Agba 7
7
Bɔlɛ Na Beleku Basɔnɔdine Lɛlɔ
1Ubi, ƒie mina ɔda bubo da kaduɛ,
na aklibi-mu ese na bɔƒɔ-ɔ lɛlɔ kemmo.
2Da-mu kaduɛ na adubulie ngba.
Gyumana-mu aani kalɛ na adubɔgyumana ƒula lɛnumi.
3Nyimi-mu da ƒula animi lɛlɔ,
Na enweni-mu akya ƒula kayi kemmo.
4Su lɛnunda anini, “Awɔ ndi mina ɔnwani ulekubi.”
Na alɔ ala kalɔ bunu anii ƒula lɛlɔ ukyuli.
5Na ala amɛni adubudie-ɔ na uleku ɔsɔnɔdine enu kemmo.
Na edie-ɔ na uleku ɔni mɔɔlɛ́ ɔgyani kama
asɔnɔtɛ ani mɔɔní ukyuli taatákya likpidi kemmo kudɔ.
6Nnye mina ƒansili kudɔ dii,
na lɛ́nu lɛ́vinku kalɛmikɔ liƒi lɛdi.
7Na lɛ́nu bani na bana kasusu kásɔ mmɔ.
Badi bakloƒu bani nási baakɔ́ mɛni akɔ unwi.
Na ɔɔɔgyi lɛbuni ku likpidi kavumana.
8Okloƒu ɔmɛni ɔ́sia ɔblɔnu ɔdi lɛlɔ ɔɔyu úsela okodo ɔdi.
Na ulu ɔmmɔ ɔkɛ ɔ́vi uleku ɔmɛni ɔtɔ kudɔ.
9Na ɔ́ɔbla kadi buɛɛ na use susuusu
uwi ɔni na keyi kadaku buti.
10Uleku ɔdi ɔ́lɛ úbasiaku-nwu
na ɔ́da lɛlɔ aani ɔyalɛ kalɛ na ɔda ɔnana ɔkwɛ.
11Ɔsika uleku ɔni mbo kudu na kɔƒa kulekpo na ɔdi.
Na ulélie kaduli uwi ɔdi.
12Ɔgbami ku eyeya kani na adubɔnu-nwu
Na ɔkɛ amadɔ amadɔ ɔɔƒulu taavi.
13Uleku ɔmɛni ɔ́kya okloƒu ɔmmɔ kɔgbu na ɔ́ƒiɔ-nwu kenye.
Na úƒi anumi ɔ́kun na ɔ́su-nwu ɔnini,
14“Lɛ́bla mina unwi bɔbla akpala.
Na ɔmwi lɛ́wɔlɔ lɛla biala ɔkɛnku kenye kani na líse lɛlɔ.
15Anwuɔsu na lɛ́lɛ líbo mbasiaku-ɔ
Lɛ́sia-a anu geen na ḿbanu-ɔ sɔsɔ!
16Lɛ́ɛva mina atɛla líse.
Adi kpɛtɛ kpɛtɛ abuni ani nási Egyipte kalɔ lɛlɔ
ku kunweni lidu na adi.
17Na lɛ́ya na ɔnyi ƒɛƒɛɛ ɔ́ƒɔ mina atɛla ammɔ.
Nnɔmii bɔni baalɔ mira ku lidu bamba
na lɛ́kuna líwi-nya lɛlɔ.
18Bo, na butátɛ na bunu lɛlɔ emini usien umodi
wetédu kadi bugye.
Na bɔƒuƒuɛ lɛlɔ kaduɛ ku bɔyɔ!
19Mina ɔgyani uuubo kaduli.
Úsie ulugyuɔ ɔdi.
20Úyile nwuna egulabi kavumi ku egulabi
na úti ɔda ulu.
Na ɔɔɔdubo tɔ wetédu kɔbuli kumodi ƒui!”
21Ɔmmɔ ɔsu uleku ɔmmɔ ɔ́tɔlɔ-nwu
útásiaku ulu bamba lɛlɔ
ku nwuna atɛ mini mini ammɔ.
Na nwuna katɔlɔ ɔsu úƒie-nwu kayi.
22Na únwini ɔ́siaku-nwu kɔnakunwi
aani ebuo ɔni bésela batádu
iye akwa ɔni nánu kakpagyuɛ,
23na unye ɔgya ka lɛtula lɛƒuala-nwu kayi.
Na útavumanaku aasɛ ɔni muuveyi taatánu kamia
na ɔɔɔgyi ɔnii ɔgbankpi kemmo na úsela.
24Mina bebi, binu ala ani mɔɔsu-mii
Na bise atu na ala ani mɔɔsu
eduo-nya kemmo kaduɛ.
25Bitaya na bina kayi katɔlɔ-mii
na bɛsiaku-nwu kama.
Na bitayii ulu na bɛsiaku ulu ukpidi
ɔni lɛlɔ na úti-mii ɔɔsiaku lɛlɔ.
26Ɔsika anwuɔsu na banana pii báyii udu,
na bani na ɔ́ɔdu lɛnɔ bemomo.
27Uleku ɔmɛni ɔtɔ ni, kaƒiɔtɔ ulu unengudi na ɔdi.
Na ɔtɛ úsie kekpine ubu kalɔ kemmo lɛtɔ lɛmmɔ kemmo.
Currently Selected:
Agba 7: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
