Agba 31
31
Ɔga Lemuel Ɔ́tɛmi Asugba
1Ala ani bɔdubo bunu mɛni ndi lɛsuse na Masa Ɔga Lemuel lɛlɔ lɛni na uni ɔ́tina-nwu.
2“O mina ubi, mina kaƒɔ ubi,
ubi ɔni lɛlɔ na líse kenye,
3tebile ƒula ɔyikun na beleku lɛlɔ
na ayila ƒula ɔlɔkplu na ama bani muubó baga muedi kalɔ lɛlɔ.
4“Lɛla lɛdi lɛkya na lɛɛɛdia liiite baga.
Lemuel, ɔɔɔdia uuute baga ka bataani ntɛ.
Útalɛka ntɛ butaada batɔnkune ɔkwɛ.
5Ɔsika si báni ntɛ ni, ɔƒɛni kalɛ badubɔyiƒala
lɛla lɛni na ɔda bubo bɔmmɔ bɔɔtina
na balakana litemi bɔtɛ budie
bani na baanya taakya na bakɛ bana kuƒi kadikɔ.
6Nyonu ntɛ te bani néedu kaƒiɔtɔ kɔtu,
ama mɔɔní ntɛ ku bani na kayi kaakpulu-ma geen.
7Ya na bekyuli bammɔ udu bani ntɛ na bayiƒala bana kɔwaba
na basɔ beléteenyimo ala ani muukpóku-ma.
8“Nye bani naaakana bɔtɛmi kenye na atɛmi ete-ma.
Na bawabane bani neeebo lɛla lɛdi bɔbla
bakɛ bana kuƒi ƒaa.
9Geen ni, tɛmi na atɛ litemi na ulu siin lɛlɔ,
na edie bawabane ku bani neeebo bebunkune.”
Uleku Ɔni Mbo Udu Buni Mɔɔbla Uleku Ɔbuni
10Ɔma ndubɔkɛ uleku ɔbuni?
Uleku ɔmmɔ udu ɔ́ƒɔ kuye utulo sika asɛɛ ani náƒɔ kuye geen.
11Ɔgyani ɔdubuti nwuna anu ƒui ɔsia-nwu lɛlɔ.
Na ɔnana ɔmmɔ ulayaki lɛla lɛbuni lɛdi.
12Ɔdubɔya na ɔgyani ɔkɛ lɛbuni
na ulabla-nwu ukpidi ɔdi nwuna ngba uwi ƒui.
13Ɔɔƒuna bebuo linwini ku unwo ɔbuni
na nwuna enu alanɔ ala budi uwi ɔdi.
14Use aani beyedine ɔkɔlɔ
ɔni mɔɔsíku edula ɔgyu teeboku kaduli.
15Ɔɔta ɔtanta tutuutu uwi ɔni na kadi kátada tɔ
na ɔɔbla lɛdila teete nwuna kaduli bekyuli,
na uute nwuna kaduli kabla bablane belekubi
bana limeyi kabla.
16Uusié taatávi taanu mmo
na uye bɔni ndia.
Na kɔsia bamba kɔni na
ɔɔkɛ́ ni,
uuti-ku teese kemo.
17Uusé nwuna kabla kalɔ ku ogya,
na lɛlɔ lɛ́sa-nwu
na ubo ɔlɔkplu ute nwuna kabla.
18Ɔɔsia nwuna kabla kani mete-nwu kɔsia anu kaduɛ.
Na nwuna asogya uleni usien uwi ɔdi.
19Nwuna enu eeebo bɔnwuna na unwo bɔta lɛlɔ,
na nwuna animi aatu kedetila uwi ndi uwi.
20Ɔɔnu bawabane kɔnyana
na bekyuli bani mɔɔyaki lɛla lɛdi ni,
uute-ma ala.
21Liƒu liláda-nwu si kɔyɔ uwi ɔdubo,
ɔsika ubo kɔyɔ adala ute nwuna kaduli bekyuli.
22Uudí ala ani na ɔɔvá nwuna katɛnkɔ.
Na ɔɔda lɛlɔ ku adi ani na áƒɔ kuye geen.
23Bekyuli baabu ɔgyani kaduɛ
na ɔma unengudi ɔmmɔ ɔban kenye
kesii kani na baasa, ɔsika ɔdi ukyuli
ɔni mɔɔkya kadi benengu kasusu bakyane akɔ.
24Na ulekudi uudí lɛwu gyɔlɔɔ lɛbuni
lɛni na bákya-ni bɔdia kaduɛ teeye
ku lɛwu lidu lidu bamba teete beyedine lɛnɔ.
25Si ánu uleku ɔmmɔ ni, aanu ka
ubo ɔbu ku ɔyikun.
Ɔƒɛni si ɔɔmá ni, aatí ka
liƒu lɛdi liiibo-nwu lɛlɔ kemmo na uwi ɔni mebo lɛlɔ.
26Ɔɔtɛmi lɛnunda etemila,
na ɔɔlɛ ukyuli ku lɛƒɔndia na ulu geen ɔmmɔ lɛlɔ.
27Na ɔɔsia lɛla biala mɔɔlɛ́ na nwuna kaduli anu kaduɛ,
na ulákya enu lɛgba akɔ taakɛ nwuna lɛdila.
28Nwuna bebi baalɔ-nwu lɛnyi teete kusɛ kusɛ.
Lɛni kani na ɔgyani ɔɔtɛmi-nwu lɛlɔ kɔtɛ
na uumwi-nwu ɔnini,
29“Beleku babuni bakya kayawi na baada kaduli,
nsu awɔ ƒula udu ɔɔɔbɔ!”
30Ala ani mɔɔda kayi aatɔ́lɔ ukyuli.
Na uleku bɔdia bɔnu bulétu uwi.
Nsu uleku ɔni mɔɔyia Unwoti ni,
ɔlɛka bemwi-nwu.
31Ƒɔ uleku ɔmmɔ udu kayu na ala ani na ɔ́bla kenye.
Na nwuna kabla alati kebo-nwu kudu
na ɔma bekyuli ƒui akɔ.
Currently Selected:
Agba 31: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
