Agba 29
29
1Ukyuli ɔni mɔɔbla atuɔkplu na úni ɔnii
ukyuli ɔdi utedie-nwu bɔƒiɔ ni,
ɔdubo lɛlɔ udu bɔyila
na ɔdi ɔsɔ ulakana-nwu bɔbwi.
2Si ala aatɛku bekyuli babuni ni,
bekyuli baakɛ́ lɛlɔyɔ.
Nsu si bekyuli bekpidi mɔɔdi bekyuli lɛlɔ ni,
bekyuli beedumo.
3Ukyuli ɔni mɔɔyɔ́ lɛnunda ni, lɛlɔ lɛɛyɔ́ ɔti.
Nsu si anwu ku beleku bayalɛ mɔɔví ni,
nwuna lɛlakɛ lilélie.
4Ɔga ɔni mɔɔdi bekyuli lɛlɔ ulu lɛlɔ siin ni,
ɔɔyá nwuna kalɔ keesé kpoo na baakɛ́ atu bɔyɔ.
Nsu ukyuli ɔni mɔɔwia ka utaaƒɔ ala bekyuli kudɔ
na bɔbɛ kemmo taadi uwi ndi uwi ni,
uubile kalɔ kammɔ.
5Ukyuli ɔni mɔɔnyi ɔkɔ teemwi ukyuli ni,
kakpagyuɛ na ɔɔkywɛ-nwu ka ɔnu-ka kemmo.
6Bekyuli bekpidi ni, bana likpidi kakpagyuɛ muudie-ma.
Nsu bekyuli bani nse siin ni, baakɛ́ lɛlɔyɔ ku kudu.
7Bekyuli babuni baasia anu ka babla
ala ulu lɛlɔ siin bete bawabane,
nsu bekyuli bekpidi baaadaku ɔmmɔ.
8Bekyuli bani muudumi bekyuli taama baakya ɔma lɛsɛ.
Nsu banundane ama ni, baayila kɔnyi ala ƒui.
9Si ɔnundane úti ɔdɔlɔdi úsienku litemi katɛkɔ ni,
kɔvanu kukpludi ku kɔdɔlɔ ala kani
na mɔɔlɛ́ ɔdɔlɔdi ɔmmɔ kenye
na uléboku keyi buɛɛ.
10Bekyuli bani mɔɔwia ka bewi ubugya kalɔ
bekisi bekyuli bani mɔɔdi litemi geen lɛmmɔ lɛlɔ.
Na baawia ka badu bekyuli bani nse siin.
11Ɔdɔlɔdi uuti kɔnyi taayila kalɔ na ulanu kama.
Nsu ɔnundane anwu ɔɔda lɛlɔ na ɔɔbɛla nwuna kɔnyi.
12Si lɛlɔ ɔdine ɔdi ɔɔbu ɔkɔ banyine ni,
nwuna kasusu bakyane ƒui badubunwini belikplune.
13Bawabane ku bekyuli bani mɔɔnya-ma taakya ƒui ni,
badanku lɛla linwi lɛdi lɛni ndi ka
Unwoti úti anumi ani mɔɔnu bukeye úte bana inyɔ.
14Ɔga ɔni mɔɔtɛ bawabane litemi ulu siin lɛlɔ ni,
nwuna lɛgadi liinye kpakplaa teetu uwi.
15Si ada kegyimi aatumini ubi
na aadɔnku-nwu kpakplaa ni, ɔɔdá anu.
Nsu ubi ɔni na bédie atu na ulie úte nwuna lɛlɔ ni,
ɔɔyá na kɔƒa kuukpó uni.
16Si bekyuli bekpidi baalɛ́ lili ni,
lɛni kani na likpidi bɔbla bɔɔkɔ́ katɔ.
Nsu bekyuli bani nse siin badubulie
na banu kalɛ na belikplune bammɔ beebó kalɔ.
17Tumini ƒula bebi kaduɛ na badubɔya na akɛ atu bɔyɔ.
Na badubɔya ƒula kɔyu lɛlɔyɔ.
18Si bekyuli bátanu budie bɔtina bɔdi ni,
beení ka bunyimi bɔdi bɔdi-ma lɛlɔ.
Nsu ukyuli ɔni mɔɔdi ɔda bubo bɔmmɔ lɛlɔ ni, lɛlɔ lɛɛyɔ́-nwu.
19Kabla ɔblane ni, ɔɔɔdi kenye etemila kani na beeti taaklibi-nwu,
ɔsika ina ka uunú-nya kalɔ ni, ulábla taasiaku lɛni.
20Áasia anu ánu kenye ɔkplu ukyuli ɔdi dii?
Baakana na baasia ɔdɔlɔdi muedi lɛnu
teetulo ukyuli ɔmmɔ udu.
21Si ákya kabla ɔblane ásiku lɛnamu uwi ni,
ɔdubo ubaya na kɔnyana kuƒie-ɔ kama.
22Ukyuli ɔni muuti kɔnyi pla pla ni, ɔɔkya kekpo.
Na kɔnyi kɔmmɔ kɔɔyá na ɔɔbla ekpidi lidu lidu.
23Ukyuli lɛlɔ katɔ bɔkɔliku muuboku nwuna kalɔ bubo.
Na si éboku lɛlɔ kalɔ ni, bekyuli badubɔbu-ɔ na aƒɔ lɛnyi.
24Ukyuli ɔni nébunku uyune ni, anwu ɔlati muukisi lɛlɔ.
Ɔsika ulakana kenye buse na ɔsu lɛla lɛni nálɛ.
25Si ada lɛlɔ na bekyuli lɛlɔ liƒu ɔsu ni,
akya ɔgbankpi bonwu ɔdi kemmo.
Nsu ukyuli ɔni néti anu ásia Unwoti lɛlɔ ni,
lɛla biala lilékpoku-nwu
26Bekyuli pii baawia ka bada bana litemi bava lɛlɔ ɔdine ɔdi anumi.
Nsu litemi bɔtɛ ulu siin lɛlɔ ni, Unwoti kudɔ na ɔɔsí.
27Bekyuli babuni balayɔ bekyuli bekpidi.
Na bekyuli bekpidi lɛnɔ balayɔ bekyuli babuni.
Currently Selected:
Agba 29: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
