Agba 3
3
Ti Ƒula Anu Sia Unwoti Lɛlɔ
1Mina ubi, tayiƒala ala ani na lɛ́tina-a.
Mmomu da mina ɔda bubo kya ƒula kayi kemmo.
2Ɔsika ɔmmɔ ndubɔya na elie ngba gyɔlɔɔ
na ala adianku-ɔ na keyi kayɔku-ɔ.
3Tanyonu lɛƒɔndia bɔbla ku litemi kama bɔsiaku siin.
Ti ala amɛni bo bala ƒula limɔ
na aya na akɛ keliekɔ na ƒula kayi kemmo.
4Ɔmɛni ɔdubɔya na aƒɔ lɛnyi na adia
na Unwoti ku bekyuli ƒui anumi.
5Ti ƒula anu ku kayi ƒui sia Unwoti lɛlɔ.
Na teti anu tasia awɔ ɔlati ƒula ala kalɔ bunu lɛlɔ.
6Nu-nwu ti na ƒula lilu ƒui lɛlɔ,
na ɔdubɔtɔnku-ɔ na ƒula kasiakɔ ƒui.
7Ƒula anumi atatɔlɔ-ɔ na anu lɛlɔ ɔnundane.
Mmomu yia Unwoti na enwini kama akya likpidi.
8Ɔmɛni ɔdubɔya na akɛ ɔlɔkplu na ɔlɔna kemmo
na lɛlɔ ekubi asa-a kpakplaa.
9Ti ƒula lɛkɛ teemwi Unwoti.
Na eti ƒula edula biala ebi edeedi ete-nwu.
10Ɔdubɔya na ƒula linwu liyi ku edula abuni
na akpambui lɛnɔ eyi ku ntɛ mini mini.
11Mina ubi, teni si Unwoti ɔɔní-ɔ kɔtu ka ɔklibi-ɔ.
Na utekpoku-ɔ si ɔɔdɔnku-ɔ lɛnɔ.
12Ɔsika bekyuli bani na Unwoti ɔɔyɔ́ ni,
ama na ɔɔlɛ kpakplaa
aani kalɛ na ubi ɔti ɔdi ɔɔní ubidi
ɔni na ɔɔyɔ́ kɔtu.
13Lɛlɔ lɛdubɔyɔ ukyuli ɔni nákɛ lɛnunda
na uunú ala kalɔ.
14Ɔsika ubo kɔsia utulo sika ɔƒualadi.
Na nwuna lɛkɛ litulo sika ugyiedi.
15Lɛnunda lɛ́ƒɔ kuye litulo asɛɛ ebi
ani náƒɔ kuye geen muedi.
Na lɛla bamba lɛni na ukyuli ɔɔwia
lɛdi lítaƒɔ kuye liiitulo ɔmɛni.
16Lɛnunda lɛdanku ngba gyɔlɔɔ na nwuna kɔdianu.
Na nwuna kɔmiinu lɛnɔ kɔdanku lɛkɛ ku ɔbu.
17Nwuna lilu lɛdi kasiakɔ kabuni.
Na lɛdi keyi buɛɛ lilu.
18Ngba kugyii ndi lɛnunda ute bani nda-nwu kpakplaa.
Lɛlɔ lɛdubɔyɔ bani nébo enu báda-nwu.
19Lɛnunda na Unwoti úti ɔ́kya kalɔ kammɔ ɔka kalɔ.
Na ala kalɔ bunu na úti údie katɔ ɔ́ƒala kayaa.
20Na ɔkɛnku nwuna lɛlati lɛlɔ
na úle ntu bonwu bɔmmɔ akpa akpa.
Na ɔɔyá na liƒlukutu lɛnɔ lɛɛyu amii.
21Mina ubi, sia ala bɔnu taati anu
ku etemila kemmo bɔƒuna kaduɛ
na tada ɔdi tava.
22Ɔsika ɔmmɔ ndi ƒula ngba.
Na ɔdubunwini aani sika asɛɛ
na ƒula limɔ ani ndubɔkya-a bɔdia.
23Na adubusie ƒula ngba ulu kɔkɔɔkɔ.
Na ƒula ɔgba uletulo iye agbanta.
24Si áyu átɛ ni, liƒu biala lilada-a,
mmomu adubɔlɛɛ na lɛlɛɛ lɛyu-ɔ.
25Tayia ɔgbankpi ɔni muuyú bekyuli taatu
iye ala ani muubieku balalane.
26Ɔsika Unwoti lɛlɔ na ése kayi
na anwu ndubudie-ɔ
na alakya kakpagyuɛ kadi ɔgba.
27Teni lɛbuni bɔbla bute ukyuli
ɔni mɔɔwia-a kebunku
si ánu ka ébo ɔyikun ɔmmɔ.
28Tasu ƒula ukyulikpana anini,
“Teesie, kɔnaadi na ebo abaƒɔ,”
si lɛla lɛni na uuvele-ɔ lise-ɔ ɔmwi.
29Awɔ ku ukyuli ɔdi bitasa lili likpidi
na ƒula liku ɔkpana lɛlɔ,
ka bilie bide ku ebiti.
30Tada ƒula ɔkpana kenye kekeeke
si útabla-a lɛla lɛdi.
31Anumi etegyie-ɔ na bekyuli bekpidi
bani mɔɔkya lɛsɛ lɛlɔ.
Na tasiaku bana ɔbladu kama.
32Bekyuli bekpidi bammɔ ala eesé Unwoti lɛlɔ geen.
Nsu bekyuli bani nse siin ni,
ulábɛla-ma nwuna kasusu.
33Unwoti uuwida bekyuli bekpidi kɔduli.
Nsu nwuna kusɛ kusɛ ɔɔsiaku bekyuli bani nse siin.
34Na ɔɔpii bekyuli bani mɔɔpii bekyuli
ka baatalaku lɛlɔ katɔ ɔsu.
Mmomu uubunku bani muuboku lɛlɔ kalɔ.
35Banundane baakɛ́ ɔbu kese.
Nsu badɔlɔdi ama ni, kɔƒa na beli bete.
Currently Selected:
Agba 3: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
