Agba 30
30
Agur Úbo Agba
1Yake ubidi Agur ɔ́su kenye kadi úse. Ɔ́su Itiel lɛla lɛdi. Na ɔ́su Itiel ku Ukal ɔnini,
“Lɛlɔ lítu-mi, O Katɔti,
na lɛ́bla kpɛtɛ kpɛtɛ.
2“Ami ndi bekyuli ƒui akɔ ukyuli ɔni na ɔɔɔgyi lɛla lɛdi.
Na liiibo ala kalɔ bunu bɔni na bekyuli bebo.
3Ńtatɛya lɛnunda lɛla lɛdi,
iye lɛlati lɛdi na anwu ɔni nse kedee mmɔ lɛlɔ.
4Ɔma nákɔ úsie katɔ na ɔ́sɔ únwini úbo?
Na ɔma násala ɔƒɛƒɛɛ ɔ́kya nwuna lɛkɔkɔ kemmo?
Ɔma násala ntu ƒui ɔ́kya nwuna awu bonwu
ɔni mbi-nwu lɛlɔ kemmo?
Na ɔma nátu kalɔ kammɔ
lɛvi ƒui
únyene kalɔ útédu kana kawɔlɔkɔ?
Dɛ na baalɔ anwu ku ubidi?
Su-mi si agyi!
5“Lɛla biala na Unwoti ɔ́su ni, ɔkɔ uuubo-nwu kemmo.
Ɔdi lɛgyumanala ute bani nátamiku-nwu.
6Teti lɛla bamba lɛdi tebunku nwuna etemila lɛlɔ.
Si ɔɔɔdi lɛni ni, ɔdubɔdɔnku-ɔ na enwini ɔkɔ ɔnyine.
7“O Unwoti, alakpa anyɔ adi kani na muuvele-ɔ.
Na teni-mi ala ammɔ bute asa likpi.
8Die katuala ku ɔkɔ bɔnyi mina lɛlɔ ƒui.
Tete-mi kɔwaba, na tete-mi lɛkɛ lɛnɔ.
Mmomu te-mi mina limeyi adila kani.
9Ɔsika ɔƒɛni kalɛ lɛ́kɛ lɛmmɔ lɛdubumo-mi lɛvili
na lini-ɔ,
na ndubuye nnini,
‘Ɔma ndi Unwoti?’
Na si kɔwaba lɛnɔ nda-mi
kɔ́vili ni,
ɔƒɛni kalɛ ndubo buyu
na bekyuli balabu mina Katɔti lɛnyi kedee.
10“Tebile kabla ɔblane ɔdi tete nwuna ɔtɔlati.
Si ábla lɛni ni, ukyuli ɔmmɔ ɔdubo-ɔ buwida
na adubɔƒɔ lɛla lɛmmɔ kayu.
11“Bekyuli badi beewida bana bati,
na belete bana beni kusɛ kusɛ.
12Baanu lɛlɔ ka badia bagya nsu geen ni,
beesé lɛlɔ geen na bátalɛ bɔkpi.
13Baakɔliku lɛlɔ katɔ
teetuloku lɛlɔ
na baanu lɛla biala tapii.
14Bana kenye anyi etulo kuwii,
na lɛsika blii yayaaya nlɛ-ma linungla,
kalɛ na baduli bawabane bebweli balɛku kalɔ kammɔ lɛlɔ.
Na bayila bani ƒui mɔɔyaki ala balɛku bayawine akɔ.
15“Ntu kebweyi kadi kakya na kebo bebi belekubi inyɔ.
Ama bana keku kani ndi
‘Te-mi! Te-mi!’
“Alakpa atɛ adi akya na elemo kudii.
Na ene adi aaagyi bɔsu anii, ‘Ɔ́bɔ!’
16Kaƒiɔtɔ ku udinkɔ
ku kalɔ kani na ntu bulaƒɔ-ka kudii
ku ogya ɔni mɔɔkywí teebile ala na ulásu ɔnii, ‘Ɔ́bɔ!’
17“Anumi ani mɔɔnu ɔti ɔnusɛ teedumi
na ulánu ɔnii ɔ́manku ka unu uni litemi ni,
baasɛ bekpidi bani nkya kɔwɛ kemmo
ndubo bebedie-ma anumi na livuo kemmo
na begbini baduli-ma bebweli ƒui.
18“Na alakpa atɛ adi akya na ana lɛlɔ lɛɛbla-mi dɛye dɛye.
Na ene adi anya neeenu-nya kalɔ.
19Kalɛ na kɔdigbo aasɛ uuveyi taavi kayaa,
ku kalɛ na kɔlakpi kuusié taavi lɛtakpɛ lɛlɔ,
ku kalɛ na ɔkɔlɔ bonwu ɔɔkɛ́ kasiakɔ na ntu anumi,
ku kalɛ na ɔnana kayi kaayɔ́ uleku.
20“Na ɔni nsɔ mɔɔbla-mi yaa ndi
kalɛ na uleku ɔsɔnɔdine ɔɔbla ala.
Kalɛ na ɔɔdi teeni kenye
na ɔsu ɔnii, ‘Ńtabla lɛla likpidi lɛdi.’
21“Alakpa atɛ adi aakya kalɔ liƒu kpakpaakpa,
na ene kalɔ na ulakana lɛlɔ budie.
22Ukyuli ɔdi kabla ɔblane ɔni nénwini kadi ɔga
ku ɔdɔlɔdi ɔni mbo adila pii geen
23Kalɛ na uleku ɔni na bekyuli balayɔ ɔɔkɛ́ kɔgya.
Kalɛ na ulekubi kabla ɔblane ɔɔƒɔ́ nwuna kɔduni ɔgya teelieku.
24“Alakpa ene adi akya kayawi na ese blii suɛ,
nsu ana lɛnunda lísie ɔgyu geen.
25Balalɛ badi bebuo bani neeebo ɔlɔkplu,
nsu baaklibi adila teese lɛlɔ na kaƒɛndi.
26Besi udu bebuo badi bakya na beeebo ɔyikun,
nsu beedie libu na atakpɛ kemmo na baakɛ́ keliekɔ.
27Baalɔlɔ beeebo ɔga,
nsu baakɛ otogyi buni kemmo atɔ asia.
28Basamuda belede buƒie,
nsu adubɔnu-ma na baga lɛgbanya.
29“Na alakpa atɛ adi akya kayawi na bana bɔnya bɔɔtina lɛgadi.
Na ene mɔɔkɛ na lɛgadi kemmo.
30Gyata, bebuo ƒui ɔga
ɔni na lɛla biala lilagyila-nwu ɔtɔtɔ na usie kama.
31Akɔkɔ ɔgyani ku ketukpa
ku ɔga ɔni na nwuna bekpone báka bámana-nwu.
32“Si ábla adɔlɔla na ákun lɛmɛnɛ
iye eeti likpidi kasusu ni,
tebo kɔnu kayi!
Ti enu bi kenye ku kɔƒa.
33Kalɛ na si eebó akɔ lɛnyi ntu na uumi taayu ɔkplu,
na si lɛla lɛdi lɛ́wɔ-ɔ enwu na ɔɔdá ni,
lɛni kani na kɔnyi kuuboku kadɔ.”
Currently Selected:
Agba 30: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
