Agba 10
10
Salomo Úbo Agba Adi
1Salomo agba bamba ndi amɛni.
Lɛlɔ lɛdubɔyɔ bawɔne bani bebi mɔɔdá anu.
Nsu ubi ɔdɔlɔdi bawɔne ni,
badubuwulo ku kɔnyana.
2Lɛkɛ lɛni na ukyuli ɔ́sia ulu ukpidi ɔdi lɛlɔ ɔ́kɛ ni,
liiibo kɔsia.
Nsu si elie ngba na ulu ɔbuni lɛlɔ ni,
adubɔkɛ ngba bɔƒɔ.
3Unwoti ɔɔɔdubo bɔya na kɔka kɔdu nwuna ukyuli
ɔni mɔɔbla nwuna lɛƒɔyɔ.
Na bekyuli bekpidi ama ni,
Unwoti ulenu-ma ala ani na beevele-nwu.
4Bakɔsɔne beeebo bawabane bunwini.
Mmomu bagyoklone mɔɔkɛ́ lɛkɛ.
5Okloƒu ɔni na ɔ́da anu ni,
uunye kabla lɛlɔ kpakplaa ɔtumawi ƒui.
Na okloƒu ɔni mɔɔtɛ taalɛɛ
uwi ɔni na nka katuma kuƒi kɔ́lɛmi-nwu ni,
kɔƒa na uuboku kaduli.
6Kusɛ kusɛ ɔɔsiaku bekyuli bani mɔɔbu Unwoti.
Na bekyuli bekpidi baabɛla bana kasusu
kekpidi kɔkwɛ.
7Bekyuli kasusu kaasia bekyuli babuni lɛlɔ,
nsu balalane anyi muedi aayii kede kede.
8Ebiti aada banundane si baalɛ-ma.
Nsu katɛ batɛne badɔlɔdi ni,
beebuli teeti anumi teebi kalɔ.
9Na bekyuli bani mɔɔdi litemi lɛlɔ ulu lɛlɔ ni,
balánya teegyiile.
Nsu bani kasiakɔ nse gontii ni,
badubo bugyiile bubuli.
10Bekyuli bani mɔɔnu likpidi
taamana bekyuli lɛnumi ni,
baakya lɛsɛ.
Nsu si átanu ukyuli anumi na ádɔnku-nwu mmomu
na likpidi lɛdi ɔsu ni, eeboku keyi buɛɛ.
11Bekyuli babuni etemila aakpanku ukyuli
teesienku ngba kemmo.
Nsu bekyuli bekpidi beeti ala
teebi bana kasusu kekpidi.
12Ukyuli bukisi bɔɔkya kadɔ ɔgya.
Nsu bɔyɔ bɔsɔ bulánu likpidi na ukyuli lɛlɔ.
13Bekyuli bani muunú ala kalɔ ni,
baatɛmi lɛnunda etemila.
Nsu badɔlɔdi ama ni,
kegyiimi na badubuti bani-ma kɔtu.
14Lɛlati lɛ́ƒɔ banundane kuye,
nsu badɔlɔdi adɔlɔtɛ eeboku lɛlɔ bukpoku.
15Balakɛne baanu bana lɛlakɛ aani kɔbi bonwu
kɔni na ukyuli ɔdi ulakana bɔƒuaala.
Na bawabane kɔwaba ndi bana ɔgbankpi.
16Bekyuli babuni lɛyuƒɔla muubunku bana keliela.
Nsu bekyuli bekpidi ama ni,
likyulikpi ala bɔbla lɛlɔ beewiakun bana egulabi.
17Bekyuli bani mɔɔtuna na baalɛ-ma ni,
baasia ngba ulu lɛlɔ.
Nsu bani muuní ɔmɛni ni,
baakpanku bekyuli bamba lɛnɔ taatáyila.
18Ukyuli ɔni muukisi ukyuli na ɔɔbɛla-mu ɔdi ɔkɔ ɔnyine.
Na ukyuli ɔni mɔɔlɔ bekyuli anyikpi ɔdi ɔdɔlɔdi.
19Sɔ tatɛmi pii, ɔsika atɛ pii aadanku likpidi.
Da anu na akɔsi atɛ bumomo!
20Bekyuli babuni etemila ese
aani sika ɔƒualadi ɔni bekyuli bánu ka ɔdia.
Nsu ukyuli ukpidi kayi
kemmo ni,
kɔsia kɔdi kulalɛ.
21Bekyuli babuni baalɛ ukyuli ulu ɔbuni lɛlɔ.
Nsu bekyuli bekpidi ama baayii udu
na bana lɛla tati ɔsu.
22Unwoti kusɛ kusɛ mɔɔyá na ukyuli uunwíni ɔlakɛne,
na kɔnyana kɔdi kulásia ɔmmɔ lɛlɔ.
23Badɔlɔdi ebiti ndi ka belie bataabla likpidi.
Nsu banundane ebiti ndi ka bada udu buɛɛ
na babla ala lɛnunda kemmo.
24Ala ani na balalane baayia ka atalɛku-ma ni,
anya geen ndubɔlɛku-ma.
Na lɛni kani na bekyuli babuni ala
ani lɛlɔ na bebo lɛnunsia adububo ete-ma.
25Ɔgbankpi uubo bekyuli bekpidi lɛlɔ
aani ɔƒɛƒɛɛ ɔni mɔɔkya ligede, na uuti-ma ƒui.
Nsu bekyuli babuni kɔwodu kalɔ ɔka
ɔni bákya uunye teetu uwi.
26Bakɔsɔne baakya bekyuli bani kabla na baabla ɔlɛ.
Na bese aani uyɔ ɔni muuduo ukyuli anumi
iye ntɛ bɔnani bɔni mɔɔyá na kenye anyi aanyi.
27Si aayia Unwoti ni, ngba buune-ɔ.
Nsu balalane ngba bɔɔdá likuku.
28Bekyuli babuni lɛnunsia liiboku ebiti,
nsu ala ani na bekyuli bekpidi baasia anu
eenwíni lɛƒua.
29Unwoti ɔɔgyumana bekyuli bani nse siin,
na ɔɔyila balalane udu.
30Lɛla biala lɛɛɛdubo bekyuli babuni bukpoku.
Nsu balalane ni, badubudie-ma bana kunyekɔ
na kalɔ kamɛni lɛlɔ.
31Kasusu buni na ukyuli ɔbuni uute ukyuli.
Nsu unyemi ɔnii mɔɔnyi ɔkɔ badubo-nwu bukulo budie.
32Etemila ani mebunku ukyuli na ukyuli ɔbuni ɔɔtɛmi.
Nsu etemila ani muusé lɛlɔ na balalane baatɛmi.
Currently Selected:
Agba 10: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
