Kɔnyana Buwulo 1
1
Yerusalem Uwi Ukpludi
1Aanu kalɛ na ɔma unengudi ɔmmɔ ɔ́ƒɔ lɛlɔ uwi ukpludi.
Ɔma ɔni na nka bekyuli báƒɔ-nwu kemmo pii dii,
ɔƒɛni amu ɔ́ta ɔ́bla aani ukpinele.
Nka anwu náƒɔ lɛnyi dii na kadi bekyuli akɔ.
Anwu ɔni na nka úse aani beleku ɔga na kɔlɔ kɔni na amadɔ mmɔ ƒui akɔ
ɔƒɛni amu únwini bekyuli bamba kabla ɔblane.
2Keku kani nda usien umodi.
Na imii bɔɔgbá-nwu
anumi ƒui.
Na útakɛ ukyuli ɔni na ɔsia-nwu kɔnu na nwuna bayɔne ƒui akɔ.
Mmomu bénwini-nwu bekisine ɔƒaamu.
3Kekpo kéƒie Yuda kátɔlɔku késinku kalɔ bamba,
na únwini bekyuli bamba kabla ɔblane ku lɛbibo.
Kadi bamba bekyuli akɔ na ɔkya na útakɛ kanwunakɔ kadi.
Na bekyuli bani nsia beekpóku-nwu báavi báda-nwu
na kesii kani na úmii ɔkya.
4Lilu lɛni ntɛ lísela Sion ƒui lɛtɛ kɔka ku kɔnyana
ɔsika ukyuli ɔdi ɔsɔ ulásia-ni lɛlɔ na besie batádi bana emeyi buni adi.
Nwuna ɔma unegudi lɛban kɔyakun ƒui kuse ukpludi.
Na bakpane bammɔ beewulo teedumo.
Banana bamba beebo teebeƒie-nwu badagyaa taatɔlɔku.
Na kɔnyana ku ɔdu kati kati náƒɔ ɔma ɔmmɔ.
5Nwuna bekisine nénwini ɔma ɔmmɔ lɛlɔ badine,
na bekisine bammɔ
belie-nwu ƒaa.
Ekpidi bonwu ani na ɔɔbla ɔsu
na Unwoti ɔ́ya na lɛbibo lɛmmɔ udu líbo-nwu lɛlɔ,
na ɔ́ya na bekisine béƒie nwuna bebi bátɔlɔku
na béténwini bana bekisine kalɔ bakyane.
6Kalɛ na Sion uukeye ɔ́yii udu,
na nwuna batɔnkune báta bábla
aani bakwa bani nsɔ naaakɛ́ taadi,
anwuɔsu basɔ beeebo ɔyikun
na bekeli na bagbini bammɔ kudɔ.
7Na nwuna lɛbibo ku ala
ani muukpóku-nwu
kemmo ni,
Yerusalem ɔɔkali taanu akɛla ani nése-nwu
na uwi ɔni nábavi dii kemmo,
na ɔƒɛni amu ɔkɛ kɔlɔ ƒui
lɛlɔ ɔɔví.
Uwi ɔni na úduo nwuna bekisine enu ni,
útakɛ ukyuli ɔni nebunku-nwu
na bekisine bammɔ benye baanu-nwu
na beedumi-nwu taama na nwuna ɔgbankpi ɔsu.
8Ekpidi bonwu ani na Yerusalem ɔ́bla ɔsu
bekyuli béti ɔma ɔmmɔ bénwini lɛmala.
Na bekyuli bani na nka baabu ɔma ɔmmɔ
beekisi-nwu ɔƒaamu, ɔsika údie lɛlɔ kasɔngya
na únwini anumi ku kɔƒa ku keku ku edumo.
9Nwuna ekpidi énwini ala éduo-nwu adala
na uleti kasusu lɛla lɛni ndubo-nwu bɔlɛku
na uwi ɔni ntɔ-nwu anumi adubo lɛlɔ.
Anwuɔsu Yerusalem kalɔ bubo bɔdi kɔnyana litemi bonwu,
na ukyuli ɔdi uuubo na ɔsia-nwu kɔnu uwi ɔni na ɔ́su ɔnini,
“Unwoti, nu kalɛ na mina bekisine bádi-mi lɛlɔ
na muubó abi na anu-mi kɔnyana.”
10Béyu Sion akɛla ƒui békeliku,
na unye ɔɔnu uwi ɔni na kadi bamba bekyuli
béduo nwuna kakpakɔ ina ka ɔdi ekisila bubile
ka bekyuli bani naaadi Yudaƒuɔ beduo mmɔ.
11“Budumo sɔɔn na mina bekyuli beedumo
taawia bana limeyi lɛdila.
Na beeti bana ala ani náƒɔ-ma kuye teeye,
na basɔku beye lɛla blii lɛni kani na badi belie ngba.”
Yerusalem Ɔ́tɛmiku Unwoti
Yerusalem ɔ́kpali Unwoti ɔnini,
“Buvele, nwini nu-mi na anu kalɛ na lɛ́yii udu.”
12“Amii bani mɔɔví, bɛɛɛdaku-ni?
Bɛnu si ɔdi ɔsɔ uubó bula abi amɛni udu.
Lɛbibo lɛni kemmo na Unwoti ɔ́ya na líduo
na nwuna kɔnyi kpakplaa ɔsu.
13“Áya na ogya ɔ́si katɔ úbo
na ɔɔkyula-mi teeduo-mi ekubi kemmo.
Ákywɛ-mi kakpagyuɛ, na nsɔ naaakɛ́ kavikɔ.
Na áya na ɔtɔtɔ ɔɔgyú-mi limeyi limodi
na ɔlɛ ɔni na muunú uwi biala ɔsu.
14“Ébo mina ekpidi áda-mi ɔkwɛ,
na aayu-mi unu, na mina ɔyikun ɔ́sa.
Áya na mina bekisine bákɛ ɔyikun na mina lɛlɔ,
na bákɔ-mi básɔ ɔni na bebo ɔyikun bétulo-mi.
15“Awɔ Unwoti, éni mina bekpone
na édie bekpone bamba ákya-mi
ka babayila mina bakloƒu bekpone udu.
Yuda use aani uleku
ɔni na nka bétetuku-nwu kudii,
nsu anwu nénwini ukyuli ɔni na baanya teesusu
aani kalɛ na baamana egyiibi ntu teewi ntɛ kewikɔ.
16“Ɔmɛni ɔsu kɔnyana kani na muuwulo,
na imii bɔ́ƒɔ-mi anumi uwi ƒui.
Na ukyuli ɔdi uuubo na
ɔsia-mi kɔnu
iye ɔkya-mi ogya lɛnɔ.
Kekpo kádi-mi lɛlɔ na mina bekyuli beebó abi.”
Kenye Udiene Údie Kenye Kadi
17Sion údie enu na ɔɔwia ubunkune
nsu útakɛ kɔnu ɔsiane.
Unwoti ɔ́ya na kadi bekyuli
bani náka bámana Sion
báta bénye Yakob bebi ku bawɔ ƒui lɛlɔ.
Yerusalem únwini aani lɛla lɛni muusé lɛlɔ
na nwuna liku bekyuli ƒui anumi.
Yerusalem Ɔ́tɛmiku Unwoti
18“Unwoti ablala ƒui ese siin.
Na ami mmomu, néni na neeenu-nwu litemi.
Na ɔƒaani ni, mɔɔsu-mii nnii
binwini bɛnu abi ani na muubó.
Béƒie-mi bakloƒu ku begblebi ƒui bátɔlɔku bésienku kaƒɔ.
19“Lɛ́lɔ mina bebunkune bakpana
nsu bákya-mi kakya.
Mina bakpane ku kadi batɔnkune
békpi uwi ɔni na bakya baawia adila ani na badi.
20“Unwoti, elenwini alanu kalɛ na lɛla lɛmɛni liikpóku-mi?
Kaƒɔ kébo-mi likpo na kayi kaakpulu-bu,
ɔsika lɛ́lɛ-ɔ kama na ńtenu ƒula litemi.
Bádu bekyuli na lɛblɔnu lɛlɔ ku kɔduli kemmo lɛnɔ ƒui.
21“Ukyuli biala únu kalɛ na muudumo,
nsu ukyuli biala uuubo na ɔsia-mi kɔnu.
Na mina bekisine lɛnɔ bánu
lɛbibo lɛni kemmo na éti-mi ákya báti.
Na ɔmɛni ɔ́ya na baakɛ́ ebiti na mina lɛlɔ geen.
Buvele, babla na ebo abáni-ma kɔtu
na kenye kani na ése-mi ése kenye.
22“Taya na bana ekpidi ani baabla avi-ɔ anumi.
Mmomu ni-ma kɔtu
kpakplaa geen
aani kalɛ kani na áni
ami lɛnɔ kɔtu
na mina ekpidi ɔsu.
Lɛ́yila lɛnunsia biala, na naaada budumo taaya lɛnɔ.”
Currently Selected:
Kɔnyana Buwulo 1: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
