɔ siin.
17“Bekyuli bani ƒui mɔɔyɔ́-mi ni, ami lɛnɔ mɔɔyɔ́-ma.
Na bani mɔɔwia-mi kama ulu baanu-mi.
18Mina kudɔ na lɛkɛ ku ɔbu ɔɔsí.
Na ɔdi lɛkɛ lɛni muutu uwi na ala aatɛku ukyuli.
19Na ala ani muute mmɔ eekeye
teetulo sika ugyiedi.
Na kayu kani mɔɔƒɔ bekyuli ɔdia
utulo sika ɔƒualadi buni ƒui.
20Ulu ɔni nse siin lɛlɔ na mɔɔsia,
na mɔɔbla ala ulu lɛlɔ.
21Bekyuli bani ƒui mɔɔyɔ́-mi ni, lɛkɛ na muusé-ma kama,
na muuyile bana egulabi kɔvumi.
22“Ami na Unwoti ɔdanku asa na ɔdubuse kalɔ
ku lɛla biala budie
ku kuuku ala ani ƒui nákya.
23Únyene-mi mina kenyekɔ
asa na lɛla biala lɛdubuse kalɔ.
Na nli asa na ɔdubudie kayawi.
24Báawɔ-mi asa na Unwoti
údie ɛpu,
na nli uwi ɔni na abiɔ ku ntukpa ƒui bútebo tɔ.
25Asa na abi adubɔkɛ kenyekɔ
na abinkpo akɔ alɛ ni, báawɔ-mi kukuuku.
26Asa na Unwoti wedie kalɔ kamɛni ku egyii ku livo
iye lɛti lɛni lɛlɔ na ákwɛ enye ni, nkya kukuuku.
27“Nnye mɔɔnu asa na údie kayaa
na ɔ́bla-ka aani ligegu útébi ɛpu lɛlɔ.
28Na nnye mɔɔnu asa na ɔ́bla ulɔyɔ ɔ́ƒala kayaa
ku uwi ɔni na ɔ́bla ntukpa bonwu
bɔni nágyu voo mmɔ ɔ́kya kalɔ lɛlɔ.
29Na mɔɔnu asa na ɔ́sia kalɔ ubili
aani ɔmii úte ɛpu ɔmmɔ ƒui
kalɛ na uleyi ulavia mmɔ.
Na kalɛ na úse kalɔ kammɔ ɔka kalɔ ni,
nnye mɔɔnu.
30Geen ni, ami ndi-nwu kabla kammɔ
kakwɛ ɔkyane na nwuna kɔmadɔ.
Na mɔɔkɛ́ ebiti limeyi ndi limeyi
na lɛlɔ lɛɛyɔ́-mi na nwuna anumi uwi ndi uwi.
31Na ami lɛnɔ ni, lɛlɔ lɛ́yɔ-mi
na kayawi kammɔ ƒui ɔsu
na ebiti áƒɔ-mi lɛlɔ kemmo ƒui
na kadi ƒui bekyuli bammɔ lɛlɔ.
32“Ɔmɛni ɔsu ni, mina bebi, binu-mi litemi,
ɔsika lɛlɔ lɛdubɔyɔ bekyuli bani ƒui mɔɔsia-mi kasiakɔ.
33Binu mina ala bɔtina na bɛda anu
na biteni-mu.
34“Lɛlɔ lɛdubɔyɔ bekyuli bani muunú-mi litemi
na baanu-mi ulu limeyi ndi limeyi
na benye bagya-mi na mina kayakun kenye.
35Ɔsika ukyuli biala nánu-mi ɔti ni, ɔ́kɛ ngba,
na nwuna lɛlɔ lɛdubɔda Unwoti ebiti.
36Nsu bekyuli bani na báyii ulu na bátanu-mi ni,
bábla lɛlɔ kalala.
Na bani muukisi-mi ni,
bati ka kukpi na baayɔ́.”
Currently Selected:
Agba 8: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
