Yeremia 49
49
Unwoti Ɔ́su Lɛla Lɛdi Ɔ́siku Amon Lɛlɔ
1Unwoti ɔ́su ɔ́siku Amon lɛlɔ ɔnini, “Israel kadi bekyuli bebo bebi ku bawɔ bani nádi nwuna kalɔ. Na bi ɔsu na amii bani mɔɔkpá Molek baƒiɔ néti Gad kɔdua lɛma ku kɔlɔ kɔmmɔ bínwini amii kɔdi? 2Ndubo bekpone badi buti bumene-mii limeyi lɛdi na bebekpo-mii na bina ɔma unengudi ɔni ndi Raba na babwɛ-nwu ƒui kede kede. Na badubo lɛma lɛkladi lɛni na amadɔ bɔkyula bunwini ntɔ. Bɛ́ƒɔ Israelƒuɔ kalɔ kadi, nsu limeyi lɛmmɔ lɛlɔ ni, Israel ɔdubɔƒɔ awɔ kadi!
3“Amii Hesbon bekyuli, biteewulo! Bina ɔma ɔdubunwini kebu alakpi, ɔsika bábwɛ Ai na ɔ́yii udu. Bɛdubo buteekeli taaka taamana bɛnii bɛɛwia katamikukɔ, nsu ala adubo-mii bɔbala na lɛƒɛnyi ƒui lɛlɔ. Bɛdubo bunwini, ɔsika bina kɔsiakɔ ƒui kɔdubo buti na bilákɛ kasiakɔ kadi. Na amii Rabaƒuɔ, biti kɔnyana ala bɛda na biteewulo kɔnyana, ɔsika badubo bina baƒiɔ Milkom bani na bɛɛkpá buti bɔtɔlɔku busienku ɔlɔgyu kakaaka na kaƒɔ. Na betiku bina bakpane ku bina benengu bammɔ ƒui. 4Amii batuɔkplune Amonƒuɔ bani mɔɔta teenye-mi lɛlɔ. Bina lɛkɛ lɛlɔ kani na bɛsia anu na biiye bɛnini, ‘Ɔma ndubo bɔkana na ukpoku-bu?’ Nsu ami mɔɔlɛ-mii kpakplaa nnii bɛda lɛlɔ katɔ bɔtalaku bɛya. Ɔsika uwi ɔni na bina ɔyikun ɔdubuse kalɔ uteebo kalɔ ni, 5ami, Unwoti Ɔyikune Ƒui, ndubɔya na kadi bekyuli bani na bina adɔ badububo na bebekpo-mii geen ku ogya na ɔɔɔdubo-mii buse buɛɛ. Mmomu badubo-mii bugyingya kalɛ kalɛ na bɛɛɛdubo ukyuli ɔdi bɔkɛ na ɔnu-mii lɛlɔ iye ubunku bina baƒɔ bekeline.
6“Nsu limeyi lɛdi ni, ndubɔsɔku-mii liboku bina ɔma. Ami Unwoti násu.”
Unwoti Ɔ́su Lɛla Lɛdi Ɔ́siku Edomƒuɔ Lɛlɔ
7-8Unwoti Ɔyikune Ƒui ɔ́su ɔ́siku Edomƒuɔ lɛlɔ ɔnini, “Lɛnunda ku kasusu kása na Teman ɔma kemmo. Na ndubo bɔya na ɔgbankpi ubo-mii lɛlɔ liti lɛni amii Esau bebi ku bawɔ kɔtu. Anwuɔsu ɔdi biala nási Dedan ɔma ɔsɔ unwini na ukeli ɔtɔlɔ uteesie ɔma mmomu. 9Si beyune bábwɛ béduo kaduli kadi usien ni, lɛla lɛni na baawia kani na beeti. Na si bekyuli béde egyiibi adi ni, ana ƒui alasa bɔla na egyii kalɔ. 10Nsu ami ndubo lɛla biala na lɛdi Edomƒuɔ lɛdi bɔda buti na libimi-mii ala na kesi kesii na bɛdubɔkali bɛnii bɛɛbɛ́ bɛkya. Na bɛdubo bukpi ƒui ku bina lɛlɔ bekyuli ku badukɛne ƒui. 11Nsu bɛƒɔ-mi bɛdi ka ndubɔnu bina bekpinebi ku bekpinele ƒui lɛlɔ.
12“Na kadi bani bekyuli na útalɛka nka bani-ma kɔtu muedi ni, badubo mina kɔnyi bɔni aani kalɛ na baaní lɛla lɛdi na ɔɔƒɛɛ kemmo na bebo abi. Anwuɔsu bina ɔdi ulakana bulekeli. 13Ami Unwoti nnye mina lɛnyi kenye muusé kenye ka bina ɔma unengudi ɔni baalɔ Bosra ku bina lɛma lɛkladi ƒui badubo ɔgbankpi kpakplaa ɔmɛni kemmo buduo, na badubo lɛma lɛmmɔ ƒui bɔbwɛ búwi kalɔ kpɛtɛ kpɛtɛ. Na badubuti-mii lɛnyi muedi bewida bekyuli banii ɔdubɔlɛku-ma aani bina kalɛ kani. 14Lɛ́ɛtala ɔtu ɔdi nnii ute kadi bekyuli bammɔ bɔti na baklibi lɛlɔ na bebekpo amii Edomƒuɔ.
15“Ndubo-mii bɔbla na bɛsɔ na kadi ƒui akɔ na balabu-mii balakya lɛla lɛdi akɔ. 16Bina lɛlɔ katɔ bɔtalaku mɔɔtɔ́lɔ-mii bɔnii kadi bekyuli bamba ƒui baanu-mii ku bɔyia. Bilie atakpɛ ku abi eli aani kɔdigbo baasɛ kalɛ, nsu ami Unwoti ndubo-mii kalɔ buboku ƒui. 17Ndubɔya na Edom únwini aani kebu alakpi ku liƒu lɛla na ɔbla bekyuli bammɔ kalɛ kadi na ukyuli biala ɔni násia mmɔ ɔɔví ɔpii-mii na udumi-mii lɛnɔ na bina ɔgbankpi ɔsu. 18Lɛ́kyula Sodom ku Gomora ku lɛma lɛni na lide-ma ƒui. Na lɛni kani na ndubo Babilon lɛnɔ bɔkyula kede kede. Na ukyuli biala ɔdi ɔsɔ ɔɔɔdubo mmɔ bulie.
19“Ndubo awɔ Edom bukpoku aani kalɛ na gyata ɔɔsí lɛku kemmo teebekpoku baƒonu bani nnye kadikɔ na Yordan kɔtu. Na ulaƒɔ uwi ɔdi asa na baƒonu bammɔ beekeli taatɔlɔ na bada kalɔ kammɔ bese ukpludi. Ɔma na ndubo bɔƒuna na ukpoku-ɔ? Ami ɔlati ndubo-ɔ bukpoku! Ɔsika ɔdi ulakana-mi bunye bɔsiaku na kekpokɔ iye ɔbɔku-mi na likeli lɛtɔlɔ.
20“Bise atu na binu lɛla lɛni na lɛ́ɛlɛ ugyii líse na amii Edom bekyuli lɛlɔ. Badubo bina bebi ɔbuli bɔkya bɔni bɔtɔlɔku na babwɛ bina kalɔ kemodi kammɔ ƒui. 21Na ala ani na badubo bubile mmɔ kɔku kɔdubusie kutédu Ɛpugyie kɔtu ƒui. Na kɔku kɔmmɔ kɔdubɔya na kalɔ kammɔ kakunku. 22Ukisine ɔdi ɔdubɔtu ɔsi kayaa ubebi-mii lɛlɔ na ukpoku-mii aani kɔdigbo aasɛ na ɔdubugyingya nwuna avwi ubi Bosra ɔma na utaaka taamana-nwu. Na liƒu bonwu lɛdubuƒie ƒula bekpone ƒui.”
Unwoti Ɔ́su Lɛla Lɛdi Ɔ́siku Damasko Lɛlɔ
23Unwoti ɔ́su ɔ́siku Damasko lɛlɔ ɔnini, “Hama ku Aprad lɛma linengudi lɛmmɔ línu ƒula kenye kekpidi kani nébo-ɔ mmɔ na báyila bana lɛnunsia ƒui na lɛƒɛda lɛ́ƒɔ-ma lɛlɔ kemmo ƒui aani kalɛ na ɛpu avlɔvɔ eebi lɛla lɛdi lɛlɔ ƒui. 24Ɔtɔtɔ ɔ́gyu amii Damaskoƒuɔ na bínwini ku liƒu bíkeli bɛɛtɔlɔ. Na bɔyia ku ɔlɛ bunu sɔɔn kemmo. 25Uwi ɔdi návi kemmo ni, na nka lɛlɔ lɛ́yɔ-mi na bina ɔma unengudi ɔni náƒɔ lɛnyi mmɔ lɛlɔ. Nsu ɔƒɛni amu ni, mɔɔlɛ-mii kpakplaa nnii bikeli uwi ɔni na bɛmu bibo kuƒi kɔdi mɛni! 26Ɔsika uwi ɔsɔ uletu asa na bina bekpone babuni ƒui muedi badubɔdu-ma bewi lɛblɔnu lɛmmɔ lɛlɔ. Ami Unwoti Ɔyikune Ƒui násu kenye kamɛni. 27Ndubo ogya bɔtu bɔkya bina awodu na lɛkyula bina kɔgyumanakɔ kpakplaa kɔni na Ɔga Benhadad ɔ́tu mmɔ.”
Nebukadnesar Ku Ketele Kalɔ Kakwiidi Bekyuli Lɛlɔ Kɔtɛ
28Binu lɛla lɛni na Unwoti ɔ́su ɔ́siku Kedar kɔdua bekyuli ku akpaklɔ lɛma lɛni na ketele kalɔ kakwiidi kammɔ lɛlɔ na Babilon kalɔ lɛlɔ. “Amii Kedarƒuɔ, ku adua bamba ani na akya kalɔ kakwiidi kani néti kése ɔƒɛ katukɔ mmɔ binu. Lɛ́ɛsu Nebukadnesar nnii ukpoku-mii na ɔyila-mii udu ƒui. 29Nwuna bekpone bani lɛlɔ mbo liƒu geen mmɔ badubo-mii bɔka bɔkya. Na badubo bina adi nvo ku bina ala ƒui buƒie bɔƒɔ ku bina baƒonu ka bebuo ala betine bani mbo keƒu mmɔ. 30Amii kalɔ kakwiidi akpaklɔ lɛma kemmo bekyuli ƒui, bikeli bitábɛ! Nebukadnesar ɔdanku kasusu bonwu kadi udu na bina lɛlɔ. 31Biiibo awodu ani mɔɔgyumana-mii na biiibo badukɛne bebunkune badi lɛnɔ. Nsu use-mii aani bibo bɔƒɔ bɔdi, anwuɔsu lɛ́su-nwu nnii ukpo-mii. 32Na mmɔ na bɛdubɔyila bina bebuo ala betine ku bebuo bamba pii badubo-mii enu bɔlɛ na lɛla lɛdi lɛsɔ lilabla bina ɔdi. Amii bani na Arabia kalɔ kakwiidi kemmo mmɔ ƒui ɔgbankpi ɔdubo-mii lɛlɔ ɔ́si lɛƒɛnyi ƒui lɛlɔ, na badubo-mii bugyingya bɔkya kalɔ kammɔ ƒui lɛlɔ. 33Na kesii kani na bina akpaklɔ ammɔ ákya ƒui adubunwini beƒukutu keliekɔ. Ami Unwoti násu.”
34-35Ka Ɔga Sedekia úbelie liboku lɛlɔ aani Yudaƒuɔ ɔga ni, uwi útetu ɔdi asa na Unwoti ɔ́su-mi kenye kadi ɔnii nsu Elamƒuɔ ɔnini, “Elam kadi bekyuli, ami Unwoti Ɔyikune Ƒui ndubo ƒula kɔtaminta bebone bani ɔsu na ƒula bekpone bebo ɔyikun mmɔ bɔdu. 36Na bekisine badubo-ɔ bukpoku bɔsiku lɛƒɛnyi ƒui lɛlɔ na kekpo keƒie-ɔ na bakpanku ƒula bekyuli batakya kalɔ kadi ƒui bekyuli akɔ. 37Na bekpone bammɔ badubo-mii bususu na badu-mii ƒui. Na bɛdubɔsiaku ɔgbankpi ɔni na mina kɔnyi kɔdanku ƒui. 38Na ƒula ɔga ku nwuna benengu ƒui badubo bukpi. Na lilie ntaadi lɛlɔ na bana kenye. Ami Unwoti násu.
39“Nsu líse kenye ka limeyi lɛdi ni, ndubo-mii bɔsɔku buboku bina ɔma.”
Currently Selected:
Yeremia 49: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
