Agba 9
9
Lɛnunda Ku Kɔdɔlɔ Baalɔ Bekyuli
1Lɛnunda lɛ́tu ɔtɔ, na nwuna kemmo kéwi.
Na ɔtɔ ntɛ akpa maatɛ ada-nwu.
2Ɔ́nwa adila na úse kadikɔ bonwu ku ntɛ lidu lidu
úse ka bekyuli babadi.
3Na ɔ́tala nwuna kabla bablane
ka batálɔ bekyuli ƒui bavi na bebo.
Unye kesii kani nákuku
na ɔɔnu ɔma unengudi ɔmmɔ ƒui.
4Mmɔ na ɔ́kpali ɔ́su bani na bana kasusu kásɔ
na baaagyi bana kɔmii iye kɔdianu ɔnini,
5“Bibo na bibadi mina adila
na bɛni mina ntɛ bɔni na lɛ́sala líse.
6Na bɛda bina adɔlɔla bɔbla bɛya
na bise kalɔ ku ngba geen bulie na bɛda anu lɛnɔ.”
7Awɔ ɔni madɔnku ukyuli
ɔni na bekyuli anyikpi kani na ɔɔlɔ ni,
kenye na ɔdubo-ɔ bɔtu.
Na ukyuli ɔni madɔnku ukyuli ukpidi ni,
kalala na ɔdubo-ɔ bɔbla.
8Anwuɔsu tekpoku lɛlɔ ka adɔnku ukyuli ɔmmɔ udu.
Si ɔɔɔdi lɛni ni, badubo-ɔ bukisi.
Nsu si ádɔnku banundane ama ni,
badubo-ɔ bɔyɔ bubu.
9Tina banundane ala na badubɔda anu bebu.
Na atina ama bani nlie siin ala na badubɔti ala bebu.
10Si aayia Unwoti ni, ese kalɔ aadá anu.
Na si ánu Unwoti Kedee ɔmmɔ áti ni,
agyi anii ése kalɔ adubo lɛla bɔti.
11Lɛnunda lɛdubɔya na ƒula emeyi emomo ebu.
Na akwa asia-a akwa lɛlɔ.
12Na si áda anu ni, awɔ ndubɔkɛ kɔsia.
Na si apii lɛnunda ni, awɔ ndubo abi bubo.
13Uleku ɔni básia lɛnyi banii Kɔdɔlɔ ni,
ubo lɛsɛ na uláƒalɛ.
Ɔɔɔgyi lɛla lɛdi, nsu anwu ɔlati ɔɔɔgyi lɛni.
14Uulie nwuna kayakun na kesii kani náta kákɔ,
na ɔɔnu ɔma unengudi ɔmmɔ taamana.
15Ɔɔkpali banana bani nkɛ bésela bana kabla kadi akɔ
unwi unwi teemene ɔnini,
16“Bo-mi kudɔ na abanu lɛla lɛdi na mina kaduli!”
Na bani neeebo kasusu ni, ɔɔsu-ma ɔnini,
17“Ntu bɔni na éyu kesii kadi áni ni,
amu mɔɔyu kayi geen.
Na adila ani na ábɛ átádi ni,
anya mɔɔyu emini geen!”
18Nsu ɔmɛni ƒui ni, banana bammɔ baaagyi ka
bana bani na uleku ɔmɛni ɔ́ɔka bɔkpali lɛni
na bésie ni, kaƒiɔtɔ kemmo na bátáwɔlɔ.
Currently Selected:
Agba 9: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
