Agba 14
14
1Uleku ɔnundane ɔgyi kalɛ na baada ɔtɔ na uunye.
Nsu uleku ɔdɔlɔdi anwu ɔlati mɔɔbwɛ nwuna ɔtɔ.
2Bekyuli bani mɔɔsia ulu ɔbuni lɛlɔ ni, baayia Unwoti.
Na bani mɔɔsia ulu ukpidi lɛlɔ beení Unwoti.
3Badɔlɔdi enyekpi muunwíni kugyiimi
kɔni mɔɔsia-ma kama.
Nsu banundane ala ani na
baasu ni,
eedie-ma na ɔgbankpi kemmo.
4Bebuo lɛyu lɛni kemmo na ebuo ɔdi uuubo ni, liisé sɛɛn.
Nsu kɔsia kɔdi kulasi lɛyu likpludi lɛmmɔ kemmo.
5Ukyuli ɔni nánu lɛla lɛdi na uudie litemi geen
lɛmmɔ kenye ni, ulanyi ɔkɔ.
Nsu ukyuli ɔni na útanu lɛla lɛmmɔ ɔɔnyi ɔkɔ.
6Ukyuli ɔni na uuti lɛla biala taakya bɔƒia ni,
si ina ɔɔwia lɛnunda muedi ulákɛ-ni.
Nsu bekyuli bani muunú ala kalɔ ni, baatí lɛla.
7Da lɛlɔ mami badɔlɔdi lɛlɔ,
ɔsika aaadubo lɛla lɛdi bɔti bana kudɔ.
8Banundane ni, baanu uwi ɔni ntɔ anumi ɔdubo ƒui
taati lɛla lɛni ndubo libalɛ.
Nsu badɔlɔdi ama bana lɛlɔ kani na baatɔ́lɔ.
9Badɔlɔdi beeti bana bɔƒiɔ taabla lɛmala.
Nsu bekyuli babuni baanu bana bɔƒiɔ taati
na beevele ka basɔ babla unwi ku ukyuli ɔni na báƒiɔ.
10Ukyuli biala ku kalɛ na lɛla lɛdi liikpóku-nwu kayi.
Na ukyuli uláti kalɛ geen na lɛlɔ lɛɛyɔ́ ukyuli bamba
na nwuna kayi kemmo.
11Balalane kaduli kadubo bɔbwɛ.
Nsu ukyuli ɔbuni kevo kadubɔlɛ lili na bemomo.
12Ukyuli biala ɔɔnu kasiakɔ kadi na nwuna
ngba kemmo ka nka kadia,
nsu nwuna kawɔlɔkɔ ni, kekpine kani na ɔɔdá taalɛ.
13Lɛma lɛɛyá na ɔɔbla aani si lɛla lɛni
muukpóku ukyuli lɛ́sa.
Nsu si lɛma lɛmmɔ lɛ́vi ni,
lɛla lɛni muukpóku ukyuli ɔmmɔ lɛ́sɔ línwini keku.
14Bekyuli bani muunwíni ulu ɔbuni ɔmmɔ lɛlɔ ni,
baakɛ́ bana lɛyuƒɔla.
Na bekyuli babuni baakɛ bana lɛbuni kɔsia.
15Bekyuli bani kasusu násɔ ni,
ama mɔɔƒɔ́ lɛla biala taadi.
Nsu bani mɔɔsia lɛlɔ anu
kaduɛ ni,
baabu lɛla biala lɛlɔ taanu asa na beedie ɔgba.
16Banundane baatí lɛlɔ kalɛ
na beekeli ɔgbankpi.
Badɔlɔdi ama baatu lili taakya lɛla biala kemmo
ku kayi kekpidi.
17Bekyuli bani muuti kɔnyi
pla pla ni,
baabla adɔlɔla.
Na bekyuli bani mɔɔbɛ́ taabla ala kalɔ kalɔ ni,
bekyuli beekisi-ma.
18Bekyuli bani kasusu násɔ ni, utulo ka kɔdɔlɔ awu bakya.
Na banundane ni, lɛlati línwini aani kagabwa kebi-ma lili.
19Bekyuli bekpidi badubɔkya
lili kalɔ
bete bekyuli bani mɔɔbla ala
ulu lɛlɔ.
Na balalane badubɔkya lili kalɔ
bete bekyuli babuni na bana ɔba kenye.
20Bawabane ni, ama alati
bana bekyuli muedi
balánu-ma taakya lɛla
lɛdi akɔ.
Nsu balakɛne ama ni, balakana-ma bakpana bɔka.
21Si eekisi ƒula ɔkpana ni,
likpidi lɛdi-ɔ.
Kusɛ kusɛ ɔdubɔsiaku bekyuli
bani muubunku bawabane.
22Si aawia ukyuli likpidi ni,
adubo bɔyii.
Nsu si lɛbuni na aawia
ukyuli ni,
Unwoti ɔdubɔyɔ-ɔ uwi ndi uwi
na ɔdi nwuna litemi lɛlɔ ute-ɔ.
23Kabla keeboku kɔsia.
Nsu atɛ keeke adanku kɔwaba.
24Lɛlakɛ lɛdi kagabwa kete banundane.
Na badɔlɔdi kogyoklo ƒui ni, adɔlɔla ebi na aanwu.
25Ukyuli ɔni mɔɔnu litemi geen teedie-ni kenye
ɔɔƒɔ́ bekyuli ngba.
Nsu ukyuli ɔni mɔɔnyi ɔkɔ teedie litemi kenye ni,
uudie bekyuli teete.
26Lɛla lɛdi lilekpoku bekyuli bani mɔɔyia Unwoti.
Ɔsika Unwoti ɔdi katamikukɔ ute bana bebi.
27Si aayia Unwoti ni, ɔdi libiɔ lɛni mɔɔyu ntu
baaní teelie ngba ute-ɔ.
Na ɔɔyá na ekeli liƒu lɛni na kukpi kɔɔkya-bu.
28Si kadi kadi bekyuli beemomo ni,
lɛlɔ lɛɛyɔ́ ɔga ɔmmɔ.
Nsu si baasá ni, baayii udu.
29Bekyuli bani mɔɔkana bana kɔnyi bɔbala ni,
bebo lɛlati.
Na bani muuti kɔnyi pla pla ni, badubo bɔƒiɔ.
30Si áda kayi áva kalɔ buɛɛ ni, ngba buune-ɔ.
Nsu kogyulo lɛnungyie lɛɛdú ukyuli.
31Bekyuli bani muukpóku bawabane ni,
beedumi Unwoti.
Nsu bani muubunku-ma ni, baabu Unwoti.
32Bekyuli bekpidi ni, bana alaekpidi mɔɔyila-ma udu.
Nsu bekyuli babuni bebo katamikukɔ si békpi.
33Ukyuli ɔni muunú ala kalɔ ni, ubo lɛnunda
na lɛ́ƒɔ-nwu kuye geen na nwuna kayi kemmo.
Nsu badɔlɔdi balánu lɛnunda kɔsia.
34Kadi bani mɔɔyia Unwoti ni, baalɛ́ lili ku ɔyikun.
Nsu likpidi lɛdi kɔƒa ala ute kadi biala.
35Lɛlɔ lɛɛyɔ́ ɔga na kabla bablane bani ngyi bana kabla
na baabla-ka ulu lɛlɔ lɛlɔ.
Na bani na lɛsɛ kani na baakya
na balásia kabla anu ni, ɔɔkɛ́ku-ma kɔnyi.
Currently Selected:
Agba 14: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
