Yeremia 52

Bádi Yerusalem Lɛlɔ

1Na Sedekia ɔ́kɛ akwa aavlanyɔ-unwi asa na ɔ́di lɛga na Yuda. Na ɔ́di lɛga lɛmmɔ na Yerusalem akwa leevu-unwi. Na uni ndi Yeremia ɔni nási Libna ubidi ulekubi ɔni baalɔ banii Hamutal. 2Na Ɔga Sedekia ɔ́bla likpidi na Unwoti anumi aani kalɛ na Ɔga Yehoiakim ɔ́bla kalɛ. 3Na Unwoti úti kɔnyi ɔ́kya Yerusalemƒuɔ ku Yudaƒuɔ kaduɛ na ɔ́ya na ala amɛni ƒui álɛ lɛni. Na kawɔlɔkɔ ni, ɔ́bɔku-ma údie nwuna anumi. Na ɔƒɛni ni, Sedekia ɔ́ta únye Babilonƒuɔ ɔga lɛlɔ.

4Amu na lɛkwa yaalenwidi kɔbuli leevudi kuna limeyi leevudi ka Sedekia ɔɔdi lɛga ni, Babilon Ɔga Nebukadnesar ɔ́tɔnku nwuna bekpone ƒui ka betékpo Yerusalem. Bekpone bammɔ bábla kakyakɔ na kesii kadi asa na adubuduo ɔma unengudi ɔmmɔ kemmo. Na bábla bekpone kunyekɔ bámana awodu ammɔ ƒui. 5Báka ɔma unengudi ɔmmɔ bákya útédu lɛkwa leevu-unwidi ka Sedekia ɔɔdi lɛga na Yerusalem. 6Na kɔbuli kunedi limeyi yaalenwi kemmo ni, uwi ɔmmɔ na kɔka kɔmmɔ kenye kébo kaayu ɔkplu geen ute bekyuli bammɔ kalɛ bakɛ lɛla lɛdi muedi badi. 7Ɔmmɔ ɔsu bekpone bammɔ báƒɛ awodu ammɔ na bana ƒui báwia kasiakɔ na békeli bátɔlɔ usien ɔmmɔ. Na ina ka Babilonƒuɔ báka bámana ɔma ɔmmɔ ni, bakɛ bagadine ɔƒɛƒɛɛ kaƒɔkɔ na bátásia kayakun kani na awodu anyɔ ammɔ ása na bakɛ mmɔ báda bálɛ Yordan Ketu kɔwɛ kemmo. 8Nsu Babilonƒuɔ bekpone básia-ma kama na bétéƒie-ma na Yeriko na béƒie Sedekia na nwuna bekpone ama békeli bégyingya amadɔ mmɔ bene bátɔlɔ.

9Béti Sedekia bésienku ɔma ɔni baalɔ banii Ribla na Hamat kalɔ lɛlɔ kesii kani na Nebukadnesar ɔ́tɛku-nwu litemi na ɔ́du-nwu kɔtɔ. 10Na Ribla mmɔ ni, bádu Sedekia bebi bananabi ku nwuna benengu uwi ɔni na anwu ɔlati unye ɔɔnu. 11Na bátu-nwu anumi bédie evuo kemmo na bákya-nwu ɔbuli báni-nwu bésienku Babilon bátákya-nwu ɔtɔ útédu uwi ɔni na úkpi.

12Na lɛkwa leevu-yaalenwi na kɔbuli kɔlɔndi na limeyi leevudi na Babilonƒuɔ Ɔga Nebukadnesar lɛga bɔdi kemmo ni, Nebusaradan ɔni ndi Ɔga Nebukadnesar kasusu ɔkyane ku bekpone ɔtɔnkune útéduo Yerusalem. 13Unengu ɔmɛni ɔ́kyula Katɔti kakpakɔ kammɔ na ɔ́kyula ɔga kesii ku lɛtɔ linengudi lɛni náƒɔ lɛnyi mmɔ ƒui ku bekyuli kɔduli lɛnɔ. 14Na Nebusaradan ɔmɛni ɔ́kpanku Babilonƒuɔ bekpone ƒui na bátáƒɛ Yerusalem awodu ɔba. 15Ɔmmɔ kama bekpone unengu ɔmɛni úti bekyuli bani nébu na ɔma ɔmmɔ kemmo ku bakladi bani ngyi enu kabla kɔkwɛ ku bani na bátuna ka babla Babilonƒuɔ Ɔga kabla ɔ́tɔlɔku úsienku Babilon. 16Na bawabane bani na ayaki ada geen kani na bébu bákya na bataanu egyiibi mmo ku mmo geen bɔmmɔ lɛlɔ.

17Na Babilonƒuɔ bábwɛ bédie abuala egyiedi ani na bátɛ na kakpakɔ mmɔ ku ala kasiakɔ ku abuala egyiedi ntu kewikɔ kani bátu bálɛ kakpakɔ mmɔ. Na bábuma abuala egyiedi ani ƒui nse kakpakɔ mmɔ bésienku Babilon. 18Na béti ebui ku lɛsoƒi ku lɛsogya kɔbuli linyenela ku akyami ku abualagyie ala ani ƒui lɛlɔ kabla na baabla ka kakpakɔ mmɔ bátɔlɔku. 19Bekpone unengu bagadine ɔgyumanane ɔmmɔ úti oloƒui ebui ammɔ ku ntu akyami gbion ani na bábla ku sika ugyiedi ku ɔƒualadi ƒui ɔ́tɔlɔku.

20Bekpone bammɔ béti lɛla biala na béti abuala egyiedi bábla na ese kakpakɔ mmɔ ku abuala egyiedi ammɔ lɛta inyɔ bɔdi nlɛ ɔtɔ ɔmmɔ anumi mmɔ lɛnɔ ku lɛkyami bonwu lɛni baalɔ ɛpu na bábla-ni básia ɔmantɛ bakɔ udu leevu-inyɔ badi lɛlɔ. Na ala amɛni ƒui enye lɛgba lɛni náya na bakana ala ammɔ ƒui bɔni busienku kesii bamba lɛlɔ. Bekpone bamɛni bébo ala amɛni ƒui bábwɛ kpɛtɛ kpɛtɛ kalɛ na bakana-nya buti bɔtɔlɔku busienku Babilon. Na abuala ammɔ emomo ɔni na balakana-nya unu bɔti. 21Na adi biala bɔkuku bɔdi lɛgba bɔka aavlanyɔ-maatɛ. Na nina bɔka bɔmana bɔdi lɛgba yaalenwi. Ubu ɔ́tɛ-ni kemmo ɔ́lɛ, nsu nina litigbli ɔdubɔbla aani animi kukolo ɛtɛ. 22Na béti abuala egyiedi bewi-nwu eli. Na nwuna bɔkuku bɔdi lɛgba bɔka ine ku kakɛ. Na béti abuala egyiedi báka bámana ɔdi biala. Na béti bábla anwula bámana ɔdi biala lɛlɔ. 23Na egyiibi amɛni bumomo bɔbla aani eti anyɔ ani na béle básia abuala kadii kammɔ lɛlɔ likeke na liti ku aavlene-yaalenwi kani na aanu nwaa.

24Ɔni mbuku ni, bekpone unengu ɔmmɔ úƒie ɔkpane unengu Seraia ku nwuna ɔmansiane Seƒania ku kakpakɔ kabla bablane bani náƒɔ lɛnyii ɔ́tɔlɔku. 25Na ɔma ɔmmɔ kemmo ni, úti ukpone ɔni mɔɔnu bekpone lɛlɔ ku ɔga ɔmmɔ kasusu bakyane maatɛ ku bekpone unengu ɔmansiane ɔni mɔɔnu bekpone kɔkunkɛ lɛlɔ ku bekyuli bani baƒɔ lɛnyii nkyuli liti ku leevu lɛnɔ ɔ́tɔlɔku. 26-27Na bekpone unengu Nebusaradan úti bekyuli bammɔ úsienku Babilonƒuɔ ɔga na Ribla.

Yudaƒuɔ Bénwini Bekyuli Beƒiedi

28-30Na bekyuli bani na Nebukadnesar úƒie ɔ́tɔlɔku úsienku Babilon bumomo na bɔdi mɛni. Na nwuna lɛga bɔdi lɛkwa maatɛdi kemmo ni, úƒie nkyuli 3,023. Na lɛkwa leevu-maanedi kemmo ni, úƒie nkyuli 832 ɔ́siku Yerusalem. Na lɛkwa aavlanyɔ-lɛtɛdi kemmo ni, úƒie nkyuli 745. Anwuɔsu bekyuli bani ƒui na Nebukadnesar úƒie ɔ́tɔlɔku Yuda kalɔ lɛlɔ úsienku Babilon bumomo ƒui bɔdubɔbla nkyuli 4,600.

31Na lɛkwa lɛni na Ewil-Merodak ɔ́bla Babilonƒuɔ ɔga ni, údie kɔnyana bɔnu ɔ́tina Yudaƒuɔ Ɔga Yekonia. Na ɔ́da-nwu údie aban ɔtɔ ɔni ɔtɛ kemmo. Ɔmɛni ɔ́lɛ na lɛkwa avlaatɛ-maatɛdi kɔbuli leevu-kunyɔdi limeyi aavlanyɔ-lɛlɔndi kama uwi ɔni béti Ɔga Yekonia bátákya ɔtɔ. 32Ewil-Merodak ɔ́nu ɔga ɔmmɔ kɔnyana na úte-nwu kenyekɔ kani nákɔ na kebo ɔbu ketulo baga bakladi bani béƒie bátakya Babilon mmɔ kadi. 33Anwuɔsu béte Yekonia kuƒi ka ɔ́vumana nwuna batɔntɛne adala. Na utaadiku Babilonƒuɔ ɔga ɔmmɔ na kadikɔ kenwi utédu uwi ɔni ukpi. 34Na limeyi ndi limeyi ni, beete Ɔga Yekonia egulabi adi na uuti teeye ala ani na ɔɔwia. Na bábla ɔmɛni na nwuna ngba bulie kemmo ƒui.

Currently Selected:

Yeremia 52: lef

Highlight

Copy

Compare