Agba 26
26
1Ɔbu ɔdi ulásiaku badɔlɔdi kalɛ kani na
etubankɛ aláyu kaƒɛndi iye ɔnantu ɔna edula ɔƒɛwi.
2Kalɛ na lɛsɛɛmɛɛ liibó avwi
na lɛkpaƒɛɛlɛ liiveyi
taatɔlɔ ni,
lɛni na si éwida ukyuli kekeeke,
nsu útabla lɛla lɛdi
na eewida ammɔ eeveyi
taatɔlɔ-nwu kudɔ.
3Uƒiɔ na beeti taatina ɔpɔnkɔ kesii kani na ɔsia.
Na kabuli na baakya ebuo ala utine kenye
taani na batina-nwu kasiakɔ.
Na ɔdɔlɔdi ni, kugyiimi na beebó-nwu kama.
4Si awɔ ku badɔlɔdi bɛɛkya unyeƒi ni,
tedie bana kɔdɔlɔ ala ani beeye-ɔ kenye
amu awɔ lɛnɔ adubɔbla ala kɔdɔlɔ kemmo aani bana kalɛ.
5Si awɔ ku badɔlɔdi bɛɛní lɛla lɛdi teenene ni,
die bana ala ani na beeye-ɔ kenye
na aya basɔ bakya bana kɔdɔlɔ kemmo.
6Si áƒɔ ɔdɔlɔdi ádi anii watásu kenye kalɛ na ásia-ka ni,
ɔdi kɔdɔlɔ kakali kani nse aani kalɛ na
ekulo awɔ ɔlati ɔgba edie iye ani kuvo kukpidi.
7Si ɔdɔlɔdi ɔnii uubó lɛgba ni,
úlieku aani kalɛ na ɔgba uukpi ukyuli gbinigbini.
8Si émwi ɔdɔlɔdi na ákɔliku-nwu lɛnyi katɔ ni,
use aani kalɛ na baabala lɛtabi
taakya kavwinvwi kemmo kalɛ na lilálɛ.
9Ɔdɔlɔdi lɛgba bubo buse aani kalɛ na ntɛ ukpine
ɔɔgyú liyu kagba taada kɔnu teeƒwimi.
10Ukyuli ɔni mbo kabla na úti-ka ɔ́kya ɔdɔlɔdi lɛkɔkɔ ni,
use aani ukyuli ɔni muubó kataminta
taakya kayaa lɛla lɛdi tanu tanu.
11Kalɛ na akpewe ɔsɔ uuti nwuna kɔdala ni,
lɛni na ɔdɔlɔdi ɔɔsɔ teenwini
teesie nwuna kɔdɔlɔ ala bɔbla kudɔ.
12Badɔlɔdi lɛnunsia na ala lɛlɔ ni,
ɔdia utulo bekyuli bani mɔɔkali ka
báda anu, nsu bátada anu.
13Ɔkɔsɔne ubo kɔkwɛ pii kɔni na uuti
taawia kuƒi teete lɛlɔ na ɔɔsu ɔnini,
“Ɔƒɛni kalɛ gyata unye-mi ulu
na ɔdubuƒie-mi si lɛ́lɛ lísie ntábla lɛla lɛdi.
Sɔsɔ ngyi ka gyata ɔdi unye mmɔ!”
14Kalɛ na ɔpunu ɔɔlɛmi teesie teebo ni,
lɛni na ɔkɔsɔne ɔɔtɛ nwuna atɛla lɛlɔ teebo teeminime.
15Kɔkɔsɔ kɔɔdi ɔkɔsɔne lɛlɔ geen
ɔni na kalɛ na ɔmini adila ɔkya kenye muedi
ɔɔda-nwu kɔkɔsɔ.
16Bakɔsɔne baanu lɛlɔ ka ama mmomu náda anu
betulo banundane kasusu betine maatɛ.
17Si ákya ukyuli kɔtɛ kenye na aaagyi-ku lɛlɔ lɛla lɛdi ni,
ɔdi kɔdɔlɔ ala bɔbla.
Na use aani si áda akpewe ɔni na aaagyi kɔtu aaní.
18Kalɛ na si ubuokpine ɔda lɛtula
lɛni mɔɔkana na liibile ala na ɔɔda liƒu ni,
19lɛni kani na si ukyuli ɔdi ɔ́nyi ɔkɔ ɔ́su nwuna ɔkpana lɛla lɛdi
na ɔ́ƒɔ-ni ku kayi asa kama na ɔnini,
“Bɔƒia kani na nda” ni, ubo liƒu.
20Si ekyweni aakywí laa na ása ni, buni na ogya uuni.
Lɛni kani na si kɔtɛ keeke kɔ́sa bɔtɛmi ni,
kadɔ lɛnɔ kása.
21Ukyuli ɔni mɔɔyɔ́ kadɔ uuubo kekpo bɔkya
aani kalɛ kani na ogya egyiiku akukudi eeebo ogya bɔƒɔ
iye agyabi aayá na aƒɛ aaƒɔ́ ogya.
22Ɔkɔ etemila ani nse aani lɛna wɛlɛ wɛlɛ ebo emini
na anya mɔɔyu teduo ukyuli kayi kemmo.
23Kɔtɛ kɔni baakya emini aabɛla kasusu kekpidi
kani nkya ukyuli ɔdi kayi kemmo
aani kalɛ baanwamana sika ugyiedi ntu taakwaa libui.
24Bekyuli bani na bekyuli litemi lɛkya-ma kayi ni,
uwi ɔdi baatina ka badia geen, nsu taƒɔ-ma tadi.
25Ina ka bekyuli bamɛni baabla lɛlɔ aani bebo lɛƒɔndia ni,
likpidi lɛ́ƒɔ-ma kayi kemmo tɛɛ.
26Ina ka badubɔkya lɛkwɛ na babɛla lɛla lɛmmɔ ni,
ɔdubo ubalɛ keyi na bekyuli ƒui banu.
27Si ákywɛ ƒula ɔkpana
kakpagyuɛ ni,
awɔ ɔlati ndubo-ka kemmo bɔnu buduo.
Na si éminime lɛtakpɛ bonwu lɛdi anii litásia bekyuli lɛlɔ ni,
lɛdubɔsɔ linwini libasia-a.
28Unyemi ɔni mɔɔnyi ɔkɔ taasia ukyuli ni,
uláwia ukyuli ɔmmɔ bɔdia.
Na katɔlɔ kaadú ukyuli.
Currently Selected:
Agba 26: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
