Yeremia 48
48
Unwoti Ɔ́su Lɛla Lɛdi Ɔ́siku Moabƒuɔ Lɛlɔ
1Unwoti Ɔyikune Ƒui, Israel Katɔti, ɔ́su-mi ɔnii nsu Moab kadi bekyuli ɔnini,
“Nebo ɔma ɔdi ɔ́sa. Na badubo Kiriataim buƒie bɔƒɔ na bakya-nwu kɔƒa. Na nwuna awodu bonwu ani mɔɔgyumana ɔma ɔmmɔ muedi adubo bɔbwɛ. 2Ukyuli ɔdi ɔ́sɔ ulabu awɔ Moab lɛnɔ. Na bekisine benye baabla kakwɛ na Hesbon ɔma kemmo kalɛ na babla na bada-a ngba liku. Mina kewii kabla kadubo bɔya na basia ƒula ɔma lɛnyi banii ‘Bɔba Diin.’ 3Horonaim kadi bekyuli badubo butaava ku keku ka bebebunku-ma uwi ɔnii na beekpóku ɔma ɔmmɔ na bakyula-nwu. 4Badubo Moab butu bugyingya! Na ƒula bebi badubo buteewulo. 5Na badubo buteewulo si bakɛ ulu bákɔ bésela Lihuti. Na bataatɛmi taasiku ɔgbankpi ɔni nálɛku-ma lɛlɔ si báyu bésela Horonaim. 6Bikeli bɛlɛ na bɛƒɔ bina lili ngba! Na biti bina anumi bɛtina ketele kalɔ kakwiidi kammɔ kemmo aani alakpi akɔ ebuo ala utine. 7Bɛ́bu bɛnii bina lɛkɛ ku ɔyikun ɔni na bibo ɔdubɔkana na ɔƒɔ-mii ngba, nsu badubo-mii buƒie ƒui ku bina Kemos baƒiɔ bammɔ ku bana bakpane ku nwuna benengu bammɔ ƒui.
8“Bina ɔma ɔdi biala ɔɔɔdubo bubu na balabwɛ-nwu. Ɔsika lɛ́su bina bekisine nnini, ‘Bɛkpala Moab Kɔwɛ kɔmmɔ kemmo ku kalɔ ƒiaa kammɔ ƒui bekyuli bidie-ka lɛlɔ.’ 9Na bɛgyingya mma biwi kalɔ kammɔ ƒui lɛla na edula ammɔ ƒui ekpi. Na bɛbwɛ lɛma lɛmmɔ ƒui biwi kakɔ kpɛtɛ kpɛtɛ na ɔdi ɔsɔ utebu utelie mmɔ.
10“Mɔɔwia ka bɛdu Moabƒuɔ ƒui. Na si bɛ́ya na bana ɔdi úkeli ni, ndubo-mii buwida.
11“Moab lɛni bise aani ntɛ bɔni na báda bése na búlie kalɔ, ɔsika belewilimi-mu taasia kama, anwuɔsu na bina ablala aakɔ́-mi katɔ uwi ndi uwi. 12Nsu ɔƒaani ni, ndubuti bekisine limene-mii na bewilimi ntɛ bɔɔmɔ na babwɛ kutubui kɔmmɔ! 13Mmɔ na kɔƒa kɔdubo-mii bukpo, ɔsika bina Kemos baƒiɔ baaadu-mii bɔkana bɔƒɔ aani kalɛ na Betel útakana na ɔƒɔ Israelƒuɔ.
14“Bɛɛsu ka bina bekpone bebo ɔkplu na bebo kayi lɛnɔ. 15Nsu ami ndi Unwoti Ɔga Ɔyikune Ƒui na muusé kenye ka bina bekisine badubo-mii lɛlɔ bɔdi. Na bina bekpone bani ndia ntulo ƒui badubukpi na kekpokɔ. 16Uwi ɔsɔ uletu asa na ɔgbankpi ɔdubɔlɛku Moab! 17Ndubo lɛdi budie bute kɔlɔ kɔni na amadɔ na bewulo-mii kɔnyana basu banini, ‘Ɔɔɔdi kɔnyana litemi na lɛdi mɛni ka Moab ɔni na nka ɔ́di bekyuli bamba lɛlɔ ni, nsu ɔƒɛni amu nwuna ɔyikun ɔni muukeye mmɔ ƒui ɔ́yii udu.’
18“Amii bekyuli bani nkya Moab ɔma unengudi ɔni baalɔ Dibon, bekyuli basɔ baaadubo-mii bɔbu. Anwuɔsu bɛɛnu bina liboku na lɛti akɔ mmɔ. Bina bekisine badubo bina awodu bubo bɔƒɛ si uwi ɔni na beekpóku-mii. 19Na amii Aroer ɔma bekyuli bisie na biténye ulu kɔtu na biye baƒɔ bekeline si uwi ɔni na baaví bɛnini, ‘Bi nálɛku-mii asa na bɛkɛ ku usi lɛni?’
20“Na badubudie kenye banini, ‘Moab lɛlɔ na bekisine bádi! Anwuɔsu biteewuloku-bu bula kɔƒa keku. Na bɛsu bekyuli bani ƒui na bakya Arnon Ketu ka bákyula Moab na ɔ́yii udu.’ 21Ɔma biala na ɔdi Moab ɔma ni, ndubo-nwu kɔtu bɔni. Nsu bani ɔdi utulo ƒui ndi Holon ku Yasa ku Meƒat ku 22Dibon ku Nebo ku Bet-Diblataim, 23ku Kiriataim ku Bet Gamul ku Bet-Meon. Kiriataim ku Bet-Gamul, ku Bet-Meon 24ku Keriot ku Bosra. 25Lɛla lɛni na ami lɛ́lɛ ugyii kani ndubɔbla likplodi ƒui. Na ani ndi ka badubo bina bekpone lɛlɔ bɔdi. Na bábwɛ-mii ɔyikun na bɛyii udu ƒui. 26Moab kadi bekyuli, bɛɛsu taatina ka bibo ɔyikun bitulo-mi. Nsu ɔƒɛni ni, ndubo kadi bamba bekyuli bɔsu na bete-mii ntɛ na bɛni bikpi. Na bataama-mi si uwi ɔni na ntɛ bɔmmɔ bútulo-mii na biibuli taatɛ amii alati bina kɔdala kemmo. 27Lɛni na bɛ́kya mina bekyuli lɛlɔ lɛma na bɛɛbla-ma aani bakantankpine bani na béƒie na bana likyulikpi lɛdi bɔbla kemmo. 28Ɔƒaani ni, bɛdubo bina lɛma bɔda buwi na bitábla kɔkyakɔ na atakpɛ lɛkɔkɔ ku kɔka kemmo na bitélie mmɔ aani babloduma.
29“Ngyi kalɛ na bɛɛtalaku lɛlɔ katɔ na bígyingya enu bɛɛkun lɛmɛnɛ taavi. 30Nsu ami lɛnɔ ngyi ka kɔnu kayi butu taakun lɛmɛnɛ likpludi ulaƒɔ-mii. 31Anwuɔsu ndubo keku ku kɔnyana buwulo bute Moab ku nwuna Kir-Heres ɔma. 32Amii Sibma kadi bekyuli, bíse aani adingyii mmo bɔni egyiibi nánwu kpasa kpasa. Na adingyii ammɔ édie kɔgba gyɔlɔɔ gyɔlɔɔ ésie kalɔ kammɔ katɔ kakɛ kútédu Yasar. Na kúsie ɔƒɛ kanukɔ lɛnɔ kútédu Ɛpugyie ɔmmɔ. Nsu ɔƒaamu báyila-mii udu, anwuɔsu ndubo-mii buwulo aani kalɛ na Yasar kadi bekyuli béwulo bana adingyii mmo. 33Edula bɔƒɛ taasiku mmo emeyi bɔdi bɔ́sa na Moab kalɔ lɛlɔ ɔƒaamu na lɛlɔyɔ kɔku bɔbla na ntɛ kediekɔ lɛnɔ kenye kékulo.
34“Na beenú Hesbon keku buwulo na ɔgyu kakaaka útédu Eleale ku Yahas. Na kɔvanu kɔɔsí Soar ɔma kemmo na beenú na Horonaim ku Eglat-Selesia. Na Nimrim Ketu muedi kákwii. 35Na ukyuli biala ɔni mɔɔkyula oloƒui teete Moab baƒiɔ badi iye uti akpala adi úsie utákpa na nwuna ɔƒiɔtɔ ɔdi ni, ndubo-nwu udu bɔyila. Ami Unwoti násu.
36“Muunú ɔlɛ geen teete Moabƒuɔ na mina kayi kemmo aani kalɛ na ɔɔbla ukyuli si beedie ɔkwanu na lɛtoloyii lɛlɔ. Na muuwulo Kir-Heres kɔnyana, ɔsika nwuna lɛkɔ ƒui lɛ́yii udu. 37Moabƒuɔ benye asa katɔ ku lilu lɛlɔ beewulo kɔnyana. Na banana békpeyi bana likwi na bekyuli békpeyi bana eli na békulo lɛlɔ ekpo muedi na bada adala ani mɔɔtina ka beewulo kɔnyana. 38Na ɔmɛni ƒui ɔ́si ɔni na ami Unwoti líbo Moab lɛ́bwɛ aani libui lɛni na ukyuli ɔ́sɔ uláwia iye bekyuli baláka-ni. 39Aanu Moab nábwɛ uwi kalɔ! Na nwuna bekyuli keku kada ɔni na básɔ beenwíni ku kɔƒa. Liƒu bonwu líƒie bekyuli ka bánu ɔmɛni, nsu ina amu benye baamá-ma.
40“Moab, aanu ka ukisine ɔdi úveyi ɔɔví kayaa na ɔ́tu ɔdubo aani kɔdigbo aasɛ na úgyingya avwi úbi ƒula kalɔ kammɔ lɛlɔ. 41Badubo ƒula ɔma ku awodu ani mɔɔgyumana-a buƒie bɔƒɔ na ƒula kudɔ na liƒu liƒie ƒula bekpone. 42Amii ɔdi ɔ́sa aani kadi bekyuli kalɛ, ɔsika bɛ́wia bɛnii bɛɛta binye bɛsiaku-mi ami Unwoti. 43Agyala ku libu bonwu ku kɔkpagyuɛ kunye kɔgya-mii na bina kasiakɔ.
44“Si liƒu lɛ́da-mii na bɛnii biikeli, bɛdubɔnu biduo ubu. Na si bɛ́kpɛ buɛɛ buɛɛ bɛnii bɛɛlɛ́ ubu ɔmmɔ kemmo lɛnɔ ni, kɔkpagyuɛ kɔdubo-mii budie. Uwi ɔmmɔ nédu ka bani-mii kɔtu.
45“Na Hesbon ɔma unengudi ɔmmɔ kɔmadɔ kesii kani na Sihon ɔ́di lɛlɔ dii ni, baƒɔ bekeline bani na lɛlɔ lítu-ma benye kasuudikɔ kesii kani na ogya ɔni mɔɔkyula bana ɔma unengudi ɔmmɔ bukeye bɔ́kya ɔyuli. Na uwi uletu asa na bekyuli bani nli abi bamba eli na badi bekpone mmɔ lɛnɔ lɛma lɛdubuse kalɔ ku bɔkywi.
46“Moab kadi bekyuli, bɛ́siaku bina Kemos baƒiɔ. Nsu ɔƒaani ni, bɛ́wɔlɔ, amii ɔdi ɔ́sa na bina bebi bénwini bekyuli beƒiedi na kadi bamba bekyuli kɔlɔ kemmo.
47“Nsu limeyi lɛdi ni, ndubɔsɔku ƒula bekyuli liboku ɔma. Ami Unwoti násu.”
Currently Selected:
Yeremia 48: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
