Agba 15
15
1Kɔnyi kulakɔ ukyuli
si éboku lɛlɔ kalɔ na édie
litemi kenye buɛɛ.
Nsu etemila bɔtu taalɛ ukyuli ɔɔyá kɔnyi kuubo.
2Ɔnundane ni, ala bɔtɛya bɔdi-nwu ebiti.
Na badɔlɔdi ni, bágyu kenye beti beedie kɔdɔlɔ keyi.
3Unwoti ɔɔnu kesi kesii,
na nwuna lɛnumi lɛsia bekyuli bekpidi ku babuni lɛlɔ.
4Etemila ani mɔɔyu buɛɛ aayá na ukyuli
uulie ngba na ɔɔkɛ́ ɔyikun.
Na unyemi ɔni mɔɔnyi ɔkɔ ɔɔdú ukyuli kɔyu.
5Ɔdɔlɔdi kani muuní ka nwuna bawɔne batumini-nwu.
Ukyuli biala ɔni matɛya lɛla
lɛdi wasiku bɔƒiɔ
bɔni bédie-nwu lɛlɔ ni,
ɔ́da anu.
6Lɛlakɛ lɛbuni liisé bekyuli babuni kesii.
Nsu bekyuli bekpidi ala ani na baakɛ́ adanku ɔgbankpi.
7Banundane kani mɔɔkana na baakya ukyuli kasusu buni.
Na badɔlɔdi balakana ɔmɛni bɔbla.
8Bekyuli bekpidi akpala ni, Unwoti ukisi-nya.
Nsu lɛlɔ lɛɛyɔ́-nwu si bekyuli bani nse siin baakpali-nwu.
9Bekyuli bekpidi kɔsiakɔ ƒui kulayɔ Unwoti kaƒɔ.
Nsu bekyuli bani mɔɔwia kpakplaa
ka belie ngba bɔbuni ni, Unwoti ɔɔyɔ́-ma.
10Ukyuli biala na únwini kama ɔ́kya ulu geen ɔmmɔ ni,
Unwoti ɔdubɔni-nwu kɔtu kpakplaa.
Na ukyuli ɔni nkisi ka bedie-nwu bɔƒiɔ ni,
ɔdubo bukpi.
11Unwoti ɔgyi kukpi kalɔ
ku kalɛ na ukyuli ɔɔkywí taayii udu.
Anwuɔsu ukyuli kayi kemmo lɛla lɛdi lilábɛ-nwu!
12Bekyuli bani muuti lɛla biala taabla lɛmala ni,
balayɔ bekyuli bani mɔɔdɔnku-ma.
Anwuɔsu na balani teede banundane.
13Kayi kani kemmo na lɛlɔyɔ lɛkya ni,
kana anumi muukeye ku lɛma.
Nsu ukyuli ɔni náyila
lɛnunsia ni,
enu aaƒɛ-nwu.
14Ɔnundane ni, litemi geen kama bɔsia kɔka mɔɔda-nwu.
Na ɔdɔlɔdi ni, ala ani neeebo kɔsia lɛlɔ na ɔɔkɛ́ ebiti.
15Ɔwabane ni, limeyi biala ala eekpóku-nwu.
Nsu bani na lɛlɔ lɛɛyɔ́ ni,
ngba bumodi bɔdi limeyi bɔdi bute-ma.
16Ɔdia si aayia Unwoti ina eeebo ala pii utulo
si ebo lɛlakɛ na bɔnwuna buuubo-ɔ kaduli.
17Si awɔ ku ƒula ɔkpana ɔdi bɛ́sa
na kutukplu lɛkyami kalɔ ni,
ɔdia utulo si awɔ ku ƒula ukisine bɛ́sa na ɔkyimu kalɔ.
18Ukyuli ɔni na uuubo kayi buɛɛ ɔɔkya kekpo.
Nsu ukyuli ɔni na ɔ́da kayi ɔ́va kalɔ buɛɛ ni,
ɔɔyala kekpo kammɔ.
19Ɔkɔsɔne ni, ala aláda-nwu bukpoku taaya
nwuna ngba kemmo ƒui.
Nsu ukyuli ɔni mɔɔsia nwuna kabla anu ni,
nwuna keyi kaabla kpɛtɛ kpɛtɛ.
20Bebi bani kasusu nse nwaa baayá lɛlɔ lɛɛyɔ́ bana ɔti.
Na bebi badɔlɔdi muuní bana uni.
21Badɔlɔdi ni, ama na kubiti kɔɔda si baanu adɔlɔla.
Na ɔnundane ɔɔsia ulu ɔbuni lɛlɔ uwi ndi uwi.
22Ukyuli kabla kɔkwɛ kɔni na ɔɔkya kuubie-nwu
si ulaƒɔ kasusu na bekyuli kudɔ.
Nsu si eeye bekyuli pii kasusu ni, ƒula ala aatɛ.
23Lɛlɔ lɛɛyɔ́ ukyuli ɔni muudie lɛla lɛdi kenye
teete ɔnwani ulu lɛlɔ nwaa.
Ɔdi lɛla lɛni mɔɔyu kayi si ásu lɛla lɛdi
na uwi ɔni na basu-ni lɛlɔ.
24Ɔnundane kasiakɔ kási mɛni késela
ngba ƒui kemmo na katɔ,
ɔsika kaƒiɔtɔ kelénwini-ma keliekɔ uwi ƒui.
25Bekyuli bani mɔɔkɔli lɛlɔ katɔ ni,
Unwoti ɔɔbwɛ-ma kɔduli na baayii udu.
Nsu ɔɔgyumana bekpinele ala ani na bebo.
26Unwoti ulayɔ bekyuli bekpidi kasusu kani beeti.
Nsu lɛlɔ lɛɛyɔ́-nwu si bekyuli baatɛmi etemila
ani mɔɔdia bunu.
27Lɛlakɛ lɛni naaakɛ ulu ɔbuni lɛlɔ líduo lɛkɔkɔ ni,
Unwoti ɔɔyá na lɛbibo liiduo ɔtɔ ɔmmɔ ƒui kemmo.
Nsu ama bani naaabɛ taaƒɔ ala bekyuli kudɔ taadi ni,
ama ndubulie ku keyi buɛɛ.
28Bekyuli babuni baaka kasusu buti
asa na baasu lɛla lɛdi.
Nsu bekyuli bekpidi ama bɔtu kani
na baatu etemila teebewi.
29Unwoti ɔ́gyunku bekyuli bekpidi kudɔ ƒui.
Nsu uunú bekyuli babuni kenye si baakpali-nwu.
30Si áƒɛnimi anumi ákya ukyuli ni, kayi kaayɔ́-nwu.
Na si énu kenye buni ni, ɔɔkya ɔlɔna ɔkplu.
31Si ukyuli údie-ɔ bɔƒiɔ
na ɔ́tina-a kasiakɔ ni,
adubɔkɛ kelie na
banundane akɔ.
32Si éni anii ukyuli utedie-ɔ
bɔƒiɔ ni,
awɔ ɔlati lɛlɔ na aabla kalala.
Nsu si áda lɛlɔ na bédie
ƒula bɔƒiɔ bátina-a ni,
adubɔkɛ lɛlati na eteenu
ala kalɔ.
33Si aayia Unwoti ni, ɔɔtina kalɛ na áda anu.
Na lɛlɔ kalɔ buboku mɔɔtɔ asa na ɔbu ɔɔsia.
Currently Selected:
Agba 15: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
