Agba 25
25
Salomo Ɔ́sɔ Úbo Agba Bamba Adi
1Salomo ɔ́sɔ úbo agba bamba, na Ɔga Hesekia kasusu bakyane bani nkya Yuda kalɔ lɛlɔ bénweni-nya bése.
2Unwoti ala ani na ɔ́bɛla
bekyuli ni,
anya mɔɔtina kalɛ na úbomo
na uukeye.
Na ɔga ɔni mɔɔwia-nya kalɔ
taati ni,
ɔɔƒɔ́ lɛnyi na baabu-nwu.
3Ukyuli ɔdi ɔɔɔgyi kalɛ na katɔ kákuku kétédu,
iye kesii kani na kalɔ lɛnɔ kágyu kétédu,
iye ɔti lɛla lɛni nkya ɔga ɔdi kasusu kemmo.
4Si ákya sika ɔƒualadi ogya na
kɔtakɛ kɔni
nányi kɔ́kpi mmɔ kɔ́lɛ-nwu
lɛlɔ ni,
ugyii ɔni na ukyuli biala ɔɔnu ka ɔ́ƒɔ kuye mmɔ
únwini kabla lɛblala teete ɔkywɛne ɔmmɔ.
5Lɛni kani na si bekyuli bekpidi
bálɛ ɔga ɔdi lɛga kadikɔ ni,
nwuna lɛga kadikɔ
kadubuse kaduɛ
na bataabla ala siin
na ulu lɛlɔ.
6Takpali ɔga tasu anii uteenu lɛla lɛni na adubo bɔsu
iye anwanɛ lɛlɔ anii aakɔ́ esie kesii
kani na benengu bani ntulo-ɔ beli.
7Nye na bakpali-ɔ bene banii, “Ni de kenengudikɔ mɛni,”
utulo ka babɔku-ɔ batɔlɔku
keliekɔ kenengudi
kani na aanwanɛ ka elie
ku kɔƒa.
Tanu lɛla biala,
8na eti litemi lɛmmɔ
esienku litemi katɛkɔ,
ɔsika kɔƒa kɔdubo-ɔ bukpo
si útádi-ɔ ubo.
9Si ƒula ɔkpana ɔ́ƒiɔ-ɔ ni,
awɔ ku-nwu bɛsu-ni kani na ɔwɔ mmɔ.
Tatásu ukyuli bamba na edie lɛbɛla lɛmmɔ keyi.
10Si ɔɔɔdi lɛni ni, awɔ ɔmmɔ ɔlati
adubo ebenwini lɛmala na bekyuli anumi,
na adubɔnu ka bada atɛ ammɔ baatɛmi uwi ndi uwi.
11Kasusu kani beete ukyuli na uwi ɔbuni lɛlɔ
use aani adingyii ebi ani négyie kaduɛ
na bátɛ-nya bákya sika ɔƒualadi lɛkyami kemmo.
12Si édie ukyuli bɔƒiɔ na éti-nwu ásia ulu ɔbuni lɛlɔ ni,
ɔdi lɛla lɛbuni geen ute ukyuli ɔni muunú bɔlɛ bɔmmɔ
aani asɛɛ abuni ani na béti sika ugyiedi bábla.
13Ukyuli ɔni muusié bɔtala taatábla kalɛ kani na básu-nwu ni,
nwuna ala aayu kayi buɛɛ aani kalɛ na
etubankɛ aabla kadi kani na káƒɔ ogya buɛɛ.
Bekyuli bammɔ udu baayá na bekyuli
bani bɔtala na beesié mmɔ ayu aakɛ́ lɛlɔyɔ.
14Ukyuli ɔni muusé kenye kekpludi na ulábla
taasia lɛni ni,
use aani ulɔyɔ ku ɔƒɛƒɛɛ
ɔni naaakana ɔnantu bɔna.
15Kayi buɛɛ kadubɔkana
na kenwini ɔgabi ɔdi kasusu.
Na lɛdi buɛɛ butemi
bɔdubɔkana na bɔdi ukyuli
ɔni mɔɔkyaku-ɔ unyeƒi lɛlɔ.
16Si ákɛ uwɔ ni, tadi-nwu taavili
amu ɔdububo-ɔ ɔlɛ.
17Si eesié ƒula ɔkpana kudɔ busie busie ni,
ɔsɔ ɔɔɔdubo bɔdia
na bete-ɔ éduo.
18Ɔkɔ bɔnyi taasia bekyuli uuduo teetulo
ka eti kadadi iye kewii iye lɛtula atu ukyuli.
19Si éti ƒula kayi ásia ukyuli
ɔni na balaƒɔ taadi lɛlɔ ni,
use aani si lɛnyi lɛɛkunku-ɔ
na ada-ni aanwánta
iye akɛ eesié ɔgba ɔni
násɔ-ɔ lɛlɔ.
20Si ukyuli ɔkya kɔnyana kemmo na eedie ebiti lɛnu
taakya-nwu atu ni,
ɔɔdu lɛlɔ teetulo si éƒie kɔyɔ awu áƒɔ ukyuli kudɔ na kɔyɔ uwi
iye akɔ mma akya-nwu ɔlɛ kemmo.
21Si kɔka kɔɔda ƒula ukisine ni, te-nwu adila na ɔdi.
Si utukwɛ mɔɔda-nwu ni, te-nwu ntu na ɔni.
22Ɔsika si ábla lɛni ni, édie ogya ku agyabi éwi-nwu lili.
Na Unwoti ɔdubɔƒɔ-ɔ kayu.
23Kalɛ na ɔƒɛƒɛɛ ɔni muukpó taasi katɔ
taayu uuboku ɔnantu ni,
lɛni kani na katɛ ɔtɛne keeke ɔɔkya ukyuli kɔnyi.
24Si awɔ lɛti elie ƒula lɛyu lɛdi kemmo kpoo ni,
ɔdia-a utulo ka awɔ ku uleku
ɔni mɔɔyɔ́ ɔgyani kenye ɔdi
bɛkya lɛgbanya lɛdi kemmo.
25Kenye buni kani mɔɔsí ɔgyu teebo ukyuli
kese aani ntu bamamba bɔni mɔɔdú utukwɛ.
26Si bekyuli babuni ku bekpidi básala lɛlɔ
na ɔbladu buɛ ɔdi lɛlɔ ni,
use aani kalɛ na beebwiiile ntu bɔdi
iye beti aba taakya libiɔ lɛdi kemmo.
27Si uwɔ ɔɔɔdia bɔdi bɔvili ina ka ubo emini ni,
lɛni kani na ɔɔɔdia ka ukyuli elie ataakali
lɛla lɛni na ɔlɛka bete-ɔ na ƒula kenyekɔ kenye.
28Ukyuli ɔni na ulakana lɛlɔ lɛlɔ bɔdi ni,
use aani ɔma ɔni na awodu ani mɔɔgyumana-nwu ábwɛ.
Currently Selected:
Agba 25: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
