Yeremia 36
36
Ɔga Yehoiakim Ɔ́kyula Yeremia Ɔku Kakunkɛ Kedeedi
1Lɛkwa linedi kemmo ka Yosia ubidi Yehoiakim ɔɔdi lɛga na Yuda ni, Unwoti ɔ́su-mi ɔnini, “Yeremia, 2uwi ɔni na Yosia ɔɔdi lɛga ƒui na líse kalɔ mɔɔsu-ɔ ala taasiku Israel ku Yuda ku kadi bamba bekyuli lɛlɔ. Ɔƒaani ni, wia ɔku kakunkɛ na enweni ala ani ƒui na lɛ́su-ɔ ese. 3Na aka ala ammɔ ƒui atina Yudaƒuɔ. Ɔƒɛni kalɛ si bénu ɔgbankpi ɔni na lɛ́su ka ɔdubɔlɛku-ma si betenwini kayi ni, ɔdubɔya na bada alaekpidi bɔbla baya na si bénwini bébo-mi kudɔ ni, ndubuti lɛkyiɛ-ma.”
4Amu na lɛ́ya na bátálɔ Neria ubidi Baruk béte-mi na lívele-nwu nnii ubunku-mi na bunweni ala ammɔ ƒui buse. Anwuɔsu lɛ́sɔku ala ani na Unwoti ɔ́su-mi ƒui lɛ́ka na Baruk únweni-nya ƒui ɔ́sia ɔku kakunkɛ lɛlɔ úse. 5Mmɔ na lɛ́lɔ-nwu nnini, “Baruk, benengu bammɔ béni banii nteduo Unwoti kakpakɔ mmɔ. 6Anwuɔsu awɔ mmomu teesie. Nsu ya na udu limeyi bamba lɛni lɛlɔ na Yudaƒuɔ beesié taatákpali katɔ na beenyimi kenye. Na eti ɔku kakunkɛ kamɛni na esie atáka ala amɛni ƒui momoomo na ɔdi biala unu. 7Ɔƒɛni kalɛ si bénu lɛla lɛni na Unwoti ɔ́su ka wabla-ma na bana ekpidi ɔsu ni, badubo bunwini na bevele Unwoti banii uti bana bɔƒiɔ ɔkyiɛ-ma, ɔsika úti kɔnyi geen.”
8-10Na Ɔga Yehoiakim lɛga bɔdi lɛkwa lɛlɔndi kemmo na kɔbuli yaalenwidi kɔni baalɔ Kislev na Hebriƒuɔ abuli bɔka kenye ni, Yudaƒuɔ batɔnkune bása na bálɛ limeyi lɛdi ugyii bése ka bekyuli bani ƒui nkya Yerusalem ku bani na ɔgbami na bávi bébo mmɔ ƒui ɔlɛka benyimi kenye na bakpali Katɔti. Anwuɔsu Baruk úti ɔku kakunkɛ kammɔ na úsie kakpakɔ kaduli kemmo mmɔ kesii kani baalɔ banii Ɔban Kayakun Kawɔdi kenye na úténye mmɔ ɔ́ka ɔku ɔmmɔ kemmo etemila ƒui momoomo úte bekyuli bammɔ.
Likpo lɛmɛni lɛdi kesii kani na bébi na báklibi bése kaduɛ na ɔdi unengu ɔni baalɔ Gemaria kadi na ɔdi Seƒan ubidi.
11Gemaria ɔmɛni ubidi ɔni baalɔ Mikaia lɛnɔ ɔ́kya mmɔ na únu ka Baruk ɔ́ka lɛla lɛni na Unwoti ɔ́su. 12Uwi ɔni na Baruk ɔ́ka ala amɛni ɔ́wɔlɔ ni, Gemaria únwini úsie ɔga lɛgbanya mmɔ na útásiaku ɔti Gemaria ku bakutine bamba na bana ɔku unwenine ɔtɔ ka anwu ku ɔga bakutine bakladi beli baabla kelisa kadi, na bana akɔ bani ndi Elisama ku Delaia ku Elnatan ku Sedekaia. 13Mikaia ɔ́sɔku ala ani na únu ka Baruk ɔ́ka úte bekyuli bammɔ ƒui mmɔ ɔ́su-ma. 14Mmɔ na benengu bammɔ bátala Yehudi ku Selemia bákya Baruk banii batásu-ma banini, “Ti ɔku kakunkɛ kani na áka mmɔ boku-bu.”
Amu uwi ɔni na Baruk úti ɔku kakunkɛ kammɔ úboku ni, 15benengu bammɔ básu-nwu banini, “Buvele, lie kalɔ na aka ɔku ɔmmɔ ete-bu.”
Na anwu lɛnɔ ɔ́ka-nwu úte-ma sɔsɔ. 16Ɔku ɔmmɔ kenye kékpoku-ma ka bénu ala ani na ɔ́ka mmɔ. Anwuɔsu básu lɛlɔ banini, “Ɔlɛka bula ɔga lɛnɔ unu ɔku ɔmɛni kenye!” Na bénwini bésie Baruk kudɔ na béye-nwu banini, 17“Ukyuli ɔdi násu-ɔ lɛla lɛni na enweni akya ɔku ɔmɛni kemmo?”
18Amu na Baruk údie kenye ɔnini, “Ɛɛn, Yeremia násu-mi lɛla lɛmmɔ. Na lɛla lɛni kani na ɔ́su-mi na línweni.”
19Amu na benengu bammɔ básu Baruk banini, “Ɔdi ka awɔ ku Yeremia ƒui bikeli bitábɛ na kesii kadi na ukyuli biala ɔsɔ utanu-mii iye ɔdi ɔti kesii kani na bɛkya.”
20-22Ɔmmɔ kama benengu bammɔ beti ɔku kakunkɛ kammɔ bétése Elisama ɔtɔ kemmo na bátɔlɔ bésie ɔga kudɔ na lɛtɔ lɛmmɔ akɔ unwi kemmo. Kesii kammɔ na ɔɔkya taabla kabla na kɔyɔ uwi na ɔdi kɔbuli yaalenwidi kemmo, anwuɔsu básala ogya bákya lɛyu lɛdi kemmo bálɛ mmɔ na ɔga ɔmmɔ ulie ɔɔwaa. Ka bakutine bammɔ básu-nwu ɔku kakunkɛ kammɔ lɛlɔ kɔtɛ báwɔlɔ ni, ɔga mmɔ ɔ́tala Yehudi ɔnii utéti-ka uboku. Anwu lɛnɔ útéti-ka úboku na úbo uli ɔɔká-ka etemila teete ɔga ku nwuna benengu bammɔ. 23-25Nsu uwi biala na Yehudi ɔ́wɔlɔ bɔka likuku lɛdi ɔ́wɔlɔ ni, na ɔga ɔsu-nwu ɔnii uti nwuna kewii blii kani na ɔda na ukulo mmɔ udie na uti ubo ɔkya ogya kemmo. Na Elnatan ku Delaia ku Gemaria bévele ɔga banii ɔda kakunkɛ kammɔ bɔkyula lɛni ɔya, nsu útaƒɔ-ma kasusu kani na baakya-nwu mmɔ. Anwuɔsu kawɔlɔkɔ ni, kakunkɛ kammɔ lɛla lɛdi lɛ́sɔ lítebu na ukyuli ɔnu.
26Amu na ɔga ɔmmɔ ɔ́su ubidi Yeramel ɔnii ɔkpanku Seraia ku Selemia ɔda na bebeƒie ami ku Baruk beboku. Nsu Unwoti útaya na banu-bu.
Yeremia Únweni Ɔku Kakunkɛ Kanyɔdi
27Baruk na lɛ́su lɛla lɛni na únweni ɔsia ɔku kakunkɛ kedeedi lɛlɔ. Nsu Unwoti ɔ́su-mi ɔnii 28nwia ɔku kakunkɛ bamba na linweni ala ani ƒui na nsia ɔku kakunkɛ kedeedi lɛlɔ mmɔ nsia kanyɔdi kamɛni lɛlɔ. 29Na ɔ́su-mi ɔnii nsu Ɔga Yehoiakim ɔnini,
“Ɔɔɔdi ɔku kakunkɛ kammɔ lɛti kani na ákyula, mmomu ése kayi na éye anini, ‘Bi ɔsu na Yeremia únweni ɔnii Babilonƒuɔ ɔga ɔdubo ubekpo ɔma ɔmɛni na ubile ala na ɔdu bekyuli ku bebuo bamɛni ƒui?’ 30Anwuɔsu ami Unwoti muusé kenye ka badubo-ɔ bɔdu na bebo-ɔ ɔlɔna batáva kalɔ. Na ɔƒɛ ɔdubuƒi-nwu ɔƒiiwi na amii ayu wi-nwu lɛlɔ usien. Na ƒula ɔtɔ kemmo ku bawɔ ɔdi biala ɔsɔ uladi lɛga na Yuda kudii. 31Awɔ ku ƒula bebi ku ƒula kabla bablane ƒui bibo likyulikpi. Anwuɔsu ndubo bina ƒui kɔtu bɔni. Lɛ́lɛ awɔ ku Yudaƒuɔ ku Yerusalemƒuɔ ƒui kpakplaa ka ɔgbankpi ɔdubo-mii lɛlɔ, nsu ɔdi útabu-mi litemi. Anwuɔsu ɔƒaani, amii ɔdi ɔ́sa!”
32Ɔmmɔ kama ka Unwoti ɔ́wɔlɔ-mi bɔtɛmiku ni, líti ɔku kakunkɛ bamba líte Baruk, na lɛ́su-nwu lɛla lɛni na unweni ɔsia-ka lɛlɔ. Na ala ammɔ étulo ani nákya ɔku udeedi ɔni na Ɔga Yehoiakim ɔ́kyula kemmo muedi.
Currently Selected:
Yeremia 36: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
